جاھاننىڭ ەڭ مىقتى جاس بياتلونشىلارى بەس ءتۇرلى سايىستا جالپى 18 جارىستىڭ جۇلدەسىن ساراپقا سالادى. چەمپيوناتقا الەمنىڭ 50 مەملەكەتىنەن 800-گە جۋىق سپورتشى قاتىسادى دەپ كۇتىلىپ وتىر.
«مۇنداي اۋقىمدى سپورتتىق ءىس-شارا قازاقستاندا تۇڭعىش رەت ۇيىمداستىرىلۋدا. 2018 جىلى ششۋچينسك قالاسىندا ۇلتتىق شاڭعى ورتالىعى اشىلىپ, حالىقارالىق بياتلونشىلار وداعىنىڭ سەرتيفيكاتتاۋىنان ءوتتى. ءىرى حالىقارالىق جارىستاردى وتكىزۋگە ارنالعان «ا» ساناتىنداعى ليتسەنزياعا يە بولدى. بيىل ستاديوندا اشىق ازيا چەمپيوناتىن وتكىزگەننەن كەيىن ءبىز ورتالىقتىڭ وزگە دە ءىرى جارىستارعا دايىندىعىن پىسىقتاپ الدىق. جەتكىنشەكتەر مەن جاسوسپىرىمدەر اراسىنداعى چەمپيوناتتى وتكىزۋ – قازاقستاننىڭ بياتلون تاريحىنداعى ايشىقتى وقيعا. اتالعان ءىس-شارا ناتيجەسىندە بالالار مەن جاسوسپىرىمدەر اراسىنداعى سپورتتا سەرپىن پايدا بولاتىنىنا سەنىمدىمىز», دەيدى قازاقستان بياتلونشىلار وداعىنىڭ پرەزيدەنتى ەرمەك قيزاتوۆ.
قازاقستان جاسوسپىرىمدەر قۇراماسىنىڭ نەگىزگى قۇرامى جەلتوقسان ايىندا ششۋچينسك قالاسىندا وتەتىن قازاقستان كۋبوگىنىڭ ناتيجەلەرى بويىنشا بەلگىلى بولادى.
