قاسىم-جومارت توقاەۆ قازاقستاندىقتارعا جولداعان ۇندەۋىندە قازىرگى بيلىكتىڭ وكىلەتتىگى ءبولىنىپ, پرەزيدەنتتىڭ كەيبىر قۇزىرەتتەرى پارلامەنتكە بەرىلگەنىن مالىمدەدى.
ء«ماجىلىس پەن ءماسليحاتتار جاڭا ارالاس جۇيە بويىنشا جاساقتالادى. دەپۋتاتتاردىڭ ءبىر بولىگى پارتيالىق تىزىممەن, قالعانى ءبىر مانداتتى وكرۋگتەن سايلانادى. كونستيتۋتسيالىق سوت قۇرىلىپ, الداعى قاڭتار ايىنان جۇمىس ىستەي باستايدى. ادام قۇقىقتارى جونىندەگى ۋاكىل ينستيتۋتى كونستيتۋتسيالىق مارتەبەگە يە بولدى. بيلىكتىڭ بىرقاتار وكىلەتتىگى قايتا ءبولىنىپ, كەيبىر قۇزىرەتتەر پرەزيدەنتتەن پارلامەنتكە بەرىلدى», دەلىنگەن ۇندەۋدە.
مەملەكەت باسشىسى كونستيتۋتسياعا جەر جانە ونىڭ قويناۋى حالىققا تيەسىلى دەگەن جاڭا باپ ەنگىزگەنىن اتاپ ءوتتى.
«كونستيتۋتسياعا جەر جانە ونىڭ قويناۋى حالىققا تيەسىلى دەگەن باپ ەنگىزىلدى. مەن وسى ەرەجەنى جۇزەگە اسىرۋ ءۇشىن «ۇلتتىق قور – بالالارعا» دەگەن مۇلدە جاڭا باعدارلاما ۇسىندىم», دەدى پرەزيدەنت.
قاسىم-جومارت كەمەل ۇلى كونستيتۋتسيالىق رەفورما – جۇزەگە اسىرىلىپ جاتقان اۋقىمدى ساياسي جاڭعىرۋ باعدارلاماسىنىڭ اجىراماس بولىگى ەكەنىن قاداپ ايتتى.
«وسى باعدارلاما اياسىندا بەيبىت جينالىستاردى وتكىزۋ ءۇشىن الدىن-الا ەسكەرتۋ ءتارتىبى ەنگىزىلدى. ساياسي پارتيالاردى تىركەۋ ءراسىمى جەڭىلدەتىلىپ, تىركەۋدىڭ قاجەتتى شەگى تومەندەتىلدى. سايلاۋ الدىنداعى پارتيالىق ءتىزىمدى جاساقتاۋ جانە دەپۋتات مانداتتارىن ءبولۋ كەزىندە ايەلدەر مەن جاستار ءۇشىن 30 پايىزدىق كۆوتا ەنگىزىلدى. ساياسي پارتيالاردىڭ ماجىلىسكە ءوتۋ شەگى 7-دەن 5 پايىزعا تومەندەدى. سايلاۋ بيۋللەتەندەرىنە «بارىنە قارسىمىن» دەگەن باعان قوسىلدى. پارلامەنتتىك وپپوزيتسيا ينستيتۋتى قۇرىلدى. قىلمىستىق كودەكستىڭ 130-بابى قىلمىستىق دەپ تانىلمايتىن بولدى, 174-بابى ىزگىلەندىرىلدى. ءولىم جازاسى جويىلدى. اۋىل اكىمدەرىن تىكەلەي سايلاۋ تاسىلدەرى ەنگىزىلدى», دەلىنگەن پرەزيدەنت ۇندەۋىندە.
