– ەگەر مەنەن وسى تۋرنيردەگى ەڭ ۇزدىك ويىنىڭىز قايسى بولدى دەپ سۇراسا, ويلانباستان فينالدىق ماتچ دەپ جاۋاپ بەرەر ەدىم. ويتكەنى مەن فينالدا ويىندى اگرەسسيۆتى تۇردە باستاعان مىقتى قارسىلاسپەن جولىقتىم. ول كورتتا مەنى ىڭعايسىز سەزىندىرۋ ءۇشىن بارىن سالدى. ونى سەزدىم دە. بىراق مەن ەشتەڭەگە قاراماي, ءوز ويىنىمدى ويناۋعا تىرىستىم. كەيىنگى ەكى اپتا مەن ءۇشىن وتە تابىستى ءوتتى. الدىڭعى اپتادا تەل-اۆيۆتەگى تۋرنيردە توپ جارسام, بۇل اپتادا استانادا ولجالى بولدىم.
– نوۆاك, استانا نەمەسە قازاقستان دەگەندە ءسىزدىڭ ويىڭىزعا ءبىرىنشى قانداي وي كەلەدى؟ ءبىر سوزبەن ايتىڭىزشى.
– ءبىر سوزبەن؟ قيىنداۋ ەكەن (ك ۇلىپ). بولات (وتەمۇراتوۆ). 2019 جىلى مەن استاناعا العاش رەت كەلگەن ەدىم. سول كەزدەن باستاپ قازاقستان دەگەندە ويىما ءبىرىنشى بولات كەلەتىن. ءبىز وتە جاقسى ارالاسامىز, ول مەنىڭ وتباسىمدى, كوماندامدى جاقسى بىلەدى, اعاممەن جاقىن ارالاسادى. سول كەزدە ول مەنى قايىرىمدىلىق ماتچىندا ونەر كورسەتۋگە شاقىردى. وسى جولى دا قازاقستانعا قايتا كەلۋ مۇمكىندىگى بۇيىرعانىنا وتە قۋانىشتىمىن. قالانى ارالاپ كورۋگە ۋاقىتىم بولمادى. دەگەنمەن استانالارىڭىز ينفراقۇرىلىمى دامىعان, ءسان-سالتاناتى كەلىسكەن قالا ەكەن. 2019 جىلى قازاقستاننىڭ تۇڭعىش پرەزيدەنتىمەن كەزدەستىم. وسى جولى دا پرەزيدەنت قاسىم-جومارت توقاەۆپەن ونىڭ سارايىندا جۇزدەستىك. ادامداردىڭ قوناقجايلىعىنا تاعى تاڭداندىم. مۇندا تەننيستى شىنىندا دا جاقسى كورەدى ەكەن. جانكۇيەرلەر دە الەمدىك تەننيس جۇلدىزدارىنىڭ ونەرىن ۇنەمى باقىلاپ وتىراتىنى اڭعارىلادى. ەل پرەزيدەنتىنەن باستاپ قاراپايىم سپورتسۇيەر قاۋىمعا دەيىن. ءبارى تەننيستى قولدايدى, وينايدى. ەلەنا رىباكينا «ۋيمبلدوندا» جەڭىمپاز اتاندى, قازاقستاننىڭ «دەۆيس كۋبوگىندەگى» كومانداسى دا وتە جاقسى ونەر كورسەتىپ ءجۇر. ولار ءوز ەلىندە وسى سپورت ءتۇرىنىڭ دامۋى ءۇشىن ءبارىن ىستەپ جاتىر دەپ ايتا الامىن.
– ءسىز بىرنەشە رەت قازاقستاندىق جاس تەننيسشى بەيبىت جۇقاەۆپەن جاتتىعىپ ۇلگەردىڭىز. ونىڭ بولاشاعى تۋرالى نە ايتار ەدىڭىز؟
– مەنىڭشە, ول – مەن كورگەن جاس تەننيسشىلەردىڭ ىشىندەگى سوققىسى جويقىن سپورتشىلاردىڭ ءبىرى, راس ايتامىن. ءبىز كوماندامىزبەن ونىڭ سوققىسى مىقتى ەكەنى تۋرالى پىكىرلەسكەن بولاتىنبىز. سونداي-اق ءبىز ونى سەربياعا شاقىرىپ, كەيدە ءوزىمنىڭ تەننيس ورتالىعىمدا مەنىمەن بىرگە جاتتىعۋى تۋرالى سويلەستىك. مەنىڭ ول تۋرالى پىكىرىم وتە جاقسى. ونىڭ شىنىندا بولاشاعى زور, الەۋەتى مىقتى. ەگەر جاتتىعۋىن توقتاتپاي, ەڭبەكتەنە بەرسە, الداعى ۋاقىتتا تابىستى تەننيسشىنىڭ ءبىرى بولادى.
– ءسىز تەننيس كورولىنە اينالماي تۇرىپ, ءبىر كەزدەرى تەننيس ماماندارى, جانكۇيەرلەرى ءسىزدى حانزادا دەپ اتايتىن. قازىر ءوزىڭىزدىڭ ءىزباسارىڭىز رەتىندە كىمدى ايتار ەدىڭىز؟
– جوعارى باعاڭىزعا راحمەت (ك ۇلىپ). قازىر تەننيستىڭ بولاشاق كورولى كىم ەكەنىن بولجاۋ قيىن. مەنىڭ ويىمشا, ءبىزدىڭ سپورتتى عاجاپ دەڭگەيگە كوتەرىپ جاتقان جاس ويىنشىلار از ەمەس, سولاردىڭ ءبىرى – ستەفانوس تسيتسيپاس (فينالداعى قارسىلاسى). بيىل تاماشا ماۋسىم وتكىزىپ جاتقان الەمنىڭ ءبىرىنشى راكەتكاسى كارلوس الكاراستى دا اتاپ وتپەسەم بولمايدى. بۇكىل تەننيس قاۋىمداستىعىنا «ۇلكەن ۇشتىكپەن», ياعني – فەدەرەر, نادال جانە مەنىمەن قوشتاسۋ قيىن ەكەنىن تۇسىنەمىن. ءبىزدىڭ قاتارعا ەندي ماررەيدى دە قوسۋعا بولادى. ءبىز 15 جىل بويى تەننيستىڭ الدىڭعى قاتارىندا بولدىق. بىراق قازىر «ۇلكەن دۋلىعانى» جەڭۋگە قابىلەتتى جاستار پايدا بولىپ جاتىر. بىراق ءبىز رافا ەكەۋمىز بۇرىنعىشا مىقتىمىز جانە ولارعا ۇلكەن ارەنادا ءالى دە قارسىلاس بولۋعا تىرىسىپ باعامىز. بۇل سپورت ءۇشىن جاقسى.
– ەگەر Astana Open كەلەسى جىلعى اتر كۇنتىزبەسىنە ەنەتىن بولسا, استاناعا قايتا كەلەسىز بە؟
– استاناعا كەلەسى جىلى كەلەر-كەلمەسىمدى ناقتى ايتا المايمىن. سەبەبى وعان دەيىن ءبىر جىل ۋاقىت بار. بىراق ەلدەرىڭىزگە تۋريست رەتىندە نەمەسە تەننيس ءتۋرنيرىنىڭ قاتىسۋشىسى رەتىندە قايتا ورالعىم كەلەدى. مۇنداعى ادامداردىڭ مەنى جىلى قارسى العانى سونشا, ءبىر كۇنى قايتىپ كەلەتىنىمە سەنىمدىمىن.
جازىپ العان
ءالي بيتورە,
«Egemen Qazaqstan»
