«12-13 قازاندا استانا 27 قاتىسۋشى ەلدىڭ مەملەكەت جانە ۇكىمەت باسشىلارىن قابىلدايدى. مۇندا ولار اوسشك-ءتىڭ تولىققاندى حالىقارالىق وڭىرلىك ۇيىمعا ترانسفورماتسياسىن ىسكە قوسادى. ءبىز مۇنداي ەرىك-جىگەردىڭ جۇزەگە اساتىنىنا وتە قۋانىشتىمىز. ارينە, ترانسفورماتسيا قالاي جۇزەگە اسىرىلاتىنى تۋرالى ءارتۇرلى كوزقاراستار بار. كەز كەلگەن ترانسفورماتسيا سامميتتە جاسالاتىن العاشقى قادامنان باستالۋى ءتيىس», دەدى قايرات سارىباي ەلوردادا ءوتىپ جاتقان «زاڭسىز كوشى-قون مەن ادام كونترابانداسىنىڭ الدىن الۋ ءۇشىن قۇجاتتاردى قولدان جاساۋمەن كۇرەس» سەمينارى بارىسىندا.
ايتا كەتسەك, بيىل ازياداعى ءوزارا ءىس-قيمىل جانە سەنىم شارالارى جونىندەگى كەڭەس ءوزىنىڭ 30 جىلدىعىن اتاپ وتۋدە. 1992 جىلى قازاقستان باستاماشىلىق ەتكەن اوسشك قازىرگى ۋاقىتتا 27 مۇشە مەملەكەتتى بىرىكتىرىپ, الەمدىك ءىجو-ءنىڭ ۇشتەن ەكىسىن گەنەراتسيالاي وتىرىپ, ازيا اۋماعىنىڭ 90%-دان استامىن قامتيدى.
