اقىنىن ارداقتاعان اتىراۋ

مۇنىڭ مىسالىن جۇرەگى شىرىلداپ، شىندىقتى ايتاتىن، ءار قا­­زاقتى ەمەس، بار قازاقتى باۋىرى­نا تارتىپ، پوەزياداعى وزىندىك ور­نە­گىمەن 80 جاستىڭ سەڭگىرىنە كو­تەرىلگەن قازاقستاننىڭ ەڭبەك ەرى مۇحتار شاحانوۆتىڭ «سالەم، ۇلى جايىعىم!» دەپ اتىراۋعا كەلگەنىنەن اڭعارۋعا بولادى. اقىندى ءوڭىر اكىمى سەرىك شاپكەنوۆ ارنايى شاقىر­دى. قالامگەردىڭ مەرەيتويىنا وراي ماحامبەت اتىنداعى وبلىستىق اكا­دە­ميا­لىق قازاق دراما تەاترىندا «عاسىر­دىڭ عالامات اقىنى» اتتى پوە­زيا كەشى ءوتتى.

تەاتر فويەسىندە جىر جامپوزى­نىڭ كىتاپتارى مەن قايراتكەردىڭ شىعارماشىلىعى تۋرالى زەرتتەۋ ماقالالار توپتاستىرىلعان كورمە ۇيىمداستىرىلدى. پوەزيا كەشىن ونەر ورداسىنىڭ ارتىستەرى قالامگەردىڭ جىرلارىنان قۇرالعان «سالەم، ۇلى جايىعىم!» اتتى تەاترلاندىرىلعان پرولوگپەن اشتى. بۇدان سوڭ وبلىس اكىمى سەرىك شاپكەنوۆ مەرەيتوي يەسىن قۇتتىقتاپ، بەرەكەلى عۇمىر مەن شىعارماشىلىق شابىت تىلەدى.

– ءبىز جۇرەك قىلىن شەرتەر جىرلارىن قازاق حالقى جاتقا بىلەتىن اقىن، جەلتوقسان جىلناماسىنان رومان-ەپوپەيا جازعان جازۋشى، اندەرىن بارشا جۇرت شىرقاعان كومپوزي­تور، قازاق ءتىلىنىڭ قامى ءۇشىن شىبىن جانىن شۇبەرەككە تۇيە كۇرەسكەن قايراتكەر مۇحتار شاحانوۆپەن كەز­دەسىپ وتىرمىز. مەملەكەت باسشىسى قاسىم-جومارت توقاەۆ ۇلتتىق قۇ­رىلتايدىڭ العاشقى وتىرىسىندا مۇحيتقا قۇياتىن اساۋ وزەن ارناسىنداي تابيعات سىيعا بەرگەن بار تالانتىن، ازاماتتىق اسىل قاسيەتىن جوعارى باعالاپ، «بۇل كىسى – وتە ادال، شىنشىل، ۇلتجاندى ادام. مەن مۇحتار شاحانوۆقا قازاقستاننىڭ ەڭبەك ەرى اتاعىن بەرۋ تۋرالى جارلىققا قول قويدىم» دەپ جوعارى باعا بەردى. بۇدان ارتىق قانداي باعا بەرۋگە بولادى؟ جىر سۇيگەن، ءسوز قادىرىن تۇسىنگەن اتىراۋ جۇرتشىلىعىنىڭ اتىنان اقىن اعامىزدىڭ بيىگىمەن ءسۇيسىندىرىپ، تەرەڭدىگىمەن ويلاندىرىپ، ورتامىزدا ءاردايىم امان جۇرۋىنە تىلەكشىمىن، – دەدى سەرىك شاپكەنوۆ.

اتىراۋلىقتار مۇحتار شاحا­نوۆتى وسى ءوڭىردىڭ ءتول پەرزەنتىندەي قۇرمەتتەيدى. اقىننىڭ بار جىرىن جاتقا ايتىپ، اندەرىن شىرقاپ، ونىمەن ءبىر تۋعان باۋىرىنداي، اراسىنان قىل وتپەس دوسىنداي سىرلاسۋعا اسىعىپ تۇراتىندار كوپ. سول سەبەپتى ءوڭىر جۇرتشىلىعى پوەزيا كەشىندە اقىننىڭ جىرلارى مەن اندەرىن ۇيىپ تىڭداپ، مەرەيتوي يەسىنە قوشەمەت كورسەتتى.

«سالەم، ۇلى جايىعىم!

تولقىنىڭا كىم سالمادى قايىعىن،

كىم شەرتپەدى ساعان

كەلىپ شاتتىعىن،

كىم جۋمادى ساعان كەلىپ ايىبىن»،

دەپ كۇندەي كۇركىرەپ، نايزاعايداي جار­قىلداپ جىر وقيتىن اقىن­نىڭ ­تۋىن­دىلارىنان الداسپان ماحام­بەتتىڭ رۋحىنا، كوسىلە اققان جايىق وزەنىنە ىڭكارلىگى انىق اڭعا­رىلادى.

ءوزىن قاۋمالاعان قالىڭ وقىر­ما­نىن قاراپايىمدىلىعىمەن باۋ­راپ، پاڭدىعىمەن ەمەس، پاراسات­تى­لىعىمەن شوقتىعى بيىكتەگەن اقىن مۇحتار شاحانوۆ اتىراۋ جۇرت­شى­لىعىنا جىبەككە تىزگەن لاعىل مون­شاقتاي اقجارما العىسىن ءبىلدىردى.

اتىراۋ وبلىسى