تايلاندتىڭ پرەمەر-ءمينيسترى ابحيسيت ۆەتچاچيۆا ەلدە اسكەريلەردىڭ كۇشىمەن ءتارتىپ ورناتىلعانىن رەسمي تۇردە مالىمدەدى. وپپوزيتسيانىڭ ۇيىمداستىرۋىمەن ەكى جارىم ايداي قارسىلىق ارەكەتتەرىنەن ادام قۇرباندىعى بولىپ, جالپى ەل ەكونوميكاسىنا ايتارلىقتاي نۇقسان كەلگەن ەدى. ۇكىمەتتىڭ كەلىسىمگە شاقىرعان ۇسىنىستارىنا وپپوزيتسيا باسشىلارى ورىندالمايتىن تالاپتارمەن جاۋاپ بەردى.
ەندى ءتارتىپ ورنىققان سوڭ دا ۇكىمەت ەلدى بولگەن قايشىلىقتى شەشۋدىڭ جولىن ىزدەستىرمەك بولىپ وتىر.
يران مەن ۋران
قازىر بۇل ەكى ۇعىم قاتار اتالادى. يراننىڭ ۋراندى جوعارى دەڭگەيدە بايىتقانىنا الەم قارسى. ويتكەنى, ودان قارۋلى ۋران الىنۋى مۇمكىن. عىلىمعا, باسقاعا كەرەك بولسا, جۇرتتىڭ كوز الدىندا بايىتىلعان ۋراندى باسقالاردان ال دەيدى. ءسويتىپ, بۇل ەل بايىتىلعان ۋراندى برازيليا مەن تۇركيادان الۋعا كەلىسىم جاساستى. ياعني, ءوزىنىڭ مىڭ جارىم تونناداي ۋرانىن جوعارى بايىتىلعان ءجۇز كيلودان استام ۋرانعا ايىرباستاي الادى. ايىرباستاۋ تۇرىك جەرىندە وتپەك.
جىعىلعانعا — جۇدىرىق
قورعانىس ماقساتىندا ءب ۇلىنىپ جاتقان قىرعىزستانمەن اراداعى شەكارانى كۇشەيتكەن ماقۇل شىعار, بىراق ونسىز دا قينالىپ جاتقان ەلگە ەكونوميكالىق قىسىم جاساۋ ارتىق ەكەنى داۋسىز. وزبەكستان قىرعىزستاننىڭ وڭتۇستىك وڭىرىنە تابيعي گاز بەرۋدى كۇرت قىسقارتتى. بۇرىن ءبىر ساعاتتا 2,5 مىڭ تەكشە مەتر گاز بەرىپ كەلسە, ەندى 800 تەكشە مەتر عانا بوساتادى. راس, قىرعىزداردىڭ وزبەكتەرگە قارىزى دا ايتارلىقتاي – 1,6 ميلليارد دوللار.
مارسەلدەگى مەشىت
تالاي رەت جوسپارلانىپ, ءتىپتى پارلامەنتتە دە تالقىلانىپ, بۇگىنگە دەيىن جۇزەگە اسپاعان مارسەل قالاسىنداعى مەشىت 2012 جىلى پايدالانۋعا بەرىلەدى. جانە ول بۇكىل فرانتسياداعى ەڭ ۇلكەن مەشىت بولماق. وندا ءبىر مەزگىلدە 7 مىڭ ادام ناماز وقيدى. جانە وندا مەدرەسە, كىتاپحانا, مەيرامحانا بولماق. ال جالپى فرانتسيادا بەس ميلليونداي مۇسىلمان بولسا, سونىڭ 250 مىڭدايى مارسەلدە تۇرادى.
بەلبەۋدى قىسقان ءجون
بيۋدجەت تاپشىلىعى ەۋروپانىڭ كوپ ەلىن قىسىپ تۇر. يسپانيا ۇكىمەتى سول تاپشىلىقتى ىشكى جالپى ءونىمنىڭ 11 پايىزى كولەمىنەن 6 پايىزى كولەمىنە دەيىن قىسقارتۋ ماقساتىندا قاتاڭ شارالار بەلگىلەپ, جۇزەگە اسىرا باستادى. بۇل شارالار 15 ميلليارد ەۋرو كولەمىندە ۇنەم جاساۋعا جەتكىزبەك. بۇل ءۇشىن بيىلدىڭ وزىندە بيۋدجەتتەگىلەردىڭ جالاقىسى 5 پايىزعا كەمىپ, 13 مىڭ بيۋدجەتتەگى قىزمەتكەر جۇمىستان بوسايدى.
حرۋششەۆتىڭ داڭعازاسى سەكىلدى
كورەيا حالىق-دەموكراتيالىق رەسپۋبليكاسىنىڭ كوسەمى كيم چەن ير حالىقتىڭ الدىنا كارتوپتى كوپ ءوندىرۋ مىندەتىن قويدى. راسىندا دا بۇل – وتە ءتۇسىمدى داقىل. اشقۇرساق ەلگە كەرەك-اق. ەلدە كارتوپتى كوپ ءوسىرۋ جونىندە ۇلكەن ناسيحات جۇرگىزىلىپ جاتىر. بۇل ءوزى كەزىندە كسرو كوسەمى نيكيتا حرۋششەۆتىڭ جۇگەرىنى كوپ ءوسىرۋ تۋرالى داڭعازاسىنا وتە ۇقساس كورىنەدى.
ۇرلىقتا دا رەكورد بار
پاريجدەگى قازىرگى ونەر مۋزەيىنەن قۇنى 90-100 ميلليون ەۋرو تۇراتىن كارتينالار ۇرلاندى. پاۆلو پيكاسسو, انري ماتيسسا سياقتى اتاقتى سۋرەتشىلەردىڭ شىعارمالارى قولدى بولىپتى. ءبىراز ادامدى سول شىعارمالاردىڭ ونەرلىك قۇندىلىعىنان گورى اقشالاي قۇندىلىعى كوبىرەك ويلاندىراتىن كورىنەدى. العاشىندا ۇرلانعان شىعارمالار قۇنى 500 ميلليون ەۋرو دەپ, ول رەكورد سانالسا, شىن مانىندە ول 100 ميلليون كولەمىندە بولىپ, 1990 جىلى مۋزەيدەن ۇرلانعان كارتينالاردىڭ باعاسىنا جەتپەي قالىپتى. بىرەۋلەر رەكورد بولماي قالدى دەپ, وعان وكىنەتىن سياقتى.
قاراقشىلارعا ءولىم جازاسى
يەمەن سوتى التى سوماليلىك قاراقشىنى ءولىم جازاسىنا, تاعى التاۋىن ون جىلعا سوتتادى. قاراقشىلار وتكەن جىلى يەمەننىڭ تانكەرىن باسىپ الىپ, كەمە كومانداسىنىڭ ەكى مۇشەسىن ولتىرگەن بولاتىن. جازا قاتال, بىراق ادىلەتتى دەپ قابىلداندى. وتكەن جىلى سوماليلىك قاراقشىلار تەك ادەن شىعاناعى مەن اراب تەڭىزىندە 217 رەت كەمەلەرگە قارۋلى شابۋىل جاساپتى.
قارىن — ەسىرتكى قويماسى
لاگوس اۋەجايىندا گەرمانياعا ۇشپاق بولعان 52 جاستاعى نيگەريالىق ساياساتكەر ەمە زۋرۋ ايورتور ۇستالدى. ونىڭ قارنىنان ەكى كيلو كوكاين تابىلىپتى. ول 100 گرامدىق پاكەتتەرگە سالىنعان ەكەن, ياعني 20 پاكەت! ۇستالعاندا ايتقان ءۋاجى: 2007 جىلعى سايلاۋدا كوپ شىعىندانىپتى, ەندى 2011 جىلعى سايلاۋعا دا قارجى كەرەك. سوعان اقشا جاساماق بولىپتى.
ازىرلەگەن ماماديار جاقىپ.
