«بانك جانە ينۆەستيتسيا سالاسىنداعى جۋرناليستيكا» تاقىرىبىنداعى ترەنينگكە ەلىمىزدىڭ ءار وڭىرىنەن قارجى, ينۆەستيتسيا, ەكونوميكا تاقىرىبىن قاۋزاپ جۇرگەن 30-دان استام جۋرناليست جينالدى. ەكى كۇنگە سوزىلعان ترەنينگكە بانك وكىلدەرى, جۋرناليستەر, ساراپشىلار كەلىپ, بىلگەنىمەن ءبولىستى.
اتاپ ايتقاندا, ءىس-شارانىڭ العاشقى كۇنىندە قازاقستان قارجىگەرلەر قاۋىمداستىعى تۇتىنۋشىلار قۇقىقتارىن قورعاۋ جونىندەگى ديرەكتورى ءلاززات ۇسەنبەكوۆا, Jusan ينۆەست كورپوراتيۆتىك قارجى دەپارتامەنتىنىڭ ۆيتسە-پرەزيدەنتى ايا الدابەرگەنوۆا, Jusan ينۆەست ءىرى كليەنتتەرمەن جۇمىس دەپارتامەنتىنىڭ ۆيتسە-پرەزيدەنتى ايگەرىم مولدابەكوۆا جانە Forbes Kazakhstan جۋرنالى قازاق نۇسقاسىنىڭ باس رەداكتورى باقىتجان بۇقارباي ارنايى ءدارىس وقىسا, ەكىنشى كۇندە Jusan analytics رەداكتورى ايبوتا جاپپاربەرگەن, ۇلتتىق بانكتىڭ اقپارات جانە كوممۋنيكاتسيالار دەپارتامەنتىنىڭ ديرەكتورى اسان احمەتجان جانە Lsm.kz باس رەداكتورى اينۇر كارگالينوۆا تىڭ اقپاراتتاردى الۋ, قارجى تاقىرىبىنداعى ماتەريالداردى جازۋدىڭ قىر-سىرىن ۇيرەتتى.
«قارجىنىڭ كۇندەلىكتى ومىردە قانشالىقتى ماڭىزدى ەكەنى, ونىڭ ءاربىر وتانداسىمىزدىڭ ءومىر ءسۇرۋ دەڭگەيىنە قالاي ىقپال ەتەتىنى بارىمىزگە ءمالىم. دەگەنمەن ءوز قارجىسىن دۇرىس پايدالانىپ, اقشانى تەك جۇمساپ قانا قويماي, ونى ساقتاپ, كوبەيتۋ جولدارىن كەز كەلگەن ادام بىلە بەرمەيدى. قارجى قۇرالدارى تۋرالى اقپاراتتى قاراپايىم تىلمەن حالىققا ءتۇسىندىرىپ, دۇرىس باعىت بەرۋدە جۋرناليستەرمەن بىرگە جۇمىس ىستەيتىن بولساق, ءاربىر قازاقستاندىق ءوز قارجىسىن ەسەلەي تۇسەتىنىنە كامىل سەنەمىن. جۋرناليستەردى حالىق پەن بيزنەس اراسىن جالعاپ تۇرعان التىن كوپىر دەپ بىلەمىن», دەدى «Jusan Bank» اق باسقارما توراعاسى نۇرداۋلەت ايدوسوۆ.
