LRT جەلىسىندە جولاۋشىلار تاراپىنان قاۋىپسىزدىك ەرەجەلەرىن بۇزۋدىڭ جەكەلەگەن جاعدايلارى تىركەلدى.
ونداي ارەكەتتەر اپاتتىق جاعدايلارعا جانە قوزعالىستىڭ ۋاقىتشا كىدىرىسىنە اكەلۋى مۇمكىن. اتاپ ايتقاندا, جولاۋشىلار تاراپىنان مىناداي جاعدايلار تىركەلدى:
- ستانسا پلاتفورماسىندا ورنالاسقان شۇعىل تەجەۋ باتىرماسىن نەگىزسىز باسۋ;
- پويىز ىشىندە قورعانىش اينەكتىڭ ارتىندا ورنالاسقان پلاتفورمالىق ەسىكتەردى شۇعىل اشۋ باتىرماسىن ىسكە قوسۋ;
- ۆاگون ەسىكتەرىن ىشىنەن ءوز بەتىنشە اشۋعا ارەكەت جاساۋ;
- ەسىك جاقتاۋلارىنىڭ اراسىنا قولىن سالىپ, ەسىكتەردىڭ جابىلۋىنا قاساقانا كەدەرگى كەلتىرۋ.
LRT جۇيەسى تولىق اۆتوماتتاندىرىلعان, سوندىقتان مۇنداي ارەكەتتەردىڭ بارلىعى جۇيە تاراپىنان قاۋىپسىزدىككە ىقتيمال قاتەر رەتىندە قابىلدانادى. بۇل پويىزدىڭ توقتاۋىنا جانە ديسپەتچەرلىك ورتالىق تاراپىنان قوسىمشا تەكسەرۋلەر جۇرگىزىلۋىنە اكەلەدى.
«جولاۋشىلاردان LRT پايدالانۋ ەرەجەلەرىن ساقتاۋدى سۇرايمىز. ەسكە سالامىز: جەلى كەرنەۋ استىندا. ءاربىر قۇرامنىڭ ىشىندە LRT پويىزىنىڭ وپەراتورى بار, ول قاجەت بولعان جاعدايدا ەلەكتر قۋاتى اجىراتىلعاننان كەيىن عانا ەسىكتەردى اشادى», دەلىنگەن حابارلامادا.
بارلىق قۇقىق بۇزۋشىلار ستانسالار مەن ۆاگونداردىڭ ىشىندە ورناتىلعان بەينەباقىلاۋ كامەرالارى ارقىلى انىقتالادى. بۇل فاكتىلەر بويىنشا ماتەريالدار قۇقىق قورعاۋ ورگاندارىنا قىلمىستىق جاۋاپكەرشىلىككە تارتۋ ءۇشىن بەرىلەدى, ويتكەنى مۇنداي ارەكەتتەر جولاۋشىلاردىڭ قاۋىپسىزدىگىنە قاتەر ءتوندىرىپ, LRT جۇمىسىنىڭ تۇراقتىلىعىنا اسەر ەتەدى.
ەسكە سالا كەتەيىك, كەشە استانادا كوپتەن كۇتكەن LRT رەسمي تۇردە ىسكە قوسىلدى.
مەملەكەت باسشىسى قاسىم-جومارت توقاەۆقا LRT جۇيەسىنىڭ 001 سەريالى جول ءجۇرۋ كارتاسى تابىستالدى.
بۇعان دەيىن استاناداعى LRT جۇيەسىنىڭ №117 «جىبەك جولى» ستانتسياسى ءالى پايدالانۋعا بەرىلمەگەنىن جازعان ەدىك.
