پرەزيدەنت • 06 قازان، 2022

پرەزيدەنت ۇلتتى ۇيىستىراتىن جەتى قاعيدانى اتادى

153 رەت كورسەتىلدى

مەملەكەت باسشىسى قاسىم-جومارت توقاەۆ وزىن قولداۋ جونىندەگى حالىقتىق كواليتسيا فورۋمىندا ۇلتتى ۇيىستىراتىن جەتى قاعيدانى اتادى، دەپ حابارلايدى Egemen.kz.

ءبىرىنشى. تاۋەلسىزدىك بارىنەن قىمبات. مەن بىلتىر وسى تۇجىرىم تۋرالى ارنايى ماقالا جاريالادىم. ءبىز ەگەمەندىگىمىزدى ساقتاي الساق قانا، ۇلت بولىپ، ەل بولىپ تۇرا الامىز. تاۋەلسىز مەملەكەت قانا ءوزىنىڭ ءتىلىن، جەرىن، ءدىنىن، ءدىلىن ساقتاپ قالادى. سوندىقتان، تاۋەلسىزدىك – ءبىز ءۇشىن ەڭ باستى قۇندىلىق. تاۋەلسىزدىكتى قورعاۋ جانە نىعايتۋ – ءاربىر ازاماتقا، بارىمىزگە ورتاق مىندەت! تاعى دا قايتالاپ ايتامىن. دامىعان، وركەنيەتتى ەل بولامىز دەسەك، ەڭبەكتى ەڭ باستى ورىنعا قويۋىمىز كەرەك. ەڭبەكقورلىق – وسكەلەڭ ۇرپاقتىڭ بويىنا سىڭگەن قاسيەت بولۋعا ءتيىس. بۇل قاسيەت ءبىزدىڭ ءومىر سالتىمىزعا اينالۋى كەرەك. ماسىلدىق نيەتتەن، بوس سوزدەن ارىلۋىمىز قاجەت. تاۋەلسىزدىكتى نىعايتۋعا ناقتى ىسپەن ۇلەس قوسۋ – ءار ازاماتتىڭ پەرزەنتتىك پارىزى. ەڭبەك ادامى ءبىزدىڭ قوعامدا قاشاندا قۇرمەتكە يە بولادى. سەبەبى، ەڭبەكقور ادام ءوز ءسوزىن ءاردايىم ىسپەن دالەلدەي الادى

ەكىنشى. ەلدىكتىڭ نەگىزى – جەرىمىزدىڭ تۇتاستىعى. بابالارىمىز ۇرپاعىنا ۇلان-عايىر جەردى ميراس ەتتى. ءبىز ونىڭ ءبىر ۋىس توپىراعىنا دەيىن قاستەرلەپ، اتامەكەنىمىزدى قورعاي ءبىلۋىمىز كەرەك»

ءۇشىنشى. مەملەكەت مۇددەسى – قاستەرلى قۇندىلىق. اۋىلدان اقورداعا دەيىنگى شەشىمنىڭ ءبارى وسى تۇرعىدان قابىلدانۋى قاجەت. ءبىر سوزبەن ايتساق، ءار ىستە مەملەكەتتىك ۇستانىم بولۋى كەرەك. مەملەكەت مۇددەسى دەگەنىمىز – حالىقتىڭ مۇددەسى. سوندىقتان، بارلىق شەشىمدەر، جوبالار، زاڭدار مەن جارعىلار ەل مۇددەسىن قورعاۋعا ارنالادى. تۋعان ەلگە جاناشىرلىق ءار ازاماتقا ءتان قاسيەت بولۋعا ءتيىس. 

ءتورتىنشى. رۋحاني ۇندەستىك – بىرلىكتىڭ باستاۋى. ءتول تاريحىمىز، انا ءتىلىمىز بەن اتا ءدىنىمىز – ەلدى بىرىكتىرەتىن بىرەگەي قۇندىلىقتار. ونى داۋ-دامايعا اينالدىرۋعا بولمايدى. جۇرتتى اداستىرىپ، تەرىس جولعا سالۋدان ساقتانعان ءجون. قازاقستاندا ءتۇرلى ەتنوس وكىلدەرى ءومىر ءسۇرىپ جاتىر. ولاردىڭ ماقساتى – ءبىر، بولاشاققا دەگەن كوزقاراسى – ورتاق. ءبارىمىز – ءبىر ەلدىڭ ازاماتتارىمىز. «ارالۋاندىق ارقىلى – بىرلىككە» قاعيداتى ەشقاشان وزەكتىلىگىن جوعالتپايدى. ءبىز ەتنوسارالىق تاتۋلىقتى ساقتاي ءبىلۋىمىز كەرەك. «قازاقستان ازاماتى» دەگەن ۇعىم جالپىۇلتتىق بىرەگەيلىكتىڭ وزەگى بولۋى قاجەت. سوندا ءبىرتۇتاس ۇلت رەتىندە كەلەشەككە سەنىممەن قادام باسامىز.

بەسىنشى. زاڭدىلىق پەن ءتارتىپ – وركەنيەتتى ەل بولۋدىڭ كەپىلى. زاڭ تالاپتارى بارلىق سالادا مۇلتىكسىز ورىندالۋعا ءتيىس. زاڭ الدىندا – ءبارى تەڭ. زاڭ الدىندا ءبارى بىردەي جاۋاپ بەرەدى. سوندا عانا ءبىز زاڭى مۇلتىكسىز ورىندالاتىن، ءتارتىبى قاتاڭ ساقتالاتىن ادىلەتتى مەملەكەت قۇرامىز»

التىنشى. جاسامپازدىق – جاڭارۋ مەن جاڭعىرۋ جولى. ءبىزدىڭ باستى ماقساتىمىز – وتانىمىزدى وركەندەتۋ، مەملەكەتىمىزدى دامىتۋ. وزىق ءبىلىم مەن قاجىرلى ەڭبەك قانا ەلدى تابىسقا جەتكىزەدى. باسەكەگە قابىلەتىن ارتتىرۋعا مۇمكىندىك بەرەدى. قازىر عىلىم ەكونوميكانى جەدەل العا جەتەلەيتىن الىپ يندۋسترياعا اينالدى. قازاقستان جاھاندىق ەكونوميكاداعى ۇردىستەردەن ساي بولۋعا ءتيىس. بىزگە دە وسى عىلىمي-تەحنولوگيالىق جاڭاشىلدىقتى اكەلىپ، وندىرىسكە قوساتىن جاڭا ءارى بىلىكتى ماماندار كەرەك. ءبىز ولارعا قاجەت جاعدايدىڭ بارلىعىن جاسايمىز. سەبەبى، ادام كاپيتالى ەڭ قۇندى بايلىعىمىز. مۇنى ۋاقىت جانە تاجىريبە دالەلدەدى. وسىلايشا، قازاقستاننىڭ يننوۆاتسيانىڭ، جاڭا تەحنولوگيانىڭ، تىڭ يدەيالاردىڭ، اۋقىمدى كاپيتالدىڭ ورتالىعى بولۋعا زور مۇمكىندىگى بار.

جەتىنشى. دوستىق پەيىل، مەيىرىمدىلىك جانە جاناشىرلىق – ەڭ اسىل قاسيەتتەر. قازاقتا «سىيلاسساڭ – سىيلى بولارسىڭ» دەگەن ءسوز بار. اعايىننىڭ تاتۋلىعى مەن جاناشىرلىعى – ەل بىرلىگىنىڭ ءتۇپ قازىعى. ەلدىڭ تۇتاستىعى قاراپايىم ادامداردىڭ ءوزارا تۇسىنىستىگىنەن باستالادى. حالقىمىز ءبارىن دە اقىل-پاراساتپەن شەشكەن. بۇل ءداستۇردى ۇمىتپاۋىمىز كەرەك. اعا بۋىن وسى يگى ءداستۇردى ناسيحاتتاۋى قاجەت. جالپى، ورتاق جەتىستىكتەر ۇلتتىڭ مەرەيىن وسىرەدى. ءبىز ءبىر-بىرىمىزگە قاشاندا تىلەكتەس بولۋىمىز قاجەت. تالاپتى، دارىندى ازاماتتاردى قولداي ءبىلۋىمىز كەرەك. ءار وتانداسىمىزدىڭ تابىسىنا قۋانىپ، قيىندىقتاردى بىرگە ەڭسەرۋگە ءتيىسپىز. حالقىمىز «ۇيىمداسقان ۇتادى» دەپ بەكەر ايتپاعان. بىرلىگىمىزدى بەكەمدەي بىلسەك، ەلدىگىمىزدى ساقتاپ قالامىز. سوندا عانا ادىلەتتى قازاقستاندى قۇرامىز.

سوڭعى جاڭالىقتار

قازاق بالۋانى ۇلىقتالدى

قوعام • بۇگىن، 14:36

6 جەلتوقسان - پروكۋراتۋرا كۇنى

قازاقستان • بۇگىن، 13:00

سقو-دا 50 جىلقى مۇز استىندا قالدى

ايماقتار • بۇگىن، 09:18

اشىقتىق – ماڭىزدى ۇستانىم

ساياسات • بۇگىن، 08:10

باعا بۇلقىنىسى

ەكونوميكا • بۇگىن، 08:09

ۇقساس جاڭالىقتار