استانا قالاسىنىڭ پوليتسيا دەپارتامەنتى كوشى-قون قىزمەتى باسقارماسىنىڭ باسشىسى ارمان بايمۇحامبەتتىڭ مالىمەتىنشە, جىل باسىنان بەرى ەلوردادا 29 مىڭنان اسا شەتەل ازاماتى تىركەلگەن.
– ونىڭ 4 مىڭى – رەسەي ازاماتى. وسى ۋاقىتقا دەيىن كوشى-قون زاڭناماسىن بۇزعانى ءۇشىن 5 مىڭنان اسا شەتەل ازاماتى جاۋاپكەرشىلىككە تارتىلىپ, 867 ادام ەلدەن شىعارىلدى. شەتەلدىكتەردى شاقىرىپ, ولاردىڭ ەلدە بولۋ تالاپتارىنا نەمقۇرايدى قاراعان, ياعني ءتيىستى ەرەجەلەردى ساقتاماعان 1083 ادام اكىمشىلىك جاۋاپكەرشىلىككە تارتىلدى. شەتەلدىك ازاماتتاردى جۇمىسقا تارتىپ, جۇمىسقا پايدالانۋ ەرەجەلەرىن بۇزعانى ءۇشىن 93 جۇمىس بەرۋشى انىقتالدى. تىركەۋ جانە قۇجاتتاندىرۋ ەرەجەلەرىن بۇزعانى ءۇشىن 2 866 ازامات اكىمشىلىك جاۋاپكەرشىلىككە تارتىلدى. شەتەل ازاماتتارىنىڭ ەل شەكاراسىنا ەنۋى تۋرالى اقپارات مىندەتتى تۇردە قۇقىق قورعاۋ ورگاندارىنا حابارلانۋعا ءتيىس, – دەدى ا.بايمۇحامبەت.
«ازاماتتارعا ارنالعان ۇكىمەت» مەملەكەتتىك كورپوراتسياسى كەاق استانا قالاسى بويىنشا فيليالى ديرەكتورىنىڭ ورىنباسارى دينارا قۋانىشەۆانىڭ ايتۋىنشا, شەتەل ازاماتتارى تاراپىنان ءوتىنىشتىڭ كوپ تۇسۋىنە بايلانىستى ساۋران كوشەسى, 7 مەكەنجايى, «نۇرلى جول» ۆوكزالىنىڭ عيماراتىندا كوشى-قون قىزمەتىن ۇسىناتىن قوسىمشا سەكتورلار ىسكە قوسىلعان.
قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى يليا سكۋبتىڭ مالىمدەۋىنشە, بوسقىن مارتەبەسىن الۋ ءۇشىن 96 ادام ءوتىنىش بىلدىرگەن. ونىڭ ەكەۋى – رەسەي ازاماتى. ءوتىنىشتى قاراستىرۋ 3 ايعا سوزىلادى. «بۇگىندە پورتالدا 6 مىڭنان استام بوس جۇمىس ورنى بار. ازىرگە جۇمىس سۇراعان رەسەي ازامتارى جوق», دەيدى ي.سكۋب.
