ءىس-شارا ەڭ الدىمەن باتىس قازاقستان وبلىسى ديزاينەرلەر قاۋىمداستىعى مۇشەلەرىنىڭ قولونەرلەرى ۇسىنىلعان كورمەدەن باستاۋ الدى. كورمەگە قازاقتىڭ ۇلتتىق بۇيىمدارى, قولدان جاسالعان سومكەلەر, ءۇي توقىمالارى, قۇراق كورپەلەر قويىلدى. باتىس قازاقستان وبلىسى ديزاينەرلەر قاۋىمداستىعىنىڭ ءتورايىمى اسەم سىرىموۆانىڭ جەتەكشىلىگىمەن قىز بالانىڭ قارتايعانعا دەيىنگى ءومىر كەزەڭدەرىن قامتىپ, قاي كەزدە قانداي ورامال تاعۋ كەرەكتىگى شاعىن قويىلىممەن كورسەتىلدى.
«قوعامدىق كەلىسىم» كمم باسشىسى مەدحات قامبەتوۆ پەن وبلىستىق قحا انالار كەڭەسىنىڭ ءتورايىمى شالقىما قۇرمانالينا ءوز سوزدەرىندە حالقىمىز ءۇشىن اق ورامالدىڭ قادىر-قاسيەتى مەن ماڭىزى اسا جوعارى بولعانىنا توقتالسا, وبلىستىق ىسكەر ايەلدەر كەڭەسىنىڭ ءتورايىمى ليانا تۇرسىنوۆا اق ورامالدىڭ قۇندىلىقتارى حاقىندا ءسوز قوزعادى. سونداي-اق ونىڭ قازاق حالقىنىڭ داستۇرىندە ۇلكەن ءرول اتقاراتىندىعىن اتاپ كورسەتتى.
جالپى, اق ءتۇستى جاۋلىقتىڭ قازاق مادەنيەتىندەگى, تۇرمىسى مەن تاريحىنداعى فيلوسوفيالىق ماعىناسى – اق ءتۇس تازالىقتىڭ, ىزگىلىكتىڭ, اماناتقا ادالدىقتىڭ بەلگىسى ەكەندىگى جونىندە كەڭىنەن اڭگىمەلەندى. قازىرگى كەزدە زاماناۋي ۇلگىدە ادەمى ەتىپ تاعۋ جولدارىنىڭ كوپ ەكەندىگى دە تىلگە تيەك ەتىلدى. سوڭىندا مەرەكەلىك ءىس-شاراعا ءوز ۇلەستەرىن قوسقان باتىس قازاقستان وبلىسى ديزاينەرلەر قاۋىمداستىعىنىڭ مۇشەلەرىنە العىسحات تاپسىرىلدى.
رافحات حالەلوۆ
ورال
