وپەراتسيا 2022 جىلعى قاڭتاردا قازاقستان, وزبەكستان مەن رەسەيدىڭ «ەسىرتكى نارىعىن» پسيحوتروپتىق زاتتارمەن قامتاماسىز ەتىپ وتىرعان جاسىرىن ەسىرتكى لابوراتورياسىن جويۋدان باستالدى. زاڭسىز اينالىمنان 188 كەلى «مەفەدرون» ەسىرتكى زاتى تاركىلەندى.
«ارنايى قىزمەت قىلمىستىق كاپيتالدى قازاقستاننان تىس شىعارۋ مەن ونى «تازارتۋ» سحەمالارىن انىقتاۋ بويىنشا شارالاردى قولعا الدى. اقشا اۋدارىمدارى قارجىلىق اينالىمدا قاجەتتى دەڭگەيدە ايقىندالماعان كريپتوۆاليۋتادا جۇرگىزىلگەنى قيىندىقتار تۋدىرعانىن اتاپ ءوتۋ قاجەت. ۇقك قىلمىستىق تىزبەكتىڭ بارلىق قاتىسۋشىلارىن انىقتاۋ ارقىلى, «بيتكوينداردى» قولما قول اقشا قىلاتىن كريپتواقشا ايىرباستاۋ ورنىن تاپتى. بۇل ۇيىم الماتىداعى ءار-ءتۇرلى اقشا ايىرباستاۋ ورىندارىنىڭ قىزمەتكەرلەرى ارقىلى اقشانى قولما قول بەرىپ وتىرعانى بەلگىلى بولدى», دەلىنگەن حابارلامادا.
ناتيجەسىندە قىلمىستىق سحەمانى ۇيىمداستىرۋشى مەن ونىڭ جاقتاستارى قۇرىقتالدى.
ۆەدومستۆونىڭ ءباسپاسوز قىزمەتى حابارلاعانداي, قىلمىستىق توپتاردىڭ ەسىرتكى ءىس-ارەكەتىنەن تاپقان كريپتوۆاليۋتاداعى 68 ملن تەڭگە قارجىسى مەملەكەت كىرىسىنە وتكىزىلدى.
