قوعام • 01 قازان، 2022

تامارا دۇيسەنوۆا زەينەتكەرلەردى قارتتار كۇنىمەن قۇتتىقتادى

134 رەت كورسەتىلدى

ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا قازاقستاننىڭ بارلىق زەينەتكەرلەرىن قارتتار كۇنىمەن قۇتتىقتاپ، اعا ۇرپاق وكىلدەرىنە زور دەنساۋلىق، ۇزاق عۇمىر، بەيبىتشىلىك پەن اماندىق تىلەدى، دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.

«اسا قۇرمەتتى زەينەتكەرلەر، سىزدەردى شىن جۇرەكتەن قارتتار كۇنىمەن قۇتتىقتايمىن! اعا بۋىن وكىلدەرىمىز – ەلىمىزدىڭ التىن قورى، حالقىمىزدىڭ دانالىعى مەن ءداستۇرىن ساقتاۋشىلار، جاس ۇرپاققا ۇلگى كورسەتەتىن، ءوز ىستەرىنە بەرىك، اقىلشى داناگويلەرىمىز.

قارتتارعا قامقورلىق جاساۋ مەملەكەتىمىزدىڭ الەۋمەتتىك ساياساتىنىڭ نەگىزگى باعىتتارىنىڭ ءبىرى. جىل سايىن بازالىق جانە ىنتىماقتى زەينەتاقى مولشەرى ارتىپ كەلەدى. وسى ماقساتتارعا بيۋدجەتتەن 3 ترلن تەڭگە بولىنۋدە. بيىل زەينەتاقى تولەمدەرىن ەكى رەت يندەكستەۋ جۇرگىزىلدى»، دەدى ت. دۇيسەنوۆا.

سونىمەن قاتار مەملەكەت تاراپىنان زەينەتاقىمەن قامسىزداندىرۋ جۇيەسىن جەتىلدىرۋگە باعىتتالعان شارالار قابىلدانۋدا. مەملەكەت باسشىسىنىڭ قازاقستان حالقىنا جولداۋىندا ايتىلعان تاپسىرمالاردى ورىنداۋ ماقساتىندا، الەۋمەتتىك كودەكس جوباسى اياسىندا زەينەتاقى تولەمدەرىن ارتتىرۋ جولدارى كوزدەلگەن. بۇل شارالار 2025 جىلعا قاراي جيىنتىق زەينەتاقىنى ورتا ەسەپپەن 27% - عا ۇلعايتۋعا مۇمكىندىك بەرەدى.

مينيستر قۇتتىقتاۋ سوزىندە ەڭبەك جانە حالىقتى الەۋمەتتىك قورعاۋ مينيسترلىگى تاراپىنان قارتتاردى قولداۋعا، ولارعا الەۋمەتتىك قىزمەت كورسەتۋ دەڭگەيىن ارتتىرۋ مەن قوعامدىق ومىرگە تارتۋ بويىنشا ءىس-شارالار ازىرلەنىپ جاتقانىن اتاپ ءوتتى. ەلىمىزدە 51 بەلسەندى ۇزاق ءومىر ءسۇرۋ ورتالىعى اشىلىپ، ولار بەلسەندى جۇمىس ىستەيدى. وندا قارت ادامدار قىزىعۋشىلىقتارىنا قاراي ءتۇرلى دارىستەر تابا الادى.

«قۇرمەتتى ارداگەرلەر مەن زەينەتكەرلەر، وسى ايتۋلى ءارى تاماشا مەرەكە كۇنى سىزدەرگە زور دەنساۋلىق، قاجىماس قايرات، ۇزاق عۇمىر، اماندىق پەن بەرەكە تىلەيمىن! قارتى بار ءۇيدىڭ – قازىناسى بار. ءار كۇندەرىڭىز جاقسىلىققا، جاقىندارىڭىز بەن تۋىستارىڭىزدىڭ مەيىرىمدىلىگىنە تولى بولسىن»، دەدى تامارا دۇيسەنوۆا ءوزىنىڭ اقجارما قۇتتىقتاۋ سوزىندە.

سوڭعى جاڭالىقتار

QazaqGaz ديرەكتورلار كەڭەسىنىڭ قۇرامى وزگەردى

قازاقستان • 02 جەلتوقسان، 2022

ماۋلەن اشىمباەۆ قىتاي حالقىنا كوڭىل ايتتى

پارلامەنت • 02 جەلتوقسان، 2022

ۇقساس جاڭالىقتار