35 جاستاعى نوۆاك دجوكوۆيچ «ۇلكەن دۋلىعا» ساناتىنداعى تۋرنيرلەردە 21 مارتە توپ جاردى. وسى ورايدا ەرلەر سايىسىندا ودان تەك رافاەل ءنادالدىڭ عانا وزىپ تۇرعانىن ايتا كەتكەن ابزال. يسپانيانىڭ داڭقتى تەننيسشىسى ءدال وسى دودالاردا 22 رەت دارا شىقتى. سەربيانىڭ ساڭلاعى اتر-ءدىڭ 88 جارىسىندا الدىنا جان سالمادى. ۇزاق ۋاقىت بويى الەمدىك رەيتينگتە كوش باستاعان نوۆاك قازىرگى كەزدە ۇزدىكتەر تىزىمىندە جەتىنشى ورىندى يەلەنۋدە. بۇل سپورتشىعا كوپتەگەن رەكوردتىق كورسەتكىشتەر تيەسىلى. دجوكوۆيچتىڭ تەك كورتتا تاپقان تابىسىنىڭ ءوزى شامامەن 160 ميلليون اقش دوللارىن قۇرايدى.
19 جاستاعى كارلوس الكاراس تاياۋدا عانا اقش-تىڭ اشىق بىرىنشىلىگىندە ايدى اسپانعا ءبىر-اق شىعارىپ, باس جۇلدەنى ولجالادى. وسى تابىسىنىڭ ارقاسىندا ول الەمنىڭ ءبىرىنشى راكەتكاسى اتانىپ وتىر. سونىمەن قاتار كارلوس وسىنداي دەڭگەيگە جەتكەن الەمدەگى ەڭ جاس تەننيسشى ەكەنىن دە ايتا كەتكەنىمىز ابزال. اتر دودالارىندا بارلىعى التى رەت دارا شىققان يسپانيالىق ورەن استاناداعى ءتۋرنيردىڭ باستى فاۆوريتتەرىنىڭ ءبىرى ءارى بىرەگەيى. ازىرگە الكاراس 9 ميلليون دوللاردان اسا تابىس تاپتى.
جوعارىدا ەسىمدەرى اتالعان ساڭلاقتاردان بولەك, ءار جىلدارى «ۇلكەن دۋلىعا» جارىستارىنىڭ جەڭىمپازى اتانعان دانيل مەدۆەدەۆ (№ 4), مارين چيليچ (№ 16), ستانسلاس ۆاۆرينكا (WC) جانە ەندي ماررەي (WC) كۇش سىناسادى. سونداي-اق ستەفانوس تسيتسيپاس (№ 6), اندرەي رۋبلەۆ (№ 9), حۋبەرت حۋركاچ (№ 10), ياننيك سيننەر (№ 11), فەليكس وجە-الياسسيم (№ 13), ديەگو شۆارتسمان (№ 17), كارەن حاچانوۆ (№ 18), روبەرتو باۋتيستا اگۋت (№ 21), گريگور ديميتروۆ (№ 23) جانە گاەل مونفيس (№ 32) سىندى دۇلدۇلدەر دە وسى تۋرنيردە سايىسقا تۇسەدى دەپ كۇتىلۋدە.
