ANTIKOR • 05 قازان، 2022

ماڭعىستاۋدا سىبايلاس جەمقورلىق فاكتىلەرى ەكى ەسە ارتقان

80 رەت كورسەتىلدى

قر سىبايلاس جەمقورلىققا قارسى ءىس-قيمىل اگەنتتىگىنىڭ پرەۆەنتسيا قىزمەتىنىڭ باسشىسى سايان احمەتجانوۆ جۇمىس ساپارىمەن ماڭعىستاۋ وبلىسىنا باردى، دەپ حابارلايدى Egemen.kz.

ساپار بارىسىندا جۇمىس توبى ماڭعىستاۋ وبلىسى اكىمدىگى جانىنداعى سىبايلاس جەمقورلىققا قارسى ءىس-قيمىل جونىندەگى كوميسسيانىڭ وتىرىسىنا قاتىستى. وتىرىس ماڭعىستاۋ وبلىسىنىڭ اكىمى نۇرلان نوعاەۆتىڭ توراعالىق ەتتى.

جيىندا جەمقورلىق سەبەپتەرىن انىقتاپ، ولاردىڭ الدىن الۋ، تاۋەكەلدەردى جويۋ جانە قوعامدا پاراساتتىلىق مادەنيەتىن قالىپتاستىرۋ باعىتىنداعى جۇمىستار تالقىلاندى.

ءىس-شارا بارىسىندا پرەۆەنتسيا قىزمەتىنىڭ باسشىسى سايان احمەتجانوۆ سىبايلاس جەمقورلىق تاۋەكەلدەرىن انىقتاۋدا ىشكى تالداۋ جۇمىستارىنىڭ ماڭىزدىلىعى تۋرالى ايتتى.

«مەملەكەتتىك ورگانداردا جەمقورلىق تاۋەكەلدەرىن تالداۋدىڭ ماڭىزدىلىعىن ءتۇسىنۋ كەرەك. تالداۋ بارىسىندا قىزمەتتىڭ بارلىق باعىتتارىن قامتي وتىرىپ، سىبايلاس جەمقورلىقتىڭ سەبەپتەرى مەن جاعدايلارىن جويۋ بويىنشا ۇسىنىمدار ەنگىزۋ قاجەت. 

اگەنتتىك حالىقتى تولعاندىراتىن، شەشىلمەي كەلە جاتقان پروبلەمالىق ماسەلەلەردى قامتيتىن سىبايلاس جەمقورلىق تاۋەكەلدەرىنىڭ كارتاسىن ازىرلەدى. ماڭعىستاۋ وبلىسى بويىنشا مەديتسينا، جول جانە ينفراقۇرىلىم، جەر، وليگوپوليا، ەكولوگيا سالالارى سىبايلاس جەمقورلىق تاۋەكەلدەرى كارتاسىنا ەنگىزىلگەن. تاۋەكەلدەر كارتاسىنا ەنگىزىلگەن سالالار بويىنشا جۇمىستاردىڭ تيىمدىلىگىن ارتتىرۋ ماقساتىندا بەلسەندى ازاماتتار مەن قوعامدىق بىرلەستىكتەردىڭ كۇش بىرىكتىرۋى اسا ماڭىزدى»، دەدى سايان احمەتجانوۆ.

سونداي-اق، اگەنتتىكتىڭ ماڭعىستاۋ وبلىسى بويىنشا دەپارتامەنتىنىڭ باسشىسى ءادىلحان اشىرباەۆ وڭىردەگى جەمقورلىق كورىنىستەرىنە توقتالدى.

ول «وڭىرىمىزدە بيىل سىبايلاس جەمقورلىق قىلمىس سانى ەكى ەسەگە ارتقان. قىلمىس قۇرىلىمىندا پاراقورلىقتىڭ ۇلەسى جىلدان–جىلعا وسۋدە» دەپ اتاپ ءوتتى.

بۇدان بولەك، دەپارتامەنت 3 سىرتقى تالداۋ جۇمىسىن جۇرگىزىپ، بىرقاتار سىبايلاس جەمقورلىق تاۋەكەلدەرىن انىقتاعان. سونداي-اق، قىلمىستاردىڭ الدىن الۋ ماقساتىندا اكىمشىلىك قۇقىق بۇزۋشىلىقتار تاجىريبەسى نەگىزىندە 21 تۇلعا اكىمشىلىك جاۋاپكەرشىلىككە تارتىلىپ، 25 ملن تەڭگە كولەمىندە ايىپپۇل سالىنعان.

ءوز كەزەگىندە، وبلىس اكىمى قۇقىقبۇزۋشىلىقتاردىڭ الدىن الۋ جونىندە ايتتى.

«سىبايلاس جەمقورلىققا دەيىن جەتكىزبەي، كەز-كەلگەن زاڭسىز ارەكەتتەردىڭ الدىن الۋ كەرەك. جەمقورلىق تاۋەكەلدەرى بايقالعان جاعدايدا دەر كەزىندە توقتاتا ءبىلۋ ءتيىس. باستىسى - بيۋدجەت ەسەبىنەن سالىنىپ جاتقان وبەكتىلەر ساپالى تۇرعىزىلىپ، ولاردىڭ بەلگىلەنگەن مەرزىمدە تاپسىرىلۋى، ادامداردىڭ اۋىز سۋمەن جانە ساپالى جولمەن قامتاماسىز ەتىلۋى ماڭىزدى. قازىرگى تاڭدا قوعامنىڭ مەملەكەتتىك ماڭىزدى شەشىمدەرگە ارالاسۋى قاجەتتى دەڭگەيدە ورىندالىپ جاتىر. ءاربىر مەملەكەتتىك ورگان حالىقپەن كەرى بايلانىس تەتىكتەرىن ۇدايى جەتىلدىرىپ، جۇرتشىلىقپەن تىعىز قارىم - قاتىناس جاساۋى ءتيىس»، - دەدى نۇرلان نوعاەۆ.

كەڭەس قورىتىندىسى بويىنشا ماڭعىستاۋ وبلىسىنىڭ اكىمى نۇرلان نوعاەۆ ايتىلعان ۇسىنىستاردى ەسكەرۋدى، سونداي-اق تۇرعىنداردىڭ الەۋمەتتىك ماڭىزدى پروبلەمالارىن ۋاقىتىلى شەشۋدى تاپسىردى.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار