وڭىرلىك مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باستاماسىمەن وبلىس ورتالىعىنىڭ ايالدامالارى تاريحتان تابارىك بەرەتىن ورىندارعا اينالۋدا. «تۇلعالار تاعىلىمى» دەپ اتالاتىن بۇل جوبانىڭ ماقساتى – تانىمال تۇلعالاردى قالا تۇرعىندارىنا ناسيحاتتاۋ, ولاردىڭ ءومىر جولى مەن شىعارماشىلىعىن تانىستىرۋ.
– ايالدامادا قوعامدىق كولىك كۇتىپ تۇرعان ادامدار بەلگىلى اقىن-جازۋشىلار مەن ونەر ادامدارىنىڭ شىعارماشىلىعىنان, قوعام قايراتكەرلەرىنىڭ مەملەكەتتىڭ دامۋىنا قوسقان ۇلەسىنەن, باتىرلاردىڭ جاساعان ەرلىگىنەن ازدى-كوپتى ماعلۇمات الا الادى. سولاردىڭ ىشىندە ولجاباي باتىر, كاۋكەن كەنجەتاەۆ, مۇقاعالي ماقاتاەۆ, ماعجان جۇماباەۆ, قالمۇقان يساباي, امانجول شامكەنوۆ, ديحان ابىلەۆ, قابدىكارىم ىدىرىسوۆ, قامار قاسىموۆ, ناعىمبەك نۇرمۇحاممەدوۆ, رافيقا نۇرتازينا, قازانعاپ بي, گەنەرال باكىروۆ, گەنەرال سماعۇلوۆ, اعايىندى دۇيسەنبينوۆ سىندى جاقىندا عانا ەسىمدەرى كوشەلەرگە بەرىلگەن تۇلعالار جايلى بەزەندىرىلگەن ايالدامالار دا بار. بۇعان قوسا بيىل 150 جىلدىعى تويلانىپ جاتقان الاشتىڭ ءبىرتۋار ازاماتى, ءتىل ءبىلىمىنىڭ اتاسى احمەت بايتۇرسىن ۇلى مەن ەل تاريحىندا ەلەۋلى ورىن العان شاحان مۋسين, رامازان توقتاروۆ, سەرجان قاناپيانوۆ سەكىلدى ءىرى تۇلعالاردىڭ ءومىر جولى دا قامتىلدى, – دەيدى باسقارمانىڭ ونوماستيكا جۇمىستارى جونىندەگى ءبولىم باسشىسى باتىربەك قايىر.
وسىلايشا وبلىس ورتالىعىندا ۇزىن سانى 19 تۇلعا جايلى ەرەكشە ديزاينمەن كەسكىندەلگەن مالىمەتتەر قالانىڭ 40-قا جۋىق ايالداماسىنا جاپسىرىلىپ, شاھاردىڭ ءسانىن ارتتىرا ءتۇستى. الداعى ۋاقىتتا بۇل جۇمىستاردىڭ اياسى كەڭەيەدى دەپ جوسپارلانعان.
«قالا جۇرتى مەن سىرتتان كەلگەن قوناقتار ءۇشىن بۇل ءبىزدىڭ جەرلەستەرىمىز بەن ۇلت ماقتانىشتارىن تانىتۋدىڭ ءبىر جولى دەۋگە بولادى. ءبىزدىڭ ءوڭىر عانا ەمەس, تۇتاس ەلىمىزدىڭ رۋحانياتىنا, مادەنيەتى مەن وزگە دە سالالارىنا ولشەۋسىز ۇلەس قوسقان داڭقتى ادامدار, تاريحي تۇلعالاردى كوپشىلىك تانىپ ءبىلۋى كەرەك. وسى تۇرعىدان العاندا جەرلەستەرىمىزگە, اسىرەسە جاستار مەن جاس ۇرپاققا بۇل ايالدامالاردىڭ ۇلگى-ونەگەسى مول بولماق.
ەكىنشىدەن اقپاراتتاردىڭ انا تىلىندە بەرىلۋى ءتىلىمىزدىڭ اياسىن كەڭەيتۋگە, ونى وزگە ۇلت وكىلدەرىنە ۇيرەتۋدە كومەگى زور بولادى دەپ ەسەپتەيمىن. اۆتوبۋس كۇتىپ تۇرعاندار ولارعا زەر سالىپ, نە جازىلعانىن زەردەلەپ جاتسا قۋانىش قوي. وڭىرلىك مادەنيەت باسقارماسىنىڭ بۇل باعىتتا ءالى دە ءبىراز جوسپارلارى بار كورىنەدى. ولاردىڭ ۇقىپتىلىقپەن, جاۋاپتىلىقپەن جۇزەگە اسا بەرۋىنە تىلەكتەسپىن», – دەيدى حالىقارالىق «قازاق ءتىلى» قوعامدىق بىرلەستىگىنىڭ وبلىستاعى فيليالىنىڭ توراعاسى, «نايزاتاس» جۋرنالىنىڭ باس رەداكتورى اسىل ابىشەۆ.
پاۆلودار
