رەسپۋبليكالىق «كۇي اناسى» قورىنىڭ جەتەكشىسى تولەگەن قۋانىشەۆ ءسوز سويلەپ, قازاقستاننىڭ ەڭبەك سىڭىرگەن قايراتكەرى, جامبىلتانۋشى ءۋاليحان قاليجان «جامبىلعا جاڭا كوزقاراس» اتتى بايانداما جاسادى. حالىقارالىق جانە رەسپۋبليكالىق كونكۋرستاردىڭ لاۋرەاتى قۇرمان بايتاس جامبىل اتامىزدىڭ «توگەيىن جىردى حالقىما» دەگەن تولعاۋىن ورىندادى.
جارمەڭكەنىڭ ءبىر ەرەكشەلىگى – دومبىراعا اۋەستىگى بار ونەرلى بالاعا اتا-اناسى نەمەسە قور وكىلدەرىنىڭ ەل الدىندا دومبىرا سىيلاۋى. بۇل جولى بەس بالاعا ۇكىلى دومبىرا تابىستالدى. سونداي بالالارعا قازاقستاننىڭ ەڭبەك سىڭىرگەن قايراتكەرى, پروفەسسور, كۇيشى ورىنباي دۇيسەن باتا بەردى.
وقۋشىلار جامبىل جاباەۆتىڭ ولەڭدەرىن قازاق, ورىس, اعىلشىن, فرانتسۋز تىلدەرىندە وقىدى. اقىن شىعارماشىلىعى ناسيحاتتالىپ, باسقا دا كۇيشىلەردىڭ كۇيلەرى ورىندالعان ءىس-شارا بايقاۋ تۇرىندە ءوتتى. وقۋشىلار بىرىنەن ءبىرى ءوتىپ كۇي تارتتى. الدىڭعى ورىننان كورىنگەن بالالارعا ۇكىلى دومبىرا, كىتاپتار بەرىلدى.
كەش بارىسىندا ءسوز سويلەگەن «كۇي اناسى» قورىنىڭ جەتەكشىسى تولەگەن قۋانىشەۆ ءىس-شاراعا ۇيىتقى بولعان قالالىق قوعامدىق كەڭەسكە, بايقوڭىر اۋدانىنىڭ اكىمدىگىنە, قازاق ۇلتتىق ونەر ۋنيۆەرسيتەتىنە العىس ءبىلدىردى.
