اۋداننىڭ كاسىپكەرلىك جانە اۋىل شارۋاشىلىعى ءبولىمىنىڭ باسشىسى دينارا دوسانوۆانىڭ مالىمەتىنشە, كارتوپ ەگىستىكتەرىنىڭ 81 پايىزى جينالىپ, گەكتارىنان ورتا ەسەپپەن 330 تسەنتنەر ءونىم تۇسۋدە. قازىردىڭ وزىندە 128,7 مىڭ توننا كارتوپ جينالعان. ال كوكونىستەردىڭ 88 پايىزى الىنىپ ۇلگەردى. سونداي-اق بيىل جەرگىلىكتى شارۋالار العاشقى قار تۇسكەندە 13 مىڭ گەكتاردان مايلى داقىلداردى ورادى.
– ءبىزدىڭ ءوڭىر ساپالى كارتوپ جانە كوكونىس تۇرلەرىمەن تانىمال. كارتوپ وسىرۋمەن نەگىزىنەن «انداس» شق, «اسحات» شق, «اgroCult» جشس, «ماياك» شق, «زاريا» شق, «رودنيك» شق, «اگروسويۋز» فق سياقتى ءىرى شارۋاشىلىقتار اينالىسادى. ونىمدىلىك وتكەن جىلدىڭ دەڭگەيىندە ساقتالىپ وتىر. سوڭعى جىلدارى سۋارمالى تاناپتاردىڭ ۇلەسى ارتىپ, بۇگىندە اۋدان بويىنشا 15 مىڭ گەكتاردى قۇرادى. سۋارمالى جەرلەردە نەگىزىنەن كارتوپ پەن كوكونىستەر, سونداي-اق جەمشوپ وسىرىلەدى. جيىن-تەرىم ناۋقانىنا ءوڭىر بويىنشا 2 565 بىرلىك اۋىلشارۋاشىلىق تەحنيكاسى جۇمىلدىرىلدى. اۋداندا ەگىنشىلىكپەن جالپى سانى 158 شارۋاشىلىق اينالىسادى. نەگىزى وراق كەزەڭىنەن كۇتىلگەن جوسپارلار ءوز مەجەسىنە جەتۋدە. ديقاندارىمىز جەتكىلىكتى كولەمدە استىق پەن كوكونىس, كارتوپ جينايدى, – دەيدى ءبولىم جەتەكشىسى.
ايتىپ وتەيىك, بيىل «پاۆلودار» اكك» اق-نىڭ يەلىگىندەگى تۇراقتاندىرۋ قورىنا اتالعان ءوڭىردىڭ كوكونىس وسىرۋشىلەرى جىلداعىداي ارزان باعاعا كارتوپ پەن كوكونىس تۇرلەرىن تاپسىرادى. قىسقى ۋاقىتقا ساقتالاتىن ونىمدەر بويىنشا قازىردىڭ وزىندە «انداس» شارۋا قوجالىعى 200 توننا ءسابىز بەن 1 مىڭ توننا كارتوپ, ال «رودنيك» شارۋا قوجالىعى 50 توننا پياز بەن 50 توننا قىرىققابات جەتكىزۋگە مەموراندۋم جاساستى.
جالپى, بيىل ەرتىس وزەنى بويىنداعى فەرمەرلەر قىرىققابات پەن پياز تاناپتارىن كەڭەيتىپ, ناتيجەسىندە ءوڭىرىمىز كوكونىس تۇرلەرىمەن بارىنشا قامتاماسىز ەتىلەدى دەپ كۇتىلۋدە. جىل باسىندا وبلىس باسشىلىعى جەرگىلىكتى دۇكەن سورەلەرىن قىستا ءوزىمىزدىڭ قىرىققاباتپەن قامتۋ تۋرالى تاپسىرما بەرگەن. وتكەن قىس پەن كوكتەم ايلارىندا وڭتۇستىكتەن جەتكىزىلەتىن كوكونىستىڭ تىم قىمبات ەكەندىگىن تۇرعىندار بىرنەشە مارتە ماسەلە ەتىپ كوتەرىپ, جەرگىلىكتى شەنەۋنىكتەر بۇل تۇيتكىلدى شەشۋگە ۋادە ەتكەن ەدى.
وبلىس اكىمىنىڭ ورىنباسارى مەيرام وتەشوۆ بيىل شامامەن 14 مىڭ توننا قىرىققابات جينالاتىنىن, بۇل بىلتىرعىدان 48 پايىزعا كوپ ەكەنىن, ال پياز 6 مىڭ تونناداي بولىپ قالاتىنىن ايتادى. ناتيجەسىندە, پياز بويىنشا جەرگىلىكتى سۇرانىستىڭ 84 پايىزى, قىرىققابات بويىنشا 50 پايىزى وتەلمەك.
پاۆلودار اۋدانىندا جاڭادان كوكونىس ساقتاۋ قويمالارىن سالۋ ءۇردىسى دە جاقسى ساقتالىپ وتىر. وبلىستاعى قويمالاردىڭ ۇشتەن ءبىرى وسى وڭىرگە تيەسىلى. چەرنوياركا القابىنداعى سۋارمالى جەرلەردىڭ ءونىمى قىسقى ۋاقىتقا ساقتاۋعا جارامسىز بولعاندىقتان وندا جينالىپ جاتقان كوكونىس پەن كارتوپ نەگىزىنەن ەگىس باسىنان كوتەرمە باعادا ساتىلىپ كەتەدى.
پاۆلودار وبلىسى
