مۇندا قولدانىلاتىن وندىرىستىك تەحنولوگيانىڭ ازىرگە قازاقستاندا تەڭدەسى جوق, ەكولوگيالىق جاعىنان دەڭگەيى جوعارىلىعىمەن ەرەكشەلەنەدى. مۇنى وتاندىق قارا مەتاللۋرگيا سالاسىن دامىتۋدىڭ ماڭىزدى قادامى دەۋگە بولادى. ءبىرىنشى كەزەڭدە 100 جاڭا جۇمىس ورنى اشىلدى, الداعى ۋاقىتتا جۇمىسشىلار سانىن 500-گە دەيىن ۇلعايتۋ كوزدەلگەن, تارتىلعان ينۆەستيتسيا كولەمى 4 ملرد. تەڭگەدەن اسادى. ەكسپورتقا باعىتتالعان وسى كاسىپورىننىڭ سالتاناتتى اشىلۋىنا جەتىسۋ وبلىسىنىڭ اكىمى بەيبىت يساباەۆ, «گورنوە بيۋرو» جشس كومپانيالار توبىنىڭ ديرەكتورى ابدرامان ەدىلباەۆ, زاۋىت جۇمىسشىلارى مەن تەكەلەلىك تۇرعىندار قاتىستى.
تەكەلىلىكتەر مەن زاۋىت ۇجىمىن كاسىپورىننىڭ رەسمي اشىلۋىمەن قۇتتىقتاعان بەيبىت يساباەۆ جىل باسىنان بەرى وبلىس ەكونوميكاسىنا 129 ملرد. تەڭگە ينۆەستيتسيا تارتىلىپ, 15 ينۆەستيتسيالىق جوبا ىسكە اسىرىلعانىن اتاپ ءوتتى. سولاردىڭ ءبىرى – تەكەلىدە اشىلىپ وتىرعان «ەلەكترومارگانەتس» جشس. بۇل كاسىپورىن مەتاللۋرگيا سالاسىنداعى عىلىمي جەتىستىكتەردى وندىرىسكە ەنگىزىپ وتىرعان ايتۋلى نىسان.
«بۇگىن اشىلىپ وتىرعان «ەلەكترومارگانەتس» جاۋاپكەرشىلىگى شەكتەۋلى سەرىكتەستىگىنىڭ تەمىردى تىكەلەي قايتا قالپىنا كەلتىرەتىن زاۋىتى تەكەلى قالاسىنىڭ عانا ەمەس, تۇتاس وبلىستىڭ الەۋمەتتىك-ەكونوميكالىق دامۋىنا جاڭا سەرپىن بەرەدى دەپ ويلايمىن. ءوندىرىستىڭ ەكولوگيالىق جەتىستىگى - عىلىمي ىزدەنىستەر مەن زاماناۋي تەحنولوگيانى قابىستىرۋدىڭ قانداي تابىسقا جەتكىزەتىنىنىڭ ايقىن ايعاعى. ەل پرەزيدەنتىنىڭ الدىمىزعا قويعان باستى مىندەتتەرىنىڭ ءبىرى دە وسى. بۇل العاشقى قارلىعاشى دەسەك تە بولادى. كاسىپورىننىڭ بولاشاعى زور, الداعى جوسپارى اۋقىمدى. مۇندا ءبىرىنشى كەزەڭىندە 100 جاڭا جۇمىس ورنى اشىلدى, الدا جۇمىس ورنىن بۇدان ءارى كوبەيتىپ, كاسىپورىننىڭ قۋاتىن ارتتىرا ءتۇسۋ مەجەلەنىپ وتىر. وسىعان وراي جەرگىلىكتى وقۋ ورىندارىنا تەحنولوگتار دايىنداۋ, وڭىردەگى كوللەدجدەردە سالاعا قاجەتتى جاڭا ماماندىقتار اشۋ ماسەلەسىنىڭ دە وزەكتى ەكەنىن ايتۋ كەرەك. سوندىقتان ءبىز جاڭا كاسىپورىنداردى زاماناۋي, جوعارى تەحنولوگيالى قۇرال-جابدىقتارمەن جۇمىس ىستەي الاتىن, باسەكەگە قابىلەتتى ماماندارمەن قامتاماسىز ەتۋىمىز كەرەك», دەدى ب. يساباەۆ.
ءوز كەزەگىندە «گورنوە بيۋرو» جشس كومپانيالار توبىنىڭ ديرەكتورى, تەحنيكا عىلىمدارىنىڭ دوكتورى ابدرامان ەدىلباەۆ كاسىپورىننىڭ ەرەكشەلىكتەرىنە توقتالدى. ونىڭ ايتۋىنشا, تاجىريبەلىك-ونەركاسىپتىك قوندىرعىلار الەمدىك ونەركاسىپتىڭ جاڭا تالاپتارىنا ساي كەلەتىن, ەكولوگيالىق تازا وندىرىسكە كوشۋگە جاڭا سەرپىن بەرەتىن, تەمىردى تىكەلەي قالپىنا كەلتىرەتىن تەحنولوگيا ەنگىزىلگەن قازاقستانداعى العاشقى كاسىپورىن. وندىرىستە وتاندىق كونتسەنتراتتار, كەن مەن كومىر قولدانىلادى, ال وندىرىلگەن ونىمگە سۇرانىس جوعارى. قازىر ەۋروپا, قحر, تۇركيا, رەسەي ەلدەرىمەن كەلىسىمدەر ءجۇرىپ جاتىر. مۇنداي ءونىم الەمدىك نارىققا تۇڭعىش رەت شىعارىلماق. سوندىقتان نارىقتاعى ءوز ورنىن بەكىتىپ, ماركاسىن تانىتۋ اسا قاجەت ءىس. جاھاندىق باسەكەلەستىكتەگى ەڭ ماڭىزدىسى – ساپا, سوندىقتان ءوندىرىس بارىسىندا ساپاعا ەرەكشە ەكپىن تۇسىرىلەدى.
«الداعى ۋاقىتتا قولدانىلىپ وتىرعان تەحنولوگيامىزدى ودان ءارى دامىتۋعا, تۇراقتى جۇمىس ورىندارىن ۇلعايتا وتىرىپ, قۋاتتىلىعى جوعارى تاجىريبەلىك-ونەركاسىپتىك قوندىرعىلاردىڭ قولدانىس اياسىن كەڭەيتۋگە, وسىلايشا تەكەلىنىڭ, جالپى وتاندىق مەتاللۋرگيانىڭ ەلدىڭ الەۋمەتتىك-ەكونوميكالىق دامۋىنا ءوز ۇلەسىن قوسۋىنا اتسالىسۋعا نيەتتىمىز. جالپى الەمدە دومەندىك ءوندىرىس تەحنولوگياسىن قولداناتىن شامامەن 3500 كاسىپورىن جانە تەمىردى تىكەلەي قالپىنا كەلتىرۋ تەحنولوگياسىن قولداناتىن 30-داي كاسىپورىن بار ەكەنىن اتاپ وتكىم كەلەدى. ەندى بۇل تەحنولوگيا, مىنە, ءبىزدىڭ ەلىمىزدە دە ەنگىزىلىپ وتىر», دەدى ا. ەدىلباەۆ.
سول سياقتى ول تىكەلەي قالپىنا كەلتىرۋ مەن دومەندىك ءوندىرىس ءبىر-بىرىمەن جاقسى ۇيلەسەتىنىن ايتتى. بۇل تۇراقتى ىسكە قوسىلعاننان كەيىن تەكەلى تاۋ-كەن وڭدەۋ كەشەنىمەن ءوزارا بىرلەسىپ جۇمىس ىستەۋگە, سونداي-اق ونى شيكىزاتپەن قامتاماسىز ەتۋ جاعىنان جاقسى مۇمكىندىكتەرگە جول اشپاق.
كادر دايىنداۋ ماسەلەسىنە كەلسەك, كاسىپورىن باسشىلىعى رف يركۋتسك وبلىسىنداعى وسىنداي كاسىپورىننىڭ ماماندارىن تارتا وتىرىپ, بىرنەشە اي بويى زاۋىت قىزمەتكەرلەرىن وقىتقان, تەحمينيمۋم, وندىرىستەگى قاۋىپسىزدىك بويىنشا, جاڭا تەحنولوگيانى قولدانۋ نەگىزدەرى مەن مۇمكىندىكتەرى جونىندە لەكتسيالار ۇيىمداستىرعان.
زاۋىتتىڭ سالتاناتتى اشىلۋىندا ىسكە قوسۋدىڭ سيمۆولدىق نۇكتەسى باسىلىپ, كەلۋشىلەر زاۋىتتىڭ ىشكى جۇمىستارىمەن تانىستى.
ەسكە سالساق, بەيبىت يساباەۆتىڭ تەكەلى قالاسىنا جاساعان جۇمىس ساپارى جەكە ازاماتتاردى قابىلداۋ, مونوقالا حالقىمەن كەزدەسۋ ءىس-شارالارىمەن جالعاستى.
اتاپ وتسەك, مونوقالادا قۇرىلىس ماتەريالدارى (قۇرىلىسقا ارنالعان قۇرعاق قوسپالار, بورديۋر, بەتون بۇيىمدار), اشىتقى, تاۋريت, ءسۇت ونىمدەرى جانە باسقا دا تاۋارلار وندىرىلەدى.
