«اقتوعاي-اگرو» جشس-نىڭ نەگىزىندە اشىلعان جاڭا كاسىپورىندا جىلىنا 10 مىڭ ليتر ءسۇت ساۋىلادى. سەرىكتەستىكتىڭ باس ديرەكتورى الەكساندر تەرەنتەۆ قازىرگى تاڭدا مۇندا سلوۆاكيادان ءسۇت جانە ەت باعىتىنداعى سيممەنتال تۇقىمدى 93 ءىرى قارا جەتكىزىلگەنىن ايتىپ ءوتتى. جىل سوڭىنا دەيىن تاعى مىڭنان اسا سيىر اكەلۋ جوسپارلانىپ وتىر.
الەۋەتتى فەرمانىڭ اشىلۋىنا قاتىسقان اۋىل شارۋاشىلىعى ءمينيسترى ەربول قاراشوكەەۆ پەن وبلىس اكىمى ابىلقايىر سقاقوۆ جوبانىڭ ماڭىزدىلىعىن اتاپ, ۇجىمعا تابىس تىلەدى.
جالپى, وڭىردەگى 36 تاۋارلى ءسۇت فەرماسىنىڭ ۇشتەن ءبىرى سوڭعى ەكى جارىم جىل ىشىندە ىسكە قوسىلعان. سونىڭ ارقاسىندا قوسىمشا 38 مىڭ توننا ءسۇت وندىرىلەدى. بۇل جوبالارعا 43 ملرد تەڭگە ينۆەستيتسيا ءبولىنىپ, اۋىلدىق جەرلەردە 500-دەن استام جاڭا تۇراقتى جۇمىس ورىندارى اشىلدى. الداعى ۋاقىتتا تاعى وسىنداي 8 فەرما پايدالانۋعا بەرىلەدى دەپ كۇتىلۋدە. مۇنىڭ بارلىعى وڭىردەگى سۋارمالى القاپتاردى ۇلعايتۋدىڭ ناتيجەسى. شارۋاشىلىقتار سۋارمالى تاناپتار ارقىلى قۇنارلى مال ازىعىن جەتكىلىكتى دايىنداۋعا كوشتى.
اقتوعايدا پايدا بولعان جاڭا كاسىپورىننىڭ قۇرىلىسىنا 6 ملرد تەڭگەدەن استام ينۆەستيتسيا قۇيىلعان. فەرمادا قازىرگى كۇنى 90 ادام جۇمىس ىستەيدى. سۋارمالى القاپتى دامىتۋ جۇمىستارىن جۇيەلى جۇرگىزەتىن «اقتوعاي-اگرو» جشس بىلتىر كارتوپتىڭ 9 ءتۇرىن جانە جۇگەرىنىڭ جاڭا سۇرىپتارىن ءوسىرۋدى قولعا العان. مۇندا مالعا ارنالعان جەمشوپ بازاسىن قۇرۋ ماقساتىندا جۇگەرىنىڭ گيبريدتى تۇرلەرى دە وسىرىلەدى.
ەرتىس-بايان ءوڭىرىنىڭ اگروونەركاسىپ كەشەنىندە 2025 جىلدىڭ سوڭىنا دەيىن 100-دەن استام ينۆەستيتسيالىق جوبانى ومىرشەڭ ەتۋ جوسپارلانعان. وعان 180 ملرد تەڭگە ينۆەستيتسيا قۇيىلماق.
پاۆلودار وبلىسى,
اقتوعاي اۋدانى
