ەكسپورتتىق باعىتتاعى كاسىپورىن مەملەكەت باسشىسى قاسىم-جومارت توقاەۆتىڭ وڭتۇستىك كورەياعا جاساعان ساپارى كەزىندە ءسوز بولعان ءىرى مەتاللۋرگيالىق كلاستەردىڭ العاشقى جوباسى رەتىندە جۇزەگە اسىرىلىپ جاتىر.
بۇل جەردە فەرروقورىتپالار مەن بولات وندىرەتىن كاسىپورىندار, مەتالدى ەكىنشى قايتارا وڭدەيتىن فابريكالار تۇرعىزىلادى. «Mineral Product International» جشس-نىڭ ينۆەستيتسيالىق جوباسى تولىق ىسكە اسسا, جىلىنا 160 مىڭ توننا فەرروقورىتپا شىعارۋ قابىلەتىنە يە. فەرروقورىتپالار وندىرەتىن كاسىپورىننىڭ ەرەكشەلىگى, وندىرىستەن شىعاتىن زياندى قالدىقتاردى 99,9%-عا دەيىن زالالسىزداندىرادى. دايىن ءونىم ەۋرازيالىق وداققا, ازيا ەلدەرى مەن اقش-تىڭ مەتاللۋرگيالىق نارىعىنا جونەلتىلەدى. تارتىلعان ينۆەستيتسيالاردىڭ جالپى سوماسى 360 ملن دوللاردى قۇراپ وتىر.
– مەتاللۋرگيالىق كلاستەر قۇرامىنا مەتالدى ەكىنشى قايتارا وڭدەۋ فابريكاسى, فەرروقورىتپالار مەن بولات ءوندىرۋ كاسىپورىندارى كىرەدى. بۇل جوبالاردى جۇزەگە اسىرۋ ارقىلى 2025 جىلعا دەيىن وبلىستىڭ وڭدەۋشى ونەركاسىپ كولەمىن 57 پايىزعا دەيىن ارتتىرۋعا جاعداي جاسالادى. جەرگىلىكتى تۇرعىندار ءۇشىن 3 مىڭعا جۋىق جاڭا جۇمىس ورنىن اشۋعا مۇمكىندىك تۋادى, – دەپ اتاپ ءوتتى بولاشاق كاسىپورىننىڭ قازىعىن قاعۋ راسىمىندە پاۆلودار وبلىسىنىڭ اكىمى ابىلقايىر سقاقوۆ.
جىل سايىن ىشكى نارىقتى 3 ملن توننادان استام بولات ونىمىمەن قامتۋ ارقىلى يمپورت كولەمى 70 پايىزعا دەيىن ازايتىلماق.
ال كومپانيا اكتسيونەرى سەرگەي كاننىڭ سوزىنە قاراعاندا, پاۆلودار وبلىسىندا مەتاللۋرگيا سالاسىن دامىتۋعا بارلىق مۇمكىندىك بار. مەملەكەت پرەفەرەنتسيالار جانە قاجەتتى ينفراقۇرىلىمدى تارتۋعا مۇمكىندىك بەرۋ ارقىلى ينۆەستورلارعا بارىنشا قولايلى جاعداي جاساۋدا.
«پاۆلودار وبلىسىن تاڭداۋ كەزىندە مۇنداعى شيكىزاتتىق بازا, جوعارى بىلىكتى ماماندار مەن ەنەرگەتيكالىق مۇمكىندىكتەرگە ەرەكشە نازار اۋداردىق», دەيدى ول.
ايتا كەتەلىك, بۇگىندە وبلىستاعى ونەركاسىپتىك ءونىم كولەمى 1,4 ترلن تەڭگەگە جەتكەن, بۇل رەسپۋبليكا بويىنشا ەكىنشى كورسەتكىش. شيكىزاتتىق ەمەس ەكسپورت 1,4 ەسەگە ءوسىپ, ءوڭىر بۇل بويىنشا دا ەل اۋماعىندا تاعى ەكىنشى ورىنعا شىققان. 2025 جىلعا دەيىن جالپى سوماسى 2 ترلن تەڭگەگە 143 ءىرى ينۆەستجوبانى جۇزەگە اسىرۋ كوزدەلۋدە. وسىنىڭ ناتيجەسىندە, جاڭادان ون مىڭ جۇمىس ورنىن قۇرۋ جوسپارلانىپ وتىر.
پاۆلودار وبلىسى
