اتالعان مۋزەيدىڭ باسشىسى ۇلبوسىن قامباتىروۆا بۇل جادىگەردى مۇراجاي قورىنا سۋرەتكەردىڭ وتباسى 2000 جىلى تاپسىرعانىن ايتادى. پلاششتىڭ ءتۇسى اقشىل سارى, قايىرما جاعالى, جەڭى ۇزىن. كەۋدەسى مەن ارقاسىنىڭ استارىنا قوسىمشا ماتا جاپسىرىلعان. وڭ جاققا تۇيمەلەنىپ, بەلبەۋمەن بايلانادى. بۇل سىرت كيىم 50-ءشى جىلدارى رەسەيدە تىگىلىپ, وعان فابريكالىق ماتەريال قولدانىلعان.
«بىزدە بۇدان باسقا جازۋشىنىڭ جازۋ ۇستەلى, كوستيۋم-شالبارى جانە قۇجاتتارى مەن وتباسىلىق فوتوسۋرەتتەرى بار. سونىمەن بىرگە قورىمىزدا قالامگەردىڭ داۋىسى جازىلعان تاسپا مەن «مۇحيتتان وتكەن قايىق» رومانىنىڭ قولجازباسى ساقتالعان. وسىنىڭ ءبارى – ءبىز ءۇشىن قىمبات دۇنيەلەر. بۇلاردى مۋزەيگە كەلگەن قوناقتار قىزىعىپ كورەدى», دەيدى ۇ.قامباتىروۆا.
سونداي-اق ءىلياس ەسەنبەرليننىڭ وسى پلاششىمەن تۇسكەن بىرقاتار سۋرەتى بار. اسىرەسە قازاقستاننىڭ حالىق جازۋشىسى قابدەش ءجۇمادىلوۆ «تاريحي رومانداردىڭ كوشباسشىسى» اتتى ەستەلىگىندە قابىرعالى قالامگەردى العاش وسى پلاششىمەن كورگەنىن جازادى. «ۋنيۆەرسيتەتتى بىتىرگەن سوڭ, الپىسىنشى جىلداردىڭ ورتا شەنىندە «قازاق ادەبيەتى» گازەتىندە قىزمەت ىستەپ ءجۇردىم. گازەتتىڭ باس رەداكتورى – قازاقتىڭ ۇلكەن جۇرەكتى اقىنى, مارقۇم قاپان ساتىبالدين, ورىنباسارى – قازىرگى بەلگىلى جازۋشى, پروفەسسور نىعمەت عابدۋللين. بۇلاردان باسقا ءار بولىمدە بۇل كۇندە جۇرتشىلىققا كەڭىنەن تانىمال, بىراق ول كەزدە ءالى جاس بۋىنعا سانالاتىن ساكەن ءجۇنىسوۆ, سايىن مۇراتبەكوۆ, مۇحتار ماعاۋين, قاليحان ىسقاقوۆ, رامازان توقتاروۆ سياقتى سايدىڭ تاسىنداي جىگىتتەر بار ەدى. ايتايىن دەگەنىم, سول تۇستا باس رەداكتور قاپاننىڭ كابينەتىنە جاسى ەلۋگە كەلىپ قالعان, ۇستىندە كونەتوز اق پلاششى بار, قاناتى سىنعان قازداي ءبىر جاعىنا ءسال قيسايىپ باساتىن اق شاشتى, الاسا بويلى ءبىر ادام كەلىپ-كەتىپ ءجۇردى. الگى ادام كوبىنەسە جۇمىس اياعىنا تامان كەلەدى دە, رەداكتورمەن اڭگىمەلەسىپ وتىرىپ قالادى. كەيدە ەكەۋىنىڭ ءازىل-قالجىڭدارى جاراسىپ, بىرگە كەتىپ بارا جاتقانىن كورەمىز.
– ءبىزدىڭ رەداكتوردىڭ قاسىنان شىقپايتىن وسى اق پلاششتى كىم؟ – دەيمىز, جاستار جاعى ءبىر-بىرىمىزگە يەك قاعىپ. – بۇل – قاپاننىڭ دوسى, ءىلياس ەسەنبەرلين دەگەن جازۋشى, – دەيدى رەداكتسياداعى ەگدە قىزمەتكەرلەر», دەيدى مارقۇم قابدەش اعامىز.
قىسقاسى, اتباسارداعى ءىلياس ەسەنبەرليننىڭ ادەبي مۋزەيىندەگى ءبىز ءسوز ەتىپ وتىرعان باعالى جادىگەر ۇلت رۋحىن وياتقان جازۋشى ومىرىنەن نازىك سىر شەرتەدى.
