كورمەنى اشۋ سالتاناتىندا قر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ ءسوز سويلەپ, بارلىق شارا قاتىسۋشىلارىن كووپەراتسيالىق ىنتىماقتاستىقتى دامىتۋعا جانە بىرلەسكەن جوبالاردى جۇزەگە اسىرۋعا شاقىردى.
«ونەركاسىپتىك ىنتىماقتاستىقتى دامىتۋدى ىنتالاندىرۋ بارلىق مۇددەلى ەلدەردىڭ يگىلىگى ءۇشىن وڭتايلى سەپتىگىن تيگىزەدى. ءبىزدىڭ ءوزارا ءتيىمدى كووپەراتسيا ودان ءارى دامۋىمىز ءۇشىن تۇراقتى تىرەك بولاتىنىنا ءۇمىتتىمىن», دەپ اتاپ ءوتتى مينيستر.
حالىقارالىق كورمەنىڭ اشىلۋ راسىمىنە قازاقستان ماشينا جاساۋشىلار وداعى باسقارماسىنىڭ توراعاسى مەيرام پشەمباەۆ, تۇركيا رەسپۋبليكاسىنىڭ قازاقستانداعى ەلشىسى ۋفۋ ەكيدجي, بەلارۋس رەسپۋبليكاسىنىڭ قازاقستانداعى ەلشىسى پاۆەل ۋريۋپين قاتىستى.
بيىل ەكىنشى مارتە ءوتىپ جاتقان كورمەگە وتاندىق وندىرۋشىلەرمەن قاتار الەمنىڭ 16 ەلىنەن كەلگەن 250-گە جۋىق كومپانيا قاتىسىپ جاتىر. شەتەلدىك قاتىسۋشىلاردىڭ قاتارىندا اۆستريا, بەلارۋس, گەرمانيا, دانيا, يزرايل, يسپانيا, يتاليا, رەسەي, تۇركيا, وزبەكستان, فرانتسيا, چەحيا, شۆەيتساريا, شۆەتسيا, وڭتۇستىك كورەيا جانە يران ەلدەرىنىڭ وكىلدەرى بار.
كورمەدە ماشينا جاساۋ, روبوتوتەحنيكا جانە اۆتوماتتاندىرۋ, تاۋ-كەن مەتاللۋرگيا كەشەنى, حيميا ونەركاسىبى, فارماتسەۆتيكا جانە مەديتسينا, اعاش وڭدەۋ جانە جيھاز ونەركاسىبى, سۋ ونەركاسىبى, قۇرىلىس يندۋسترياسى مەن جەڭىل ونەركاسىپ باعىتتارىنىڭ ونىمدەرى ۇسىنىلعان.
كورمە اياسىندا ەكىجاقتى كەزدەسۋلەر, كونفەرەنتسيالار مەن سەمينارلار ءوتىپ جاتقانىن دا ايتا كەتۋ كەرەك.
