«شىندىقتىڭ شىراقشىسى, نامىستىڭ نايزاعايى» اتانعان حالىق جازۋشىسى شەرحان مۇرتازا كوزى ءتىرى بولسا بيىل 90 جاسقا تولار ەدى. قازاق ءسوز ونەرىنىڭ ورىستەۋىنە ورەلى ۇلەس قوسقان ەرەن تۇلعانى شىعارماشىل قاۋىم جىل سايىن ۇلكەن ساعىنىشپەن ەسكە الادى. ەستە بولسا, شەراعاڭا ارنالعان بيليارد ءتۋرنيرىن وتكىزۋ ىسىنە جازۋشىنىڭ 85 جىلدىق مەرەيتويى قارساڭىندا «ەگەمەن قازاقستان» گازەتىنىڭ باسشىلىعى باستاماشى بولدى. سول كەزدە شەراعاڭ دەنساۋلىعىنا بايلانىستى تۋرنيرگە كەلە الماسا دا, يگى يدەيانى قولعا العان ىنىلەرىنە ريزاشىلىعىن ءبىلدىرىپ, باتاسىن بەرگەن ەدى. سودان بەرى ءداستۇرلى تۋرنير ۇزبەي جالعاسىن تاۋىپ كەلەدى.
بيىل الماتى قالالىق قوعامدىق دامۋ باسقارماسى مەن وڭىرلىك كوممۋنيكاتسيالار قىزمەتى بىرلەسە ۇيىمداستىرعان جارىستا باق وكىلدەرى باق سىنادى. «ديناميكالىق پيراميدا» قاعيداتى بويىنشا وتكەن بيليارد تۋرنيرىنە 30-دان استام جۋرناليست قاتىسىپ, جارىس تالابىنا ساي ءار رەداكتسيادان ەكى ويىنشى ونەر كورسەتتى. جارتى كۇنگە سوزىلعان قىزۋ باسەكە بارىسىندا اعا بۋىن تاراپىنان شەرحان مۇرتازا جايلى جارقىن ەستەلىكتەر ايتىلدى.
– شەرحان اعا, ءشۇباسىز قازاق ادەبيەتىنىڭ مايتالمانى. ونىڭ قالامىنان ورىلگەن ءار شىعارمادان ۋاقىت ءۇنى ەستىلەدى. ادەبيەت پەن جۋرناليستيكانىڭ كوشىن قاتار الىپ جۇرگەن تاعىلىمدى تۇلعا, قايراتكەرلىك قىرىمەن دە جۇرت جادىنان بەرىك ورىن الدى. بيىك مىنبەلەردەن ۇلتتىڭ جوعىن جوقتاپ, ادىلەتتىڭ اق تۋىن جوعارى ۇستادى. بۇگىنگى بيليارد ءتۋرنيرىن وسى ءبىر كەمەڭگەر تۇلعانىڭ كوڭىل سىرى, ءومىر جىرى جايلى ىزگىشۋاق ەستەلىكتەر ايتىلعان رۋحاني جۇزدەسۋ دەپ ەسەپتەيمىن, – دەيدى تۋرنيرگە قاتىسقان ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ پروفەسسورى ايازبي بەيسەنقۇلوۆ.
شەر-اعاڭنىڭ سۇيىكتى ويىنى بولعان تاستاياق الماتىلىق زيالى قاۋىمنىڭ باسىن قوساتىن يگى جوباعا اينالعانىن ايتا كەتۋ كەرەك. جارىسقا قاتىسۋشىلار اسىرەسە شىعارماشىلىق ادامى ءۇشىن بۇل ويىننىڭ پايداسى زور ەكەنىن تىلگە تيەك ەتتى.
تۋرنير قورىتىندىسىنا ساي «قازاق راديولارى» كومانداسى كوش باسىنان كورىنسە, «الماتى» تەلەارناسىنىڭ جۋرناليستەرى ەكىنشى ورىندى ەنشىلەدى. ال ۇزدىك ۇشتىكتى Tengrinews اقپاراتتىق سايتىنىڭ تىلشىلەرى تۇيىندەدى. ەسكە سالساق, ەكى اپتا بۇرىن الماتىدا بۇقارالىق اقپارات قۇرالدارى وكىلدەرىنىڭ قاتىسۋىمەن شەرحان مۇرتازا اتىنداعى فۋتبول ءتۋرنيرى مارەگە جەتكەن بولاتىن.
الماتى
