اتالعان جوبا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كينەماتوگرافيا جانە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا ەنگىزىلدى.
«قازاقستان رەسپۋبليكاسىنداعى مەرەكەلەر تۋرالى» زاڭعا مىناداي وزگەرىستەر ەنگىزۋ جوسپارلانۋدا:
25 قازاندى ۇلتتىق مەرەكە – رەسپۋبليكا كۇنى دەپ بەلگىلەۋ;
16 جەلتوقسان مەملەكەتتىك مەرەكە – تاۋەلسىزدىك كۇنى بولىپ بەكىتىلەدى.
سونداي-اق 1 جەلتوقسان – تۇڭعىش پرەزيدەنت كۇنىن مەرەكەلىك كۇندەر تىزىمىنەن الىنادى.
زاڭ ەل پرەزيدەنتىنىڭ قول قويۋىنا ۇسىنىلادى.
«25 قازان ۇلتتىق مەرەكە - رەسپۋبليكا كۇنى بولىپ بەكىتىلدى. بۇل تاريحي جانە وتە ماڭىزدى شەشىم. ەلىمىزدىڭ تاۋەلسىزدىگى شىنىمەن دە وسى كۇننەن باستالادى. سوندىقتان بۇل كۇننىڭ ۇلتتىق مەرەكە رەتىندە بەلگىلەنۋى ماڭىزدى قادام. مەملەكەتتىلىك پەن ەگەمەندىكتىڭ تۇعىرى. بولاشاقتا بۇل مەرەكە تاۋەلسىزدىكتى دارىپتەپ, نىعايتا تۇسۋگە سەپتىگىن تيگىزەدى دەپ سەنەمىز», دەدى سەنات سپيكەرى ماۋلەن اشىمباەۆ سەنات وتىرىسىندا.
ۇلتتىق قۇرىلتايدىڭ ءبىرىنشى وتىرىسىندا پرەزيدەنت قاسىم-جومارت توقاەۆ رەسپۋبليكا كۇنىنە ۇلتتىق مەرەكە مارتەبەسىن قايتارۋدى ۇسىندى.
«رەسپۋبليكا كۇنى ەلىمىزدىڭ مەملەكەتتىلىككە دەگەن باتىل قادامىنىڭ نىشانى بولۋى ءتيىس. ارينە, تاۋەلسىزدىك كۇنى باستى مەملەكەتتىك مەرەكە بولىپ قالا بەرەدى. بۇل كۇنى تاۋەلسىزدىككە قول جەتكىزۋگە زور ۇلەس قوسقان حالىق قاھارماندارى قۇرمەتتەلۋى كەرەك», دەدى مەملەكەت باسشىسى.
بۇعان دەيىن قازاقستاندا رەسپۋبليكا كۇنى 25 قازاندا – 1990 جىلى قازاق كسر-ءنىڭ مەملەكەتتىك ەگەمەندىگى تۋرالى دەكلاراتسيا قابىلدانعان كۇنى تويلاناتىن, سونداي-اق دەمالىس كۇنى بولىپ بەكىتىلەتىن. 2009 جىلدان باستاپ رەسپۋبليكا كۇنى مەملەكەتتىك مەرەكە رەتىندە اتالماي كەلدى.
