«مەملەكەت باسشىسى قاسىم-جومارت توقاەۆتىڭ تاپسىرماسىمەن ەلىمىزدە «جايلى مەكتەپ» ۇلتتىق جوباسىن جۇزەگە اسىرىلىپ جاتقانى بەلگىلى. بۇگىندە ەلىمىزدە مەكتەپتەگى وقۋشى ورنىنىڭ تاپشىلىعى 200 مىڭنان اسادى. بولجام بويىنشا 2025 جىلعا قاراي جالپى قاجەتتىلىك 1 ملن ورىنعا جەتەدى. ۇلتتىق جوبا اياسىندا كەمىندە 800 مىڭ وقۋشى ورنى اشىلادى. بۇل وقۋشى ورنىنىڭ تاپشىلىعىن, ءۇش اۋىسىمدا وقيتىن جانە اپاتتى مەكتەپتەردىڭ ماسەلەسىن تولىعىمەن شەشەدى. «جايلى مەكتەپ» جوباسى اياسىندا مەكتەپتەردى سالۋ مەن جابدىقتاۋدىڭ بىرىڭعاي ستاندارتى قولعا الىنادى. جوبا اياسىندا اشىلعان مەكتەپتەر زاماناۋي ءپان كابينەتتەرىمەن, زەرتحانالارمەن تولىق قامتاماسىز ەتىلەدى. جاڭا مەكتەپتەردە وقۋ باعدارلاماسىنا سايكەس وقۋ الاڭدارى كەڭەيتىلەدى. وقۋ زەرتحانالارى, روبوتتەحنيكا كابينەتتەرى, سپورت زالدارى, امبەباپ شەبەرحانالار مەن ستۋديالار بولادى. باستاۋىش جانە جوعارى سىنىپتار ءۇشىن دە بولەك بلوكتار قاراستىرىلعان. سونداي-اق ولار جەكە سپورت زالدارىمەن, اسحانا جانە وقۋ كابينەتتەرىمەن قامتاماسىز ەتىلەدى. پرەزيدەنت جولداۋدا جوعارى سىنىپتاردا جاراتىلىستانۋ-ماتەماتيكا باعىتىنداعى پاندەر مەن اعىلشىن تىلىنە باسىمدىق بەرۋدى تاپسىردى. ماتەماتيكا, فيزيكا, حيميا, بيولوگيا پاندەرىنىڭ ساعاتتارىن كوبەيتۋ جوسپارلانىپ وتىر. سونداي-اق وقۋ باعدارلامالارى دا جاڭارتىلادى. مۇعالىمدەرگە قوسىمشا كۋرستار ۇيىمداستىرىلادى. STEM ءبىلىم بەرۋ تاسىلدەرىنە نەگىزدەلگەن جاراتىلىستانۋ-ماتەماتيكا پاندەرىن وقىتۋدى كۇشەيتۋ جوسپارلانىپ وتىر. سونىمەن قاتار جوعارى سىنىپتاردا اعىلشىن ءتىلىن ۇيرەنۋگە, ناقتىراق ايتقاندا, 10-11 سىنىپتارداعى اعىلشىن ءتىلى ساعاتىن كوبەيتۋگە, باعدارلامالاردى جاڭارتۋعا جانە مۇعالىمدەردىڭ بىلىكتىلىگىن ارتتىرۋعا باسا ءمان بەرىلەدى. 2024 جىلدان باستاپ CEFR بويىنشا 3-سىنىپتا اعىلشىن ءتىلىن وقىتۋ ساعاتتارىن ۇلعايتۋ مەن قازاق جانە ورىس تىلدەرىن مەڭگەرۋ ءۇشىن قاجەتتى وقۋ جۇكتەمەسىن قامتاماسىز ەتۋ شارالارى قابىلدانادى», دەدى ا.ايماعامبەتوۆ.
مەملەكەت باسشىسى قازاقستان حالقىنا جولداۋىندا تاربيەشىلەردىڭ الەۋمەتتىك مارتەبەسىن كوتەرۋ, جالاقىسىن كوبەيتۋ, سونداي-اق ولاردىڭ جۇمىس جۇكتەمەسىن ازايتۋ بويىنشا شارالار قابىلداۋدى تاپسىرعان بولاتىن. وقۋ-اعارتۋ ءمينيسترى اتالعان ماسەلەگە دە توقتالىپ ءوتتى.
«بۇگىنگى تاڭدا بالاباقشالاردا ءبىر پەداگوگكە 25 بالادان كەلەدى. ءبىر مۇعالىمگە جۇكتەلەتىن جۇكتەمەنىڭ كوپتىگىنەن ءار بالاعا كوبىرەك كوڭىل ءبولۋ مۇمكىندىگى شەكتەۋلى. مەملەكەت باسشىسىنىڭ تاپسىرماسى اياسىندا مەكتەپكە دەيىنگى ۇيىمداردىڭ پەداگوگتەرىن اتتەستاتتاۋ جۇيەسى جاڭارتىلىپ, ولاردىڭ جالاقىسى كوتەرىلەدى, سونداي-اق تاربيەشىلەردىڭ جۇكتەمەسى ازايتىلادى. بۇل مەكتەپكە دەيىنگى تاربيەشىلەرگە بالالارعا كوبىرەك كوڭىل بولۋگە جانە دامىتۋ مەن وقىتۋ ءىس-شارالارىنىڭ تيىمدىلىگىن ارتتىرۋعا كوبىرەك مۇمكىندىك بەرەدى. قازىر بىرنەشە بالاباقشادا قاناتقاقتى جوبا جۇرگىزىلىپ جاتىر. ونىڭ اياسىندا تاربيەشىلەرگە ەڭبەكاقى تولەۋ جۇيەسى سىناقتان ءوتىپ جاتىر, سونىمەن قاتار پيلوتتىق جوبانىڭ قورىتىندىسى بويىنشا مەكتەپكە دەيىنگى ۇيىم پەداگوگتەرىنىڭ ەڭبەكاقىسىن ارتتىرۋ بويىنشا ەسەپ ۇسىنىلادى. نورماتيۆتىك قۇقىقتىق اكتىلەرگە دە وزگەرىستەر ەنگىزىلەدى. بۇل شارالار بالاباقشالارعا بىلىكتى كادرلاردى تارتۋعا, مەكتەپكە دەيىنگى تاربيە مەن وقىتۋدىڭ ساپاسىن ارتتىرۋعا مۇمكىندىك بەرەدى», دەدى ول.
جيىن بارىسىندا مينيستر 2 جاستان 6 جاسقا دەيىنگى بالالاردى مەكتەپكە دەيىنگى ساپالى بىلىممەن قامتاماسىز ەتۋ شارالارى قولعا الىناتىنىن العا تارتتى.
«بۇگىندە كەزەكتە تۇرعان بالالاردى ەسەپتەيتىن بولساق, 2-6 جاس ارالىعىنداعى بالالاردى قامتۋ 88%-دى, ال جالپى بالالار سانىنىڭ 57,7%-ىن قۇراپ وتىر. قامتۋدى ودان ءارى ۇلعايتۋ ءۇشىن جەرگىلىكتى بيۋدجەتتەن قۇرىلىس سالۋ جولىمەن مەكتەپكە دەيىنگى ۇيىمداردى ىسكە قوسۋ بويىنشا جەرگىلىكتى اتقارۋشى ورگاندارمەن جۇمىس جالعاسادى. سونداي-اق ءمجا اياسىندا مەكتەپكە دەيىنگى ۇيىمدار جەلىسى جانە جەكەمەنشىك مەكتەپكە دەيىنگى ۇيىمداردا مەملەكەتتىك تاپسىرىستاردى ورنالاستىرۋ كەڭەيدى. بۇگىنگى تاڭدا وقۋ-اعارتۋ مينيسترلىگى جەرگىلىكتى اتقارۋشى ورگاندارمەن بىرلەسىپ, مەكتەپكە دەيىنگى ۇيىمداردى پايدالانۋعا بەرۋ جانە اشۋ جوسپارىن جۇزەگە اسىرىپ جاتىر. مەكتەپكە دەيىنگى ۇيىمداردىڭ قىزمەت كورسەتۋ ساپاسىن ارتتىرۋ ءۇشىن مەكتەپكە دەيىنگى ۇيىمداردا مەملەكەتتىك تاپسىرىستاردى ورنالاستىرۋعا قويىلاتىن تالاپتار كۇشەيتىلدى. مەملەكەتتىك تاپسىرىستى ورنالاستىرۋ جان باسىنا شاققانداعى فورماتقا جانە بالالاردىڭ بالاباقشاعا بارۋ كەزىندەگى تولەمدى باقىلاۋ تەتىگىنە وزگەرتىلدى», دەدى مينيستر.
وقۋ-اعارتۋ ءمينيسترى اسحات ايماعامبەتوۆ پەداگوگ كادرلاردى دايارلاۋ ساپاسىن ارتتىرۋ ماڭىزدى ماسەلەلەر قاتارىندا ەكەنىن اتاپ ءوتتى.
«مۇعالىمدەردى دايارلاۋ بولىگىندە پەداگوگيكالىق جانە باسقا دا جوعارى وقۋ ورىندارىن اككرەديتتەۋ ستاندارتىن ازىرلەۋ بويىنشا جۇمىستار جۇرگىزىلىپ جاتىر. بۇل پەداگوگ كادرلاردى دايارلاۋ ساپاسىن ارتتىرۋ ءۇشىن قاجەت. قازىرگى ۋاقىتتا جوو-لاردى اككرەديتتەۋ جالپى كريتەريلەر بويىنشا جۇرگىزىلەدى. پەداگوگيكالىق جوعارى وقۋ ورىندارىن اككرەديتتەۋدىڭ ازىرلەنگەن ستاندارتىن بولاشاق وقىتۋشىلار دايارلاناتىن جوو-نىڭ ءبىلىم بەرۋ باعدارلامالارىن اككرەديتتەۋ بارىسىندا تاۋەلسىز اككرەديتتەۋ اگەنتتىكتەرى پايدالانادى دەپ جوسپارلانىپ وتىر. سونداي-اق وقۋ-اعارتۋ مينيسترلىگى «پەداگوگ» كاسىبي ستاندارتىن قابىلداۋ بويىنشا جۇمىستاردى اياقتاۋعا جاقىن. وسى كاسىبي ستاندارتتى ەسكەرە وتىرىپ, ءبىلىم بەرۋ باعدارلامالارى, پەداگوگتەردى سەرتيفيكاتتاۋ جانە اتتەستاتتاۋ راسىمدەرى, ۇزدىكسىز كاسىپتىك دامۋ مازمۇنى ازىرلەنىپ, جاڭارتىلادى, پەداگوگ كادرلاردى قىزمەت بابىندا جوعارىلاتۋ ستراتەگياسى قۇرىلادى. كاسىبي ستاندارت بەكىتىلگەنگە دەيىن پەداگوگتەرمەن جانە باسقا دا مۇددەلى تاراپتارمەن كەڭ تالقىلاۋلار جۇرگىزىلەدى. ناتيجەسىندە «پەداگوگ» كاسىبي ستاندارتى ءبىلىم بەرۋدىڭ بارلىق دەڭگەيىندەگى پەداگوگتەردىڭ كاسىبي دامۋ تراەكتورياسىنىڭ بىرىڭعاي باعدارىنا اينالادى», دەدى ا.ايماعامبەتوۆ.
