– اسەت جولامان ۇلى, ءوزىڭىز باسقاراتىن باسقارمانىڭ ەسەبىنە نازار اۋدارساق, 2022 جىلعى ءىى توقسانداعى ستاتيستيكالىق مالىمەتتەرگە سايكەس وبلىستاعى جۇمىسسىزدىقتىڭ دەڭگەيى – 5,1%. ەكونوميكانىڭ ءارتۇرلى سالالارىندا 336 441 ادام جۇمىسپەن قامتىلعان, دەسەك تە جۇمىسسىزداردىڭ سانى 18 173 ادامدى قۇرادى. جالپى, وڭىردە جۇمىسسىزدىقتى ازايتۋ ءۇشىن قانداي ءىس-شارالار جۇرگىزىلىپ جاتىر.
– بيىل 2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا اياسىندا 12 مىڭنان اسا ادامدى جۇمىسپەن قامتۋدىڭ بەلسەندى شارالارىنا تارتۋ جوسپارلانىپ وتىر. ول ءۇشىن رەسپۋبليكالىق بيۋدجەتتەن – 861,2 ملن تەڭگە, ۇلتتىق قوردان – 4,2 ملرد تەڭگە, جەرگىلىكتى بيۋدجەتتەن 2,8 ملرد تەڭگە ءبولىندى. بيىلعى 1 قىركۇيەكتەگى جاعداي بويىنشا وبلىستىڭ جۇمىسپەن قامتۋ ورتالىقتارىنا 29 537 ادام حابارلاسىپ, 16 603 ادام جۇمىسپەن قامتۋدىڭ بەلسەندى شارالارىمەن قامتىلدى. باعدارلاما اياسىندا 314 ادام 400 اەك كولەمىندە قايتارىمسىز گرانت الىپ, 629 ادام ونلاين كۋرستارعا قاتىسىپ, 90 ادام كاسىپتىك وقىتۋدان ءوتتى. تۇراقتى جۇمىس ورىندارىنا 6 881 ادام, سۋبسيديالاناتىن جۇمىس ورىندارىنا 6 823 ادام جۇمىسقا ورنالاستىرىلدى. ناقتىراق ايتساق, الەۋمەتتىك جۇمىس ورىندارىنا – 525 ادام, جاستار تاجىريبەسىنە – 817 ادام, قوعامدىق جۇمىستارعا – 5 364 ادام, «العاشقى جۇمىس ورنى» جوباسىنا – 101 ادام, «كۇمىس جاس» جوباسىنا 16 ادام جولداندى. جالپى, 2022 جىلى وبلىستا 20 560 جۇمىس ورنىن قۇرۋ جوسپارلانعان بولاتىن, ونىڭ 11 580-ءى – تۇراقتى, 8 980-ءى – ۋاقىتشا جۇمىس ورىنى. ەسەپتى كەزەڭگە 18 389 جۇمىس ورنى قۇرىلدى. ونىڭ ىشىندە 11 235-ءى – تۇراقتى جۇمىس ورنى. سونىمەن قاتار وبلىستا ۇلتتىق جوبالار شەڭبەرىندە 2 469 تۇراقتى, 7 455 ۋاقىتشا – بارلىعى 9 924 جۇمىس ورنى قۇرىلادى. بۇگىنگە دەيىن 7 341 جۇمىس ورنى قۇرىلدى, ونىڭ ىشىندە تۇراقتى جۇمىس ورنى 395 بولسا, ۋاقىتشا جۇمىس ورنى – 6 946, ياعني جوسپاردىڭ 73,9%-ى ورىندالدى.
– جۇمىسسىزدىقتى ازايتۋدىڭ ءبىر باعىتى ينۆەستيتسيالىق جوبالاردىڭ ۇلەسى قانداي؟
– 2022 جىلى وبلىستا 27 ينۆەستيتسيالىق جوبا ىسكە اسىرىلادى. بۇل جوبالار ەسەبىنەن 1 390 جۇمىس ورنىن قۇرۋ جوسپارلانعان. ونىڭ ىشىندە 1 052-ءى تۇراقتى جۇمىس ورىنى. بۇل جوبالاردىڭ ىشىنەن 24 جوبا – وتكەن جىلداردان وتپەلى جوبالار. بۇگىندە بۇل ينۆەستيتسيالىق جوبالار ارقىلى 576 تۇراقتى, 254 ۋاقىتشا – بارلىعى 778 جۇمىس ورنى قۇرىلدى. وسى جىلى وڭىردەگى ءىرى مۇناي ءوندىرۋشى كاسىپورىندارعا جانە ولاردىڭ مەردىگەر ۇيىمدارىنا 1 679 جەرگىلىكتى تۇرعىندى جۇمىسقا ورنالاستىرۋ جوسپارلانعان ەدى, قازىر سونىڭ 1 017-ءسى جۇمىسقا تۇردى.
– مىسالى, قانداي ورىنداردان جۇمىس تاپتى؟
– اتاپ ايتقاندا, «وزەنمۇنايگاز» اق-عا – 463, «وزەنمۇنايگاز» اق مەردىگەر ۇيىمدارىنا – 279, «ماڭعىستاۋمۇنايگاز» اق-عا – 99, ونىڭ مەردىگەرلەرىنە – 148, «قاراجانباسمۇناي» اق مەردىگەر ۇيىمدارىنا 28 ادام جۇمىسقا ورنالاستى.
سونىمەن قاتار 2021 جىلدان باستاپ وبلىستا وڭىرلىك «جۇمىس ىستەيمىن» جوباسى ىسكە قوسىلدى. 2022 جىلى جوباعا وبلىستىق بيۋدجەتتەن 955,5 ملن تەڭگە قاراجات ءبولىندى. جىل باسىنان بەرى جاڭاوزەن قالاسى بويىنشا – 252, قاراقيا اۋدانى – 135 ادام بارلىعى 387 ادام جۇمىسقا جولدانىپ, قازىرگى ۋاقىتتا 746 ادام جۇمىسىن جالعاستىرىپ ءجۇر. جۇمىسشىلاردىڭ ورتاشا جالاقىسى 175 مىڭ تەڭگەنى قۇرايدى. سونداي-اق ءوڭىردىڭ جۇمىسسىز ازاماتتارىن رەسەي فەدەراتسياسىنىڭ «تاتنەفت» كومپانياسىنا جۇمىسقا ورنالاستىرۋ بويىنشا جۇمىستار جۇرگىزىلۋدە. بۇگىندە 40 ادام جۇمىسقا ورنالاستى. اتالعان باعىتتاعى جۇمىستار جالعاسادى.
– جۇمىسسىزدىق تۇبەگەيلى جويىلمايدى, بىراق جۇيەلى جانە ءتيىمدى جۇرگىزىلگەن جۇمىستار ونى بەلگىلى ءبىر دارەجەدە ەڭسەرۋگە, ياعني ازايتۋعا اسەرىن بەرەدى دەپ ويلايمىن. سوندىقتان جۇمىس كوزدەرىن ءارتاراپتاندىرۋ دا باستى نازارداعى ماسەلە.
ماڭعىستاۋ وبلىسى
