كىشى جۇزدەگى باي ۇلى بىرلەستىگىنىڭ اعاسى سانالاتىن شەركەش رۋىنىڭ ۇرانىنا اينالعان شاعىراي باتىرعا جانە ەل-جۇرت قاستەرلەيتىن وراق اۋليەگە ارناپ سالىنعان قوس كەسەنەنىڭ اشىلۋ سالتاناتى جالپىحالىقتىق تويعا اينالىپ ءوتتى. جايىق وزەنى جاعاسىندا ورنالاسقان قادىرقۇل اۋىلىنىڭ ماڭىنا باتىس قازاقستان, اتىراۋ جانە ماڭعىستاۋ وڭىرىنەن ارنايى وتاۋ ۇيلەر تىگىلىپ, ارۋاقتى اتالارعا اس بەرىلدى. ساۋاپتى شارانىڭ قۇرمەتتى قوناقتارى قاتارىندا كسرو جانە قازاقستان رەسپۋبليكاسىنىڭ حالىق ءارتيسى ءاسانالى ءاشىموۆ, كينو جانە تەاتر اكتەرى, قازاقستاننىڭ ەڭبەك سىڭىرگەن ءارتيسى مەرۋەرت وتەكەشوۆا, قازاقستان جازۋشىلار وداعىنىڭ مۇشەسى, شەجىرەشى پەرنەباي دۇيسەنبين, اتىراۋ وبلىسىنىڭ ەكس-اكىمى ماحامبەت دوسمۇحامبەتوۆ, ەكس-سەناتور سارسەنباي ەڭسەگەنوۆ, بۇرىنعى ءماجىلىس دەپۋتاتى بولات قونارباي, Kazenergi كومپانياسىنىڭ توراعاسى كەنجەبەك يبراشەۆ, كاسىپكەر توكەن جۇماعۇلوۆ جانە باسقالارى بولدى. سالتاناتتى جيىندا باتىس قازاقستان مەن اتىراۋ وبلىستارىنان كەلگەن ونەر ۇجىمدارى, جەكەلەگەن ونەرپازدار جينالعان حالىققا ءان مەن جىردان شاشۋ شاشتى.
- بۇل 2014 جىلدان بەرى باستالعان جۇمىستارىمىزدىڭ العاشقى ناتيجەسى. سول جىلى «شاعىراي» قوعامدىق قورى قۇرىلىپ, ەل قامىن جەگەن ەرلەردىڭ ەسىمىن ماڭگى ەستە قالدىرۋعا بايلام جاسالعان بولاتىن. بارلىق شارۋا حالىقتىڭ كۇشىمەن, قولداۋىمەن بولدى. ەڭ الدىمەن, وسى جەردىڭ جەرگىلىكتى حالقىنا, وسى وڭىردە ۇزاق جىل مال باعىپ, وراق اۋليە اتامىزدىڭ ەسىمىن ساقتاپ, قۇرمەتتەگەن مارقۇم ساياسات ءسالىموۆ اعامىزعا, اۋلەتىنە قارىزدارمىز, - دەدى «شاعىراي» قوعامدىق قورىنىنىڭ ديرەكتورى ەرعالي جاقسىلىق.
الىستان كوز تارتاتىن قوس كەسەنەنىڭ قۇرىلىسى بىلتىر باستالعان ەكەن. بيىكتىگى 12 مەترلىك قوس ەسكەرتكىشتى ماڭعىستاۋدىڭ اپپاق ۇلۋتاسىنان كوتەرگەن – بەلگىلى شەبەر ەرمۇحامبەت اليەۆ. قازاقستاننىڭ باتىس وڭىرىندەگى بەلگىلى تاريحي تۇلعالار – بايباراق باتىر قۇدايقۇل ۇلىنىڭ, يساتاي باتىر تايمان ۇلىنىڭ, ءانشى مۇحيت مەرالى ۇلىنىڭ كەسەنەلەرىن سالعان ماڭعىستاۋلىق شەبەر بۇل جولى دا ەرەكشە شەبەرلىك تانىتقانى بايقالىپ تۇردى.
- قازاقستاننىڭ كيەلى نىساندارى قاتارىنا جاڭادان قوسىلىپ وتىرعان بۇل مەكەندە كەلەر جىلى دا ۇلكەن اس بەرىپ, دالا قىزىقتارىن وتكىزۋدى جوسپارلاپ وتىرمىز. كەسەنە ماڭىنا تال-تەرەك وتىرعىزىلىپ, ساياباققا اينالادى. بيىل سالىنعان ۇلكەن قوناق ءۇيدىڭ ءبىر بولمەسىنەن بولاشاقتا تاريحي تۇلعالاردىڭ ءومىرى مەن تاريحي قىزمەتىنەن حابار بەرەتىن مۋزەي اشىلادى. قىسى-جازى زيارات ەتىپ كەلەتىن حالىققا لايىقتى قىزمەت كورسەتۋ ءۇشىن تۇراقتى تۇردە شىراقشى بولادى دەپ وتىرمىز, - دەدى «شاعىراي» قوعامدىق قورى ۇيىمداستىرۋ القاسىنىڭ مۇشەسى ەكپىن الپامىس ۇلى.
باتىس قازاقستان
