بۇل وقيعالار ساياسي عانا ەمەس, حالىقتىڭ الەۋمەتتىك جانە ەكونوميكالىق جاعدايىنا تىكەلەي اسەر ەتىپ جاتقانىن بايقايمىز. ەۋرازيا كونتينگەنتىندەگى سوڭعى وقيعالار ءبىلىم جانە عىلىم سالاسىن دا سىرت اينالىپ وتپەيدى. سەبەبى ەلدىڭ تۇراقتىلىعى بارلىق سالانىڭ دامۋىنا تىكەلەي اسەر ەتەدى.
«مەن بيىلعى كۇزدە كەزەكتەن تىس پرەزيدەنت سايلاۋىن وتكىزۋدى ۇسىنامىن. ادىلەتتى قازاقستاندى قۇرۋ جولىندا تۇبەگەيلى جانە جان-جاقتى رەفورمالاردى تابىستى جۇزەگە اسىرۋ ءۇشىن حالىقتىڭ جاڭا سەنىم مانداتى قاجەت. مەن ءۇشىن مەملەكەت مۇددەسى بارىنەن بيىك. سوندىقتان مەن وكىلەتتىك مەرزىمىمدى قىسقارتۋعا جانە كەزەكتەن تىس پرەزيدەنت سايلاۋىنا بارۋعا دايىنمىن», دەدى مەملەكەت باسشىسى 1 قىركۇيەكتەگى جولداۋىندا.
وسى ورايدا ەلىمىزدە 20 قاراشاعا جوسپارلانعان پرەزيدەنت سايلاۋىن ەۋرازيا ايماعىندا قالىپتاسىپ جاتقان جاڭا جۇيەنىڭ باستاۋى دەپ قابىلداۋعا بولادى. سەبەبى سوڭعى وقيعالاردىڭ سالدارى قازىردىڭ وزىندە بىلىنە باستادى. ەۋرازيا, ونىڭ ىشىندە ورتالىق ازيا ايماعى جاڭا كەزەڭگە اياق باستى. ەڭ الدىمەن, ساياسي رەفورمالار اۋاداي قاجەت. بۇرىنعى ەرەجە مەن ءتارتىپ كەلمەسكە كەتتى. 20 قاراشادان كەيىن ساياسي ارەنادا بىرنەشە مەرزىمگە سوزىلاتىن پرەزيدەنتتىك جۇيە دە ەسكىنىڭ قاتارىندا قالماق.
تاعى ءبىر ايتا كەتەرلىگى, بيىلعى سايلاۋدىڭ باستى ەرەكشەلىگى بار. ءبىرىنشى رەت پرەزيدەنت ءبىر مەرزىمگە 7 جىلعا سايلانباق. بۇل ەلدەگى بيلىكتىڭ مونوپوليالانۋىنا جول بەرمەيدى. وسىلايشا, دەموكراتيالىق قۇندىلىقتار ورنىعا تۇسەدى. جالپى, مۇنداي تاجىريبە الەمدە بار ەكەنىن ايتا كەتكەن ءجون.
ەلىمىزدە بىرنەشە جىل بۇرىن قولعا الىنعان ساياسي رەفورمانىڭ تاريحي تالداۋى مەن باعاسى بولاشاقتىڭ ەنشىسىندە. بۇل تاقىرىپتا ساياساتتانۋشى عالىمدار مەن زەرتتەۋشىلەردىڭ ەڭبەكتەرى قاجەت. ەلىمىزدەگى ساياسي وقيعالار وتاندىق عالىمداردىڭ عانا ەمەس, تمد جانە ورتالىق ازيا ەلدەرىن زەرتتەپ جۇرگەن حالىقارالىق عىلىمي قوعامداستىقتىڭ دا قىزىعۋشىلىعىن تۋدىراتىنى انىق.
ساياسي مودەرنيزاتسيا ۋاقىت تالابى عانا ەمەس, مەملەكەت تۇراقتىلىعى مەن دامۋى ءۇشىن باستى قاجەتتىلىككە اينالدى.
لاۋرا قاراباسوۆا,
ق.جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ رەكتورى
