قوعام • 01 قازان، 2022

ماۋلەنوۆ ءىسى: قارجى جىمقىرۋ دەرەگى رەيدەرلىك ارەكەت بولۋى مۇمكىن

110 رەت كورسەتىلدى

تاراز قالاسىندا مەملەكەت قارجىسىن جىمقىردى دەپ ايىپتالعان توعىز ايىپتالۋشىنىڭ تۋىستارى ولاردى كىناسىز دەپ ساناپ، بوساتۋدى تالاپ ەتۋدە، دەپ حابارلايدى Egemen.kz.

 

ايىپتالۋشىلار – جەرگىلىكتى ەنەرگيا ورتالىعىنىڭ بۇرىنعى قىزمەتكەرلەرى. ال تەمىر توردىڭ ارعى جاعىندا قاراپايىم ينجەنەرلەر مەن جۇمىسشىلار عانا ەمەس، ۇلىمەن بىرگە كومپانيانىڭ ەكس-پرەزيدەنتى دە وتىر.

«مەنىڭ بالام تۇرمەدە جاتقانىنا ءبىر جىلدان استى، سول جەردە ينسۋلت الدى. مەنىڭ نەمەرەم - 20 جاستاعى بالا دا تۇرمەدە وتىر، تەمىر توردىڭ ارعى بەتىندە وتىرعان ول ەكى رەت ءوز-وزىنە قول جۇمساماق بولعان. بالالارىمدى جىبەرىڭىزدەر، ولارعا كۇش كورسەتپەڭىزدەر! ولار ەشتەڭە ىستەمەدى، تىم بولماسا ۇيقاماققا شىعارسىن»، دەپ سۇرادى ماۋلەنوۆتەردىڭ اناسى جانار ىسقاقوۆا.

ەكى ميلليارد تەڭگەنى جىمقىرۋ ءىسى بويىنشا باستى ايىپتالۋشىلار – «تارازەنەرگوورتالىق» كومپانياسىنىڭ ەكس-پرەزيدەنتى باقبەرگەن ماۋلەنوۆ پەن ونىڭ ۇلى. ەكەۋى دە ءبىر جىلدان استام ۋاقىتتان بەرى قاماۋدا وتىر. كومپانيانىڭ ينجەنەرلەرى مەن جۇمىسشىلارى سىبايلاستارى بولىپ سانالادى، ولار ازىرگە بوستاندىقتا.

تەرگەۋشىلەردىڭ ايتۋىنشا، بۇكىل وبلىس ورتالىعىن ىستىق سۋمەن جانە جىلۋمەن قامتاماسىز ەتەتىن نىساندى جەكە مەنشىككە العان كاسىپكەرلەر مەملەكەت قارجىسىن ءوز قاجەتتىلىكتەرىنە جۇمساعان.

الايدا، ەكس-باسشىنىڭ ءوزى جامبىل وبلىسى اكىمدىگى ءبىر تەڭگە دە بەرمەگەنىن ايتادى، قىلمىستىق ءىستى كادىمگى رەيدەرلىك ارەكەت دەپ سانايدى.

«بۇل ءىستىڭ ارتىندا ۇلكەن كۇشتەر تۇر، ولار – وبلىستىڭ ەكس-شەنەۋنىكتەرى. مەن ۇستالعانعا دەيىن ولار جەو-عا كەلىپ، مەنى قورقىتپاق بولدى. ولاردىڭ تالابىنا ساي، مەن جەو-نى قايتارۋىم كەرەك. بىراق مەن ونى اۋكتسيونعا قويىلعان كەزدە، جەڭىپ الدىم. سوندىقتان ونى قايتارۋدان باس تارتتىم. ارتىنشا، مەنى «مەملەكەت قارجىسىن جىمقىردى» دەپ ايىپتادى. بىراق مەن ول جەردەن ءبىر تەڭگە دە العان جوقپىن، جاي عانا ينۆەستيتسيالادىم. ءتىپتى قازىر دەكلاراتسيالاپ جاتقان قارىزداردىڭ قايدان شىققانىن دا تۇسىنبەيمىن»، دەدى سوتتالۋشى باقبەرگەن ماۋلەنوۆ.

ب.ماۋلەنوۆتىڭ ادۆوكاتى عابيت پىرماعامبەتوۆتىڭ سوزىنە سەنسەك، بۇل قىلمىستىق ءىستىڭ رەيدەرلىك ارەكەت ەكەنىن راستايتىن قۇجاتتار دا بار.

«ماسەلەن، قارجىلىق مونيتورينگ اگەنتتىگىنىڭ وڭىردەگى تەرگەۋشىلەرى ءاۋ باستا جاپا شەگۋشى بولىپ سانالعان جامبىل وبلىسى اكىمدىگى قارجى باسقارماسىنا ەكى رەت ماۋلەنوۆتى ايىپتاۋ پاراعىن الىپ بارىپ، قول قويدىرۋعا تىرىسقان. ونىڭ العاشقىسىندا «جەو ەكس-باسشىسى 2 ملرد تەڭگە جىمقىردى» دەلىنسە، كەلەسىسىندە «4 ملرد تەڭگە جىمقىردى» دەپ جازىلعان. بۇل دەرەكتەردى قارجى باسقارماسىنىڭ وكىلى اسادوۆتىڭ ءوزى سوت پروتسەسى بارىسىندا راستادى. بىزدە ناقتى قۇجاتتارى بار»، دەدى زاڭگەر.

سوتتالۋشىنىڭ تۋىسارى الدەبىر كۇشتەردىڭ ىقپالىمەن باقبەرگەن ماۋلەنوۆ پەن ۇلىن قاماقتا ۇستاپ وتىرعانىنا سەنىمدى.

«ايتپەسە، ءدال وسى احۋالدا ايىپتالۋشىنى ءوزىن قورعاۋعا مۇمكىندىك بەرىلۋى كەرەك قوي. ەشقانداي مۇمكىندىك بەرىلىپ جاتقان جوق، ەڭ بولماسا ءۇي قاماققا شىعارسا دەيمىز. ءىستىڭ اق-قاراسىن ايىراتىن قۇزىرلى ورگان قىزمەتكەرلەرىنىڭ دە اۋىسقانىن قالايمىز. قازىرگى سوت تا، قارجىلىق مونيتورينگ اگەنتتىگىنىڭ تەرگەۋشىلەرى دە ءىستى ءادىل قاراپ وتىرعان جوق. ول ءسوزىمىزدى دە ەلەپ جاتقان ەشكىم جوق»، دەيدى ولار.

سوڭعى جاڭالىقتار

QazaqGaz ديرەكتورلار كەڭەسىنىڭ قۇرامى وزگەردى

قازاقستان • 02 جەلتوقسان، 2022

ماۋلەن اشىمباەۆ قىتاي حالقىنا كوڭىل ايتتى

پارلامەنت • 02 جەلتوقسان، 2022

ۇقساس جاڭالىقتار