«وتاندى ءسۇيۋ وسىنداي ادال ەڭبەكتەن, پايدالى جۇمىستان باستالادى. ەلىمىزدىڭ ءاربىر ازاماتى ەڭبەكقور بولۋى كەرەك. بارشاڭىزدى قولدايمىن, ماقتان تۇتامىن. وسكەلەڭ ۇرپاق – ءبىزدىڭ ءۇمىتىمىز, ەلىمىزدىڭ بولاشاعى. ءبىز ارداگەر بولىپ ماڭگى بيلىكتە وتىرمايمىز. مەنىڭ ەڭ ۇلكەن ماقساتىم – جاستارعا جول بەرۋ», دەدى پرەزيدەنت تۇركىستان جاستارىنا. بۇگىندە مەملەكەت باسشىسىنىڭ وسى ءبىر وسيەتتى سوزدەرى ءبىزدىڭ ۋنيۆەرسيتەت ستۋدەنتتەرى اراسىندا ءجيى قايتالانىپ ايتىلۋدا. ياعني وتاندى ءسۇيۋ ادال ەڭبەكتەن باستالاتىنى جاستار جادىندا جاتتالىپ قالدى.
كۇللى تۇركى حالىقتارىنا ورتاق, الەمگە ايگىلى عۇلاما, فيلوسوف قوجا احمەت ياساۋي ءومىر سۇرگەن تۇركى الەمىنىڭ بىرلىگى مەن ىنتىماقتاستىعىنىڭ بەلگىسى جانە ۋنيۆەرسيتەتىمىز ورنالاسقان تۇركىستان قالاسى تۇركى الەمىنىڭ رۋحاني استانالارىنىڭ ءبىرى بولىپ سانالادى. بۇل ورايدا مەملەكەت باسشىسى كيەلى جەرگە كەشەگى ساپارىندا قازاق جىلناماسىنا التىن ارىپپەن جازىلعان كوپتەگەن تۇلعامىزدىڭ وسىندا جەرلەنگەنىنە توقتالىپ, بىلتىر قالاعا تۇركى الەمىنىڭ رۋحاني استاناسى دەگەن مارتەبە بەرىلگەنىن ايتتى. پرەزيدەنتتىڭ پىكىرىنشە, بۇل وقيعا تۇركىستاندى تۇتاس تۇركى جۇرتى ەرەكشە قادىرلەيدى دەگەندى بىلدىرەدى. ء«بىز كيەلى شاھاردى رۋحاني جانە تاريحي ەلوردامىز دەسەك, دۇرىس پايىم بولاتىنىنا كۇمانىم جوق. سوندىقتان ۇكىمەت تاياۋ ارادا تۇركىستان قالاسىنا وسىنداي مارتەبە بەرۋ ماسەلەسىنە قاتىستى لايىقتى شەشىم قابىلدايدى دەپ ويلايمىن. قاستەرلى شاھار كونە زاماننان بەرى ۇلتتىڭ ۇياسى, قازاقتىڭ قارا شاڭىراعى بولىپ كەلەدى. تۇركىستان وسى مارتەبەلى مىندەتىن قازىر دە ابىرويمەن اتقارىپ وتىر. سول سەبەپتى, مەن اتا جولىن ۇستانىپ, ۇلتتىق قۇرىلتايدىڭ كەلەسى وتىرىسىن تۇركىستاندا وتكىزۋدى ۇسىندىم. وندا ەل بولاشاعىنا قاتىستى وزەكتى ماسەلەلەردى تالقىلايمىز», دەدى قاسىم-جومارت توقاەۆ. بۇگىندە ءوڭىر جاستارى ۇلتتىق قۇرىلتايدىڭ كيەلى قالادا وتكىزىلۋىن ۇلكەن مارتەبە سانايدى. سونداي-اق مەملەكەت باسشىسى ايتقان رەفورمالاردىڭ جۇزەگە اسىرىلۋىنا بەلسەندى اتسالىسپاق. بۇل ورايدا ستۋدەنتتەرىمىز اسا ماڭىزدى رەفورمالاردىڭ ءبىرى – پرەزيدەنتتىڭ ءبىر عانا مەرزىمگە سايلانۋىن قولداپ وتىر. بۇل وزگەرىس جاستار تاراپىنان دەموكراتيا جولىنداعى باتىل قادام رەتىندە باعالانۋدا. سوندىقتان دا الداعى سايلاۋ ناۋقانىنا بەلسەنە قاتىسىپ, ءوز تاڭداۋىن جاساۋعا نيەتتى.
جانار تەمىربەكوۆا,
ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ رەكتورى
تۇركىستان
