پرەزيدەنت • 05 قازان، 2022

عىلىمي قىزمەتكەرلەردىڭ بەدەلىن ارتتىرۋ كەرەك - توقاەۆ

66 رەت كورسەتىلدى

قازاقستان پرەزيدەنتى قاسىم-جومارت توقاەۆ «جايلى مەكتەپ» ۇلتتىق جوباسى اياسىندا پاۆلودار وڭىرىندە 10 مەكتەپ سالىناتىنىن ايتتى، دەپ حابارلايدى Egemen.kz.

ء«بىز بارلىق بالانىڭ ساپالى ءبىلىم الۋىنا جاعداي جاساۋىمىز كەرەك. وسىعان بايلانىستى مەن جولداۋدا «جايلى مەكتەپ» ۇلتتىق جوباسىن جۇزەگە اسىرۋدى ۇسىندىم. بۇل باستامانىڭ اياسىندا پاۆلودار وبلىسىندا الداعى 3 جىلدا 10 مەكتەپ سالىنادى. قۇرىلىستى ساپالى سالىپ، ۋاقىتىلى تاپسىرۋ – باستى مىندەت. جۇمىس بارىسىن جەرگىلىكتى اتقارۋشى ورگاندار قاتاڭ باقىلاۋدا ۇستاۋعا ءتيىس»، دەدى قاسىم-جومارت توقاەۆ ءوڭىر جۇرتشىلىعىمەن كەزدەسۋدە.

پرەزيدەنت بۇگىندە قازاقستاندىق عىلىمي قىزمەتكەرلەردىڭ قوعامداعى ابىروي-بەدەلىن ارتتىرۋ قاجەت ەكەنىن تىلگە تيەك ەتتى. 

«جاستار ەرتەڭ ءبىلىمدى، العىر، وقۋدا وزات بولسىن دەسەك، ءبىز بۇگىن كوپتەپ ساپالى، جايلى مەكتەپ سالۋىمىز كەرەك. بۇل – مەملەكەت رەتىندە ءبىزدىڭ ورتاق مىندەتىمىز. سونداي-اق عىلىمي قىزمەتكەرلەردىڭ قوعامداعى ابىروي-بەدەلىن ارتتىرۋىمىز قاجەت. عالىمدارىمىزعا الەمدەگى جەتەكشى عىلىمي ورتالىقتاردا تاعىلىمدامادان ءوتۋ ءۇشىن جىل سايىن 500 گرانت بەرىلە باستادى. سونىمەن بىرگە، «جاس عالىم» جوباسىنىڭ اياسىندا 1000 گرانت بولىنەتىن بولدى. ستۋدەنتتەردىڭ، ماگيسترانتتار مەن دوكتورانتتاردىڭ شاكىرتاقىسى بىرتىندەپ كوبەيىپ كەلەدى. عىلىمي ينستيتۋتتار مەن ىرگەلى زەرتتەۋلەردى قارجىلاندىرۋ جۇيەسىن جەتىلدىرىپ جاتىرمىز. وسىعان وراي، زاڭدارعا ءتيىستى وزگەرىستەر ەنگىزىلدى»، دەپ قوستى مەملەكەت باسشىسى.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار