قازاقستان رەسپۋبليكاسى مەن تۇركيا رەسپۋبليكاسى اراسىنداعى اۋىل شارۋاشىلىعى ءونىمىنىڭ تاۋار اينالىمى 2022 جىلعى قاڭتار-تامىز ارالىعىنداعى كەزەڭدە 181,1 ملن دوللار بولدى. سونىڭ ىشىندە ەكسپورت – 106,3 ملن دوللار, يمپورت – 74,7 ملن دوللاردى قۇرادى. بۇل 2021 جىلدىڭ سايكەس كەزەڭىمەن سالىستىرعاندا 2,5 ەسە كوپ. نەگىزگى ەكسپورت مىناداي تاۋارلارعا تيەسىلى: بيداي – 28,9 ملن, كۇنباعىس مايى – 28,6 ملن, بۇرشاق داقىلدارى – 16,0 ملن, زىعىر – 13,2 ملن دوللار. 2022 جىلى قازاقستان 2021 جىلى تۇركياعا اكەتىلمەگەن كۇنباعىس مايىنىڭ ەكسپورتىن قالپىنا كەلتىردى.
بۇدان باسقا, يمپورت كولەمى 1,5 ەسە ءوستى. يمپورتتىڭ باسىم بولىگىن مىنا ونىمدەر قۇرايدى: كۇنباعىس تۇقىمى – 12,9 ملن, شوكولاد – 10,2 ملن, قۇس جۇمىرتقاسى – 7,1 ملن, كونديتەرلىك ونىمدەر – 5,5 ملن دوللار.
«اتامەكەن» ۇلتتىق كاسىپكەرلەر پالاتاسى مەن تۇركيا رەسپۋبليكاسى اراسىندا تىعىز ىنتىماقتاستىق ورناتىلعان. 2022 جىلى تۇركيا ۆيتسە-پرەزيدەنتى فۋات اقتاۋدىڭ جۇمىس ساپارى اياسىندا قازاقستان-تۇركيا بيزنەس-فورۋمى ءوتتى. وعان 250-دەن استام كاسىپكەر, سونداي-اق مەملەكەتتىك ورگاندار مەن كۆازيمەملەكەتتىك سەكتور وكىلدەرى قاتىستى.
«كەزدەسۋ ءساتتى ءوتتى, ىنتىماقتاستىق تۋرالى 10 كەلىسىم جاسالدى. ولاردى ىسكە اسىرۋ اياسىندا ينۆەستورلار بىرقاتار كاسىپورىن سالۋعا نيەتتى. اتاپ ايتقاندا بقو جانە اقتوبە وبلىستارىندا اۆياكارگو بار كولىك-لوگيستيكالىق ورتالىقتار, الماتىدا فارماتسەۆتيكالىق زاۋىت, مەديتسينالىق بۇيىمدار, ماسكالار مەن رەسپيراتورلار شىعاراتىن كاسىپورىن, توت باسپايتىن بولات, مەتالل بولات كونسترۋكتسيالاردان جاسالعان ونىمدەر شىعاراتىن زاۋىت, ەلوردادا ساۋدا-ويىن-ساۋىق ورتالىعى سالىنادى», دەپ اتاپ ءوتتى «اتامەكەن» قر ۇكپ تورالقا توراعاسى رايىمبەك باتالوۆ.
