سالتاناتتى ءىس-شارادا ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى مۇراتقان داۋىلباەۆ ءسوز الىپ, سەنات دەپۋتاتى باقىتجان جۇماعۇلوۆتىڭ قۇتتىقتاۋ حاتىن وقىدى. ودان كەيىن كورنەكتى عالىم نازارباي بىليەۆ, ۇلتتىق عىلىم اكادەمياسىنىڭ اكادەميگى مۇحتارباي وتەلباەۆ, اباي اتىنداعى قازاق ۇلتتىق ۋنيۆەرسيتەتىنىڭ ءبىرىنشى پرورەكتورى ماقتاعالي بەكتەمىسوۆ ءسوز الىپ, قۇلجاباي ابدىقالىق ۇلىنىڭ مەملەكەتشىل پەرزەنت بولعانىن, ومىردەن وتسە دە, سوڭىندا ايتا جۇرەتىن شەجىرەگە اينالعان كوپ سىرلارى, عاجايىپ ىستەرى قالعانىن اڭگىمەلەدى.
ءوز كەزەگىندە ايگىلى ماتەماتيكتىڭ جۇبايى باتيما چاساكباي بولاشاق ۇرپاق ءۇشىن ەمىرەنە ەڭبەك ەتكەن اسىل جان ماڭگى ۇمىتىلمايتىنىن ءسوز ەتىپ, ۇلتىن شەكسىز سۇيگەن ازاماتتىڭ ومىرىنەن تەبىرەنىستى ەستەلىكتەر ايتتى. ءسوز سوڭىندا مەكتەپ اتىن بەرۋگە مۇرىندىق بولعان جاندارعا العىسىن ءبىلدىردى.
جيىن سوڭىندا قۇلجاباي قاسىموۆ اتىنداعى №28 IT مەكتەپ-ليتسەيىنىڭ ماڭدايشاسى سالتاناتتى تۇردە اشىلىپ, قوناقتار ءبىلىم ورداسىنىڭ ءىشىن ارالادى.
ايتا كەتەيىك, قۇلجاباي ابدىقالىق ۇلى 1935 جىلى 25 قىرقۇيەكتە بۇرىنعى تالدىقورعان وبلىسىنىڭ كوكسۋ اۋدانىنىڭ تالاپتى اۋىلىندا تۋعان. ەڭبەكقور جان ديففەرەنتسيالدىق تەڭدەۋلەر سالاسىندا ماتەماتيكالىق مەكتەپ قۇرىپ, ۇجىمنىڭ عىلىمي جۇمىسىنا باسشىلىق جاساعان. سينگۋليارلى اۋىتقىعان تەڭدەۋلەردىڭ, اسيمپتوتيكالىق تەوريانىڭ ايگىلى مامانى رەتىندە الەم عالىمدارىنا تانىلدى. تانىمال ماتەماتيك 3 دوكتورلىق, 50-دەن استام كانديداتتىق ديسسەرتاتسياعا جەتەكشىلىك ەتكەن.
جەتىسۋ وبلىسى
