ءبىلىم • 07 قازان، 2022

ۇزدىك پەداگوگكە – جەڭىل كولىك

145 رەت كورسەتىلدى

بيىل الماتى وبلىسىنىڭ ءبىلىم سالاسىنداعى بيۋدجەتى 274،7 ملرد تەڭگەنى قۇرادى. بۇل – وتكەن جىلمەن سالىستىرعاندا 34 ملرد تەڭگەگە ارتىق. بولىنگەن قارجىنىڭ 4،6 ملرد تەڭگەسى ءبىلىم بەرۋ ۇيىمدارىنىڭ ماتەريالدىق-تەحنيكالىق بازاسىن نىعايتۋعا جانە 2،7 ملرد تەڭگەسى وقۋلىقتار مەن وقۋ-ادىستەمەلىك كەشەندەردى ساتىپ الۋعا جۇمسالادى.

بيىل جەرگىلىكتى بيۋدجەت ەسە­بى­نەن جاڭا موديفيكاتسيالىق كابي­نەت­تەر ساتىپ الۋعا 1 063،3 ملرد تەڭگە قا­راجات ءبولىنىپ، جىل سوڭىنا دەيىن 102 ءپان كابينەتى تولىقتاي جاب­دىق­تا­لادى. جالپى، الماتى وبلىسى – تۇرعىندار تىعىز ورنالاسقان ءوڭىر. مۇن­­داعى دەموگرافيالىق ءوسىم مەن ىشكى ميگراتسياعا بايلانىستى جىل سا­يىن وقۋشىلار سانى ارتىپ كەلەدى. سون­دىق­تان دا وڭىردە ءۇش اۋى­سىمدى مەكتەپ سانىن ازايتۋ ءالى كۇنگە كۇن تارتىبىنەن تۇسكەن ەمەس. بۇگىندە 54 ءبىلىم ۇياسىنىڭ ءۇش اۋىسىمدا جۇمىس ىستەپ تۇرعانى تاعى راس. ياعني وبلىستاعى مەكتەپتەردە 23 273 وقۋشى ورنى تاپشىلىعى بار. بۇگىندە ءۇش اۋىسىمدا ءبىلىم بەرۋ مەن وقۋشى ورىندارىنىڭ تاپشىلىعىن جويۋ ماقساتىندا 2022-2025 جىلدار ارالىعىندا 62 مەكتەپتىڭ قۇرىلىسىن سالۋ جوسپارلانعان. بيىلدىڭ وزىندە 20 ءبىلىم بەرۋ نىسانىنىڭ قۇرىلىسى جۇرگىزىلىپ جاتىر.

– سوڭعى ءۇش جىلدا پەداگوگتەردىڭ جالاقىسى 75 پايىزعا كوتەرىلدى، كەلەر جىلدىڭ قاڭتارىندا تاعى 25 پايىزعا ارتادى. بەسىنشى جىل قاتارىنان جاڭا فورماتتا بىلىكتىلىك دەڭگەيىن راس­تا­عان پەداگوگتەردىڭ جالاقىسى 30-50 پا­يىزعا ارتتى. قازىر وبلىستاعى 31 193 ۇستازدىڭ 9 331-ءى مودەراتور، ساراپ­شى، زەرتتەۋشى، شەبەر ساناتىندا. ما­گيستر-پەداگوگتەرگە 10 اەك كو­لە­مىن­دە قوسىمشا اقى تولەنەدى، – دەدى وبلىس ۇستازدارىن قۇتتىقتاعان جيىندا وبلىس باسشىسى مارات سۇلتانعازيەۆ.

ءوڭىر پەداگوگتەرىنىڭ سالتاناتتى باسقوسۋىندا الماتى وبلىسىنىڭ «ۇزدىك ۇستازى» انىقتالدى. بۇل قۇر­مەت­تى اتاققا بيىل ىلە اۋدانىنداعى №40 مەكتەبىنىڭ فيزيكا ءپانىنىڭ مۇعالىمى بالاۋسا ساريموۆا لايىق دەپ تا­نىل­­دى. ماقتاۋلى مۇعالىمگە مارات سۇلتانعازيەۆ جەڭىل كولىكتىڭ كىلتىن تاپسىردى. سونىمەن قاتار وبلىس اكىمى ءبىلىم بەرۋ جۇيەسىن دامىتۋعا، رۋحاني، ادامگەرشىلىك ءتالىم-تاربيە بەرۋگە ۇلەس قوسقان بىرقاتار ۇستازدى العىسحاتپەن، قۇرمەت گراموتاسىمەن ماراپاتتادى.

 

الماتى وبلىسى

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار