احمەت بايتۇرسىن ۇلى • 01 قازان، 2022

تورعايدا احمەت بايتۇرسىن ۇلىنىڭ تويى ءوتىپ جاتىر

151 رەت كورسەتىلدى

قارت تورعايدا ۇلت ۇستازى احمەت بايتۇرسىن ۇلىنىڭ 150 جىلدىعىنا ارنالعان مەرەكەلىك ءىس-شارالار باستالدى. ءدۇبىرلى تويعا ارنايى كەلگەن پارلامەنت سەناتىنىڭ توراعاسى ماۋلەن اشىمباەۆ الاشتىڭ قوس الىبى احمەت بايتۇرسىن ۇلى مەن مىرجاقىپ دۋلات ۇلى ەسكەرتكىشىنىڭ سالتاناتتى اشىلۋ راسىمىندە قۇتتىقتاۋ ءسوز سويلەدى، دەپ حابارلايدى Egemen.kz.

«قۇرمەتتى قاۋىم، قادىرلى تورعايلىقتار! الدىمەن بارشاڭىزدى ۇلت ۇستازى احمەت بايتۇرسىن ۇلىنىڭ 150 جىلدىق مەرەيتويىمەن شىن جۇرەكتەن قۇتتىقتايمىن! جالپى، احاڭ تۋرالى ايتقاندا، ونىڭ قايراتكەرلىگى مەن قالامگەرلىگى قاتار ەسكە تۇسەدى. ...ۇلت ۇستازى قازاق حالقىنىڭ زامان كوشىنەن قالماۋىن قالادى جانە وسى ماقساتقا بۇكىل ءومىرىن ارنادى. سوندىقتان حالىق ءۇشىن ءومىرىن قيعان احاڭداي ارىسىمىزدى ۇلىقتاپ، مۇراسىن دارىپتەۋ، ەڭبەگىن ناسيحاتتاۋ – بار قازاقتىڭ مىندەتى دەسەك ارتىق بولا قويماس.  بيىل وسى مەرەيتوي اياسىندا اۋقىمدى جۇمىستار اتقارىلىپ جاتىر. كوپتەگەن ەلدى مەكەندەرگە، كوشەلەرگە، نىساندارعا احمەت بايتۇرسىن ۇلىنىڭ ەسىمى بەرىلدى. احاڭنىڭ كىندىك قانى تامعان سارىتۇبەكتە كەسەنەسى تۇرعىزىلدى. ال ءدال قازىر اشىلىپ جاتقان ەسكەرتكىشتىڭ احاڭ مەن جاحاڭا ارنالۋىندا ۇلكەن سيمۆوليكالىق ءمان بار. سەبەبى ەكى ارىسىمىز دا ۇلتتى وياتۋ جولىندا ەڭبەك ەتتى. وسى جولدا مىرجاقىپ دۋلات ۇلى «ويان، قازاق!» دەپ حالقىنىڭ ساناسىنا سىلكىنىس اكەلگەنى دە بارشامىزعا بەلگىلى. ءاليحان، احمەت، مىرجاقىپتار الاش قوزعالىسىنىڭ باسىندا جۇرگەن تۇلعالار. ولار تاۋەلسىزدىكتى اڭسادى. قازاقتى ازات ەل ەتۋگە ۇمتىلدى. احاڭ مەن الاشتىڭ بىرگە اتالۋى زاڭدىلىق. سوندىقتان بۇل ەسكەرتكىشتى بارشا الاش ارىستارىنىڭ رۋحىنا تاعزىم، سولارعا كورسەتىلگەن قۇرمەت دەپ قابىلداۋىمىز كەرەك. ەمكەرتكىشتىڭ  ­احمەت پەن مىرجاقىپقا ارنالۋىنىڭ تاعى ءبىر ماڭىزدى سەبەبى ­– قوس قايراتكەردىڭ دە وسى ءوڭىردىڭ تۋماسى بولۋىندا ەكەنى ءسوزسىز. جالپى، تورعاي ءوڭىرى احمەت پەن ماىرجاقىپتاي تالاي ارىستارىمىز شىققان قاستەرلى مەكەن. ۇلتىمىز ءۇشىن بۇل ولكەنىڭ ورنى بولەك. تورعايدىڭ حالقى ەشقاشان قازاقى قالپىن بۇزباعان، كەشەگى تار زاماننىڭ وزىندە ۇلتتىق بولمىسىنان اينىماعان. تورعاي – الاش رۋحىن تەربەتكەن ەلدىكتىڭ ەڭسەلى ورداسى. سوندىقتان بۇل ءوڭىردىڭ قادىر-قاسيەتى ەرەكشە. ءبىز مۇنى ءاردايىم ەستە ساقتاپ جۇرەمىز»، دەدى سەنات باسشىسى.

قوس الىپقا قويىلعان قولا ەسكەرتكىشتىڭ اشىلۋ راسىمىنەن كەيىن قوناقتار تورعايداعى احمەت پەن مىرجاقىپ مۇراجايىنا باس سۇقتى. بيىل ۇلت ۇستازىنىڭ مەرەيتويى اياسىندا بۇل مۋزەي 170 ملن تەڭگەگە باستان-اياق جوندەلىپ، ءىشى-سىرتى جاڭاردى. رەەكسپوزيتسيا جۇمىستارى جۇرگىزىلدى.  

بۇدان ءارى مەرەكەلىك شارا جانگەلدين اۋدانىنىڭ ورتالىعى تورعايدا جالعاستى. مۇندا بيىل احمەت پەن مىرجاقىپ مۇراجايى 170 ملن تەڭگەگە باستان-اياق جوندەلىپ، ءىشى-سىرتى جاڭاردى.

توي تۇستەن كەيىن احمەت بايتۇرسىن ۇلىنىڭ كىندىك قانى تامعان سارىتۇبەك قونىسى مەن اقكول اۋىلىندا جالعاستى.  مۇنداعى ءىس-شارا ارۋاقتارعا ءتاۋ ەتۋدەن باستالدى. احاڭنىڭ اتاقونىسى ­ - سارىتۇبەكتەگى قورىمدا ۇلت ۇستازىنىڭ اكەسى بايتۇرسىن مەن اعاسى قالي جەرلەنگەن. ولاردىڭ جانىنا بيىل حالىق بوپ قارجى جيىپ، احاڭا اق كەسەنە تۇرعىزىلدى.  

مەرەكەلىك ءىس-شارالار بارىسىندا قازىر تورعايدا ات بايگەسى مەن پالۋاندار بەلدەسۋى قىزىپ جاتىر. كەشكە ورتالىق ستاديوندا وبلىس ونەرپازدارىنىڭ كونتسەرتى باستالادى. وندا تەك احاڭنىڭ اندەرى عانا شىرقالادى.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار