ءبىلىم • 29 قىركۇيەك، 2022

وقۋ-اعارتۋ ءمينيسترى «مەتا» كومپانياسىنىڭ وكىلدەرىمەن كەزدەستى

وقۋ-اعارتۋ ءمينيسترى اسحات ايماعامبەتوۆ «Meta» كومپانياسىنىڭ وكىلدەرىمەن كەزدەستى. «Meta» كومپانياسىنىڭ مەملەكەتتىك ورگاندارمەن بايلانىس جونىندەگى وڭىرلىك باسقارۋشى ديرەكتورى دجوردج چەنمەن سۇحبات بارىسىندا تاراپتار Facebook جانە Instagram سياقتى الەۋمەتتىك جەلىلەردە ءبىلىم بەرۋدى ناسيحاتتاۋ جونىندە ىنتىماقتاستىق تۋرالى كەلىستى، دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.

جانبولات كەنجەعۇل

سونىمەن قاتار وقۋ-اعارتۋ ءمينيسترى ءبىلىم بەرۋ كونتەنتىن قازاق تىلىندە ىلگەرىلەتۋدىڭ ماڭىزدىلىعىن اتاپ ءوتتى.

Facebook، Instagram جانە WhatsApp سياقتى الەۋمەتتىك جەلىلەر امەريكاندىق «Meta» كومپانياسىنىڭ قۇرامىنا كىرەتىنىن ەسكە سالا كەتەيىك.

«قازاقستاندىق مۇعالىمدەر الەۋمەتتىك جەلىلەردى بەلسەندى پايدالانادى. مىسالى، Facebook-تە بىزدە ءبىر مۇعالىم ۇستازدار توبىن قۇرعان، وندا بۇگىندە 180 مىڭنان استام قاتىسۋشى بار. ال بۇل - قازاقستاننىڭ بارلىق مۇعالىمدەرىنىڭ جارتىسى. بۇل Facebook-تەگى تەك ءبىر توپ قانا. وندا مۇعالىمدەر تالقىلاۋلار جۇرگىزىپ، جاڭالىقتارمەن بولىسەدى، وقۋشىلاردى وقىتۋ مەن زەرتتەۋلەر بويىنشا مي شابۋىلىن وتكىزەدى، پروبلەمالىق ماسەلەلەردى كوتەرەدى. سونداي-اق بىزدە Instagram كومەگىمەن بەلگىلى ءبىر وقۋ پاندەر تۋرالى ايتاتىن بەلسەندى پەداگوگتەر دە بار. وسىلايشا، ولار ءبىلىم مەن عىلىمدى ناسيحاتتايدى، وقۋشىلاردىڭ قىزىعۋشىلىعىن ارتتىرادى. ءبىز ءۇشىن مەملەكەتتىك تىلدە ءبىلىم بەرۋ كونتەنتىن قۇرۋ باسىمدىق بولادى. قازاق ءتىلى مەن ءبىلىم بەرۋ اقپاراتىن مەملەكەتتىك تىلدە ىلگەرىلەتۋدە ءبىزدىڭ ىنتىماقتاستىعىمىز جەمىستى بولاتىنىنا سەنىم بىلدىرەمىن»، دەدى وقۋ-اعارتۋ ءمينيسترى اسحات ايماعامبەتوۆ.

ءوز كەزەگىندە دجوردج چەن قازاقستاندىق پەداگوگتەر مەن اتا-انالاردىڭ الەۋمەتتىك جەلىلەردەگى بەلسەندىلىگىن اتاپ ءوتىپ، ولار ءۇشىن ارنايى ترەنينگتەر وتكىزۋدى ۇسىندى.

«وقۋشىلاردى، مۇعالىمدەردى جانە اتا-انالاردى وقىتاتىن بىزدە ارنايى كوماندا جۇمىس ىستەيدى. بالالارعا ارنالعان كونتەنت تە بار. اعىلشىن ءتىلىن، قازاق ءتىلىن ۇيرەنۋگە، قازاق تىلىندە ءبىلىم بەرۋ كونتەنتىن جاساۋعا ارنالعان بارلىق رەسۋرستار بار. ءبىز مۇعالىمدەرگە اقپاراتتىق رەسۋرستاردى قالاي پايدالانۋ كەرەكتىگىن ۇيرەتۋ بويىنشا ترەنينگتەر ۇيىمداستىرامىز. مۇعالىمدەر ءۇشىن تسيفرلىق باعدارلامالار جاساپ جاتىرمىز، سونداي-اق ولاردىڭ اراسىندا اشىق ديالوگتار جاريالاناتىن اتا-انالارعا ارنالعان پلاتفورمامىز بار. ءار ەل ءۇشىن باعدارلامالاردى بولەك جاسايمىز. ءبىز ءبىلىم بەرۋ سالاسىندا قانداي كونتەنتتى بەرگەن دۇرىس ەكەنىن تاڭداي الامىز»، دەدى «Meta» كومپانياسىنىڭ مەملەكەتتىك ورگاندارمەن بايلانىس جونىندەگى وڭىرلىك باسقارۋشى ديرەكتورى دجوردج چەن.

كەزدەسۋ قورىتىندىسى بويىنشا تاراپتار جاڭا ءبىلىم بەرۋ جوبالارىن ودان ءارى ىلگەرىلەتۋ تۋرالى كەلىستى.