ەۋرازيالىق ەكونوميكالىق وداق عارىش سالاسىن يگەرۋدى قولدايدى

استانا. 20 مامىر. ەۋرازيالىق ەكونوميكالىق وداق ەلىمىزدىڭ عارىش سالاسى بويىنشا  كەلىسىمشارت جاساسقان بارلىق مەملەكەتتەرمەن ىنتىماقتاستىعىن قولدايدى. بۇل تۋرالى «قازاقپارات» حابارلادى. ەلىمىزدە سوڭعى 7 جىل ىشىندە بەيبىتشىلىك ماقساتىندا عارىشتى يگەرۋگە قاتىستى16 كەلىسىم مەن ىنتىماقتاستىق تۋرالى قۇجاتقا قول قويىلعان. سونىڭ ناتيجەسىندە كوپتەگەن مەملەكەتتەرمەن حالىقارالىق ورنىقتى قارىم-قاتىناس قالىپتاستى. وسى 16 كەلىسىم قۇجاتتارىنىڭ 5-ەۋى ۋكراينا, رەسەي, يزرايل, فرانتسيا جانە قىتاي مەملەكەتتەرىنە قاتىستى. بۇلار ۇكىمەتارالىق دەڭگەيدە كەلىسىلگەن. ال قالعان 11 كەلىسىم-شارت  ۇندىستان, جاپونيا, گەرمانيا, كورەيا, بىرىككەن اراب امىرلىگى, ساۋد ارابيا كورولدىگى, تايلاند, ۇلىبريتانيا, شۆەتسيا, نيدەرلاندى سىندى ەلدەردىڭ عىلىمي عارىش ورتالىقتارىنىڭ قاتىسۋىمەن تۇزىلگەن. ۇلتتىق عارىش اگەنتتىگىنىڭ توراعاسى ەركىن شايماعامبەتوۆتىڭ ايتۋىنشا, ەۋرازيالىق ەكونوميكالىق وداق شەڭبەرىندە عارىش كەڭىستىگىن پايدالانۋ جانە زەرتتەۋ سالاسى بويىنشا تاريفتىك جەڭىلدىكتەر قاراستىرىلىپ وتىر. سونداي-اق, عارىشتىق اپپاراتتاردى ۇشىرۋعا دا مۇمكىندىكتەر بار. ەركىن شايماعامبەتوۆ: « «قازسات» جەرسەرىگى, جەردى قاشىقتىقتان زوندتاۋ عارىشتىق جۇيەسى سياقتى قىمبات جوبالار  ۇشىن مەملەكەتتىك بيۋدجەتتەن ايتارلىقتاي قولداۋ بولادى», – دەدى. اعىمداعى جىلى ەۋرازيالىق ەكونوميكالىق وداق اياسىندا بەلارۋس ەلىمەن عارىش كەڭىستىگىن پايدالانۋ جانە زەرتتەۋ سالاسىنداعى ۇكىمەتارالىق كەلىسىمگە قول قويۋ جوسپارلانىپ وتىر. جولدىباي بازار. دەرەككوز: «قازاقپارات». فوتو: Newskaz.kz.