قالا كۇنى قارساڭىندا ءوڭىردىڭ ءال-اۋقاتىن ارتتىراتىن قۇرىلىس ماتەريالدارىن شىعاراتىن زاۋىتتىڭ جۇمىسى ىسكە قوسىلدى. مۇنداعى جۇمىسشىنىڭ بارلىعى – جەرگىلىكتى ازاماتتار. زاۋىت شىعاراتىن گازبلوك – وڭىرگە اسا قاجەت قۇرىلىس ماتەريالى. ەندى تۇرعىندار باياعىداي الىسقا سابىلىپ جۇرمەيدى.
ء«بىزدىڭ ۇشجىلدىق جوسپارىمىزعا سايكەس, قالا بويىنشا ميلليون شارشى مەتردەن استام قۇرىلىس جوسپارلانىپ وتىر. سونىمەن قاتار بۇل ءونىمدى باسقا دا وبلىسقا ۇسىنىسقا بەرە الامىز. وسىنداي يگى ءىستى باستاپ, تۋعان جەرگە تۋىن تىگىپ جاتقان جاندارعا ريزاشىلىعىمىز شەكسىز», دەدى قالا اكىمى اسەت دۇيسەبەك ۇلى.
گازبلوك كىرپىشتەرىن وندىرەتىن قالاداعى العاشقى كاسىپورىندا قازىر 35 ادام جۇمىس ىستەۋدە. زاۋىت باسشىلىعى بولاشاقتا قىزمەتكەرلەر سانىن 150-گە جەتكىزۋدى جوسپارلاپ وتىر. مۇندا تاۋلىگىنە 100 تەكشە مەتر كىرپىش شىعارىلادى. زاۋىت ءونىمى وتاندىق جانە رەسەي تەحنولوگياسىمەن دايىندالادى. جەكە كاسىپورىنعا مەملەكەت تاراپىنان جەر ۋچاسكەسى, ينجەنەرلىك جەلىلەر ءبولىپ, ءوندىرىستى جەدەل گازداندىرۋعا كومەك كورسەتىلدى.
«زاۋىتتا كىرپىشتەردىڭ بارلىق ءتۇرىن شىعارامىز. جۇمىسشىلارعا كۇنىنە ەكى ۋاقىت تاماق, جۇمىس كيىمى بەرىلەدى. جۇمىسشىلاردىڭ ورتاشا جالاقىسى – 200-300 مىڭ تەڭگە. وسىنداي زاۋىتتى اشۋعا كومەكتەسكەن وبلىس, قالا باسشىسىنا العىسىمىز شەكسىز. ءبىز مۇنىمەن شەكتەلىپ قالمايمىز, زاۋىت ونىمدەرىنە سۇرانىس كوبەيگەن سايىن, جەرگىلىكتى جۇمىسشىلاردىڭ سانىن ارتتىرامىز», دەدى زاۋىت ديرەكتورى يرينا حان.
قازىردىڭ وزىندە زاۋىت ونىمىنە سۇرانىس كوپ. وڭىردەگى قۇرىلىس كومپانيالارى زاۋىت ونىمىنە تاپسىرىس بەرىپ جاتىر ەكەن.
زاۋىتتىڭ اشىلۋىنان كەيىن كوپشىلىك وقۋشىلار سارايىندا وتكەن «بالداۋرەن» شىعارماشىلىق بالالار فەستيۆالىنە باردى. ءىس-شارادا 250-دەن استام بالدىرعان اۋەلەتىپ ءان سالىپ, مىڭ بۇرالىپ بي بيلەپ, قولونەر شەبەرلىگىن كورسەتتى. «بالداۋرەن» فەستيۆالىنىڭ سوڭىندا بالالارعا سىيلىقتار تاراتىلدى. قالا كۇنىنە وراي جەرگىلىكتى اسپازدار ارنايى «تالدىقورعان» دەگەن تورت ازىرلەپتى. تورتتى قالا اكىمى كەسىپ, جۇرشىلىقتى قالا كۇنىمەن قۇتتىقتاپ, ىزگى تىلەگىن ءبىلدىردى.
قالا باسشىسى «جاستار» ساياباعى مەن سپورت سارايىنىڭ جانىنا قويىلعان كورمەنى ارالادى. مۇندا وندىرىستىك كاسىپورىنداردىڭ تاۋارلارى, «Kia» «JAK», «HavaI», «Hyundai», «Lada» ماركالى اۆتوكولىكتەرى, قولونەر شەبەرلەرىنىڭ بۇيىمدارى مەن فوتوگروفتاردىڭ تۋىندىلارى ورنالاسقان. ءار اۋداننان كەلگەن ۇجىم ءوز ونىمدەرىن تانىستىردى.
وسىدان كەيىن فۋتبول فەستيۆالى ءوتتى. وعان 7-8 سىنىپ وقۋشىلارى اراسىندا 25 كوماندا قاتىستى. بالعىن سپورتشىلاردىڭ فەستيۆالىن تاماشالاۋعا بارعان قالا اكىمى وقۋشىلارعا دوپ تاراتىپ, جىلى لەبىزىن ءبىلدىردى.
قالا كۇنىنە ارنالعان ءدۇبىرلى دۋمان «جاستار» ساياباعىندا وتكەن مەرەكەلىك كونتسەرتپەن جالعاستى. ءىس-شارا بارىسىندا شاھار باسشىسى اسەت ماساباەۆ جۇرتشىلىقتى مەرەكەمەن قۇتتىقتاپ, قالانىڭ دامۋى مەن وركەندەۋىنە ەلەۋلى ۇلەس قوسقان تالدىقورعان قالاسىنداعى وبلىستىق اۋرۋحانانىڭ ديرەكتورى اناربەك مونعولعا, مۇگەدەكتەرگە ارنالعان وبلىستىق مامانداندىرىلعان سپورت مەكتەبىنىڭ اعا جاتتىقتىرۋشىسى ەربولات يمانقۇلوۆقا, «ايسۇلۋ» تىگىن فابريكاسىنىڭ اتقارۋشى ديرەكتورى جارىلقاسىن بولات ۇلىنا, «Lider.kz» ەرىكتىلەر ۇيىمىنىڭ جەتەكشىسى ماتۆەي شۆەديگە «تالدىقورعان قالاسىنىڭ قۇرمەتتى ازاماتى» اتاعىن تاپسىردى.
تالدىقورعان
