«قازاقستان بارىسى»: جامبىل وبلىسى

 «قازاقستان بارىسى» ءتۋرنيرىنىڭ سوڭعى ىرىكتەۋ كەزەڭى قىزىقتى جانە تارتىستى وتۋدە. وسى كەزگە دەيىن قىزىلوردا جانە پاۆلودار وبلىسىنان فينالعا جولداما العان بالۋانداردى جازعان ەدىك. ەندى, مىنە كەزەك جامبىل وبلىسىنا دا كەلىپ قالدى. جاقىندا بۇل وڭىردەن  «قازاقستان بارىسى» ءتۋرنيرىنىڭ 2012 جىلعى جانە «Eurasia Barysy» حالىقارالىق ءتۋرنيرىنىڭ 2013 جىلعى جەڭىمپازى بەيبىت ىستىباەۆ پەن تالانتتى بالۋان داۋلەتحان جاقىپوۆتىڭ قاتىساتىنى بەلگىلى بولدى.  بۇل تۋرالى egemen.kz ءتىلشىسى حابارلادى. «قازاقستان بارىسى» قازاق كۇرەسىن دامىتۋ قورىنىڭ ءباسپاسوز قىزمەتىنىڭ حابارلاۋىنشا, بەيبىت بۇل جولى دا قارسىلاستارىن شاڭ قاپتىرىپ, توپتان قارا ءۇزىپ شىقتى. جامبىل وبلىسىنداعى ىرىكتەۋ سىنىنىڭ فينالىندا ول تالانتتى بالۋان داۋلەتحان جاقىپوۆتان باسىم ءتۇستى. جالپى,  جامبىل وبلىسىنداعى ىرىكتەۋ ءتۋرنيرى ەشبىر بالۋانعا وڭاي بولعان جوق. ال بىلتىرعى «قازاقستان بارىسى» دوداسىنىڭ فينالىنا شىققان ايدوس تەڭگەباەۆ ءۇشىنشى ورىن الدى. -ىرىكتەۋ سىنى راسىندا وڭاي بولعان جوق. سەبەبى, ەلىمىزدە قازاق كۇرەسى قانات جايىپ كەلەدى. تالانتتى بالۋاندار جەتەرلىك. باسەكەلەستىك بار. اللا قولداپ, جەڭىسكە جەتتىم. ەندى استانادا وتەتىن فينالعا تىڭعىلىقتى دايىندىق جۇرگىزەمىن, - دەيدى 2012 جىلعى «قازاقستان بارىسى», 2013 جىلعى «Eurasia Barysy» حالىقارالىق ءتۋرنيرىنىڭ جەڭىمپازى. بەيبىت ىستىباەۆتىڭ بويى 193 سم, سالماعى 135 كيلو. ول 1985 جىلى جامبىل وبلىسى, تالاس اۋدانى, كوشەك باتىر اۋىلىندا تۋعان. قازاق كۇرەسىنەن حالىقارالىق دارەجەدەگى سپورت شەبەرى. جاتتىقتىرۋشىسى - ەلدوس دالاباي. ال داۋلەتحان جاقىپوۆتىڭ سالماعى 82 كيلو. 1992 جىلى جامبىل وبلىسى, تالاس اۋدانىندا تۋعان. داۋلەتحان دزيۋدودان سپورت شەبەرى. وسىلايشا, «سارىارقا» ۆەلوترەگىندە وتەتىن فينالدىق سىندا جامبىل وبلىسى بەيبىت ىستىباەۆ پەن داۋلەتحان جاقىپوۆقا ءۇمىت ارتادى. داۋلەتحان بىلتىر دا فينالدىق ايقاسقا جولداما العان. بىراق, دزيۋدودان ۇلتتىق قۇراما ساپىندا بۇكىلالەمدىك قازان ۋنيۆەرسياداسىنا دايىندالۋ ءۇشىن فينالدان باس تارتقان ەدى. ەندى جاقىپوۆ ەكىنشى مۇمكىندىگىن قۇر جىبەرمەيدى دەگەن ويدامىز. داستان كەنجالين. دەرەككوز: «قازاقستان بارىسى» قازاق كۇرەسىن دامىتۋ قورىنىڭ ءباسپاسوز قىزمەتى. فوتو: «قازاقستان بارىسى» قازاق كۇرەسىن دامىتۋ قورىنىڭ ءباسپاسوز قىزمەتى. سۋرەتتە: سولدان وڭعا قاراي داۋلەتحان جاقىپوۆ,  بەيبىت ىستىباەۆ,  ايدوس تەڭگەباەۆ.