اقپاراتتىق دەرەكقور جەتىلدىرىلمەك

ەسەپ كوميتەتىندە سىرتقى مەملەكەتتىك قارجى باقىلاۋ ورگاندارى ۇيلەستىرۋ كەڭەسىنىڭ كەزەكتى وتىرىسى ءوتتى. وندا مەملەكەتتىك قارجىلىق باقىلاۋدىڭ ءتيىمدى جۇيەسىن قۇرۋ بويىنشا جۇرگىزىلەتىن جۇمىستاردىڭ ساپالى ورىندالۋى ءۇشىن قابىلداناتىن شەشىمدەر تالقىلاندى. كەڭەس جۇمىسىنا قارجى مينيسترلىگى وكىل­دەرى, استانا جانە الماتى قالالارى تەكسەرۋ كوميس­سيالارىنىڭ توراعالارى قاتىستى. مەملەكەتتىك قارجىلىق باقىلاۋدىڭ حالىقارالىق وزىق تاجىريبەسىن قولدانۋ تۋرالى ەلباسى تاپسىرماسىنا وراي, مەملەكەتتىك ءاۋديتتى ەنگىزۋدىڭ تۇجىرىمداماسى بەكىتىلگەن بولاتىن. كەڭەس وتىرىسىنا قاتىسقان وبلىستىق كوميتەت باسشىلارىنا سول تۇجىرىمدامانىڭ پرينتسيپتەرى مەن تاسىلدەرىن ءارى قاراي دامىتۋ ماسەلەلەرى ءتۇسىندىرىلدى. سىرتقى مەملەكەتتىك قارجى باقىلاۋ ورگاندارى انىقتايتىن زاڭناما كەمشىلىكتەرى مەن بۇزۋشىلىقتارىنا مونيتورينگ جۇرگىزۋ, باقىلاۋ نىساندارى بويىنشا بىرىڭعاي اقپاراتتىق دەرەكقوردى جەتىلدىرۋ جايى تالقىلاندى. جالپى, تەكسەرۋدىڭ قايتالانۋىن ازايتۋ, تەكسەرىس بارىسىندا تەك تاۋەكەل دارەجەسى جوعارى نىسانداردى عانا قاراستىرۋ جايى ءسوز بولدى. بۇل ءۇشىن باقىلاۋ نىساندارى بويىنشا بۇرىننان جۇمىس اتقارىپ كەلە جاتقان بىرىڭعاي اقپاراتتىق دەرەكقوردى جيناپ, سونىڭ نەگىزىندە مەملەكەتتىك اۋديت جۇرگىزۋ ەنگىزىلمەك. دەرەكقور نەگىزىندە ساراپتاما جۇرگىزىلىپ, تەكسەرىلۋگە مىندەتتى تاۋەكەل دارەجەسى جوعارى وبەكتىلەر نىساناعا الىناتىن بولادى. ماسليحاتتارعا ەسەپ بەرەتىن, جەرگىلىكتى بيۋدجەتتىڭ اتقارىلۋىنا سىرتقى مەملەكەتتىك قارجى باقىلاۋدى جۇزەگە اسىراتىن تەكسەرۋ كوميسسيالارىنىڭ پروبلەمالى ماسەلەلەرى دە تالقىلاندى. ولاردىڭ باعدارلامالىق قۇجاتتاردى ىسكە اسىرۋعا بولىنگەن قاراجاتتى جەتكىلىكسىز قامتۋى, بۇزۋشىلىقتاردى انىقتاۋدىڭ تومەندىگى, بيۋدجەتكە وتەۋ كولەمىنىڭ ازدىعى جانە قىزمەتتى اۆتوماتتاندىرۋ دەڭگەيىنىڭ تومەندىگى اتاپ ءوتىلدى. تەكسەرۋ كوميسسيالارى قىزمەتكەرلەرى اراسىنداعى سىبايلاس جەمقورلىققا قارسى ءىس-ارەكەت ماسەلەلەرى دە ەرەكشە نازاردا بولدى. «الماتى جانە وڭتۇستىك قازاقستان تەكسەرۋ كوميسسيالارى قىزمەتكەرلەرى ىستەگەن سىبايلاس جەمقورلىق قۇقىقبۇزۋشىلىق فاكتىلەرى كەڭ قوعامدىق تالقىلاۋعا تۇرتكى بولدى», دەدى ەسەپ كوميتەتىنىڭ توراعاسى ق.جاڭبىرشين. ونىڭ پىكىرىنشە, بۇل وڭىرلەردەگى سىرتقى مەملەكەتتىك قارجى باقىلاۋ ورگاندارىنىڭ يميدجىنە نۇقسان كەلتىرەدى. ول تەكسەرۋ كوميسسيالارى توراعالارىنا قول استىنداعى قىزمەتكەرلەردىڭ ءىس-ارەكەتى ءۇشىن دەربەس جاۋاپ بەرەتىنىن, سونداي-اق سىبايلاس جەمقورلىق كورىنىستەرىنىڭ الدىن الۋعا باعىتتالعان ناقتى ءىس-شارالار قابىلداۋ قاجەتتىلىگىن اتاپ ءوتتى. ۆەنەرا تۇگەلباي, «ەگەمەن قازاقستان».