جالعاندا ءوز كۇشىڭدى, ءوز ەرىك-جىگەرىڭدى, ءوز رەسۋرسىڭدى كوزگە ىلمەي, وزىڭە ءوزىڭ سەنبەي ءىس باستاۋدان ارتىق قيسىنسىز نە بار؟.. بىراق ءبىز وسىدان قيسىن ىزدەپ, ەسەككە تەرىس ءمىنىپ العان جاننىڭ كۇيىن كەشىپ كەلەمىز. بۇگىندە ەلىمىزدىڭ مادەني-رۋحاني الەمى جۇپىنى. قولعا الىنعان شارالار ماردىمسىز. حالىقتىڭ مادەني-رۋحاني سۇرانىسىن قاناعاتتاندىرۋدا شەتەلدىك ونىمدەردى كوشىرىپ, اۋدارىپ, نە ۇرلاپ الۋدان اسا الماي كەلەمىز. سودان كەلىپ, رۋحاني الەمىمىز جۇپىنى كۇيىندە قالىپ وتىر.
ءبىز شەتەلدىك نە وتاندىق رۋحانيسىماق ونىمدەرمەن حالقىمىزدىڭ شىنايى سۇرانىسىن قاناعاتتاندىرىپ بەرە المايتىنىمىزدى مويىنداۋىمىز كەرەك. بىراق بۇل مويىنداۋ ازىرگە ماڭدايىمىزعا جازىلار ەمەس. وسىلايشا, سىرتى جىلتىر, كوزدى اربار جات الەمنىڭ ىشىنە سەكىرىپ ءتۇسىپ, سودان الدەنە ىزدەپ, تاپقانىمىزدى جاھۇت ساناپ, ونى ءوز الەمىمىزگە تارتقىلاپ, تىقپىشتاپ, مۇنىمىزدى ۇلكەن ءبىر ءىس تىندىرعانداي كورىپ ءجۇرمىز.
قانشا جەردەن وزگە الەم اشىق بولعانىمەن ول ءبىز ءۇشىن جات. جات دۇنيە كىمگە بولسىن قاشاندا تۇسىنىكسىز ءارى قاراڭعى. ال سول قاراڭعى مەكەننەن قولىڭا وڭدى دۇنيە تۇسە قويۋى نەعايبىل. سونى ىشتەي بىلسەك تە تاس قاراڭعى جەرتولەدەن قاجەتىن ىزدەگەن جان سەكىلدى تۇرتىنەكتەپ اۋرەمىز. وسى اۋرەشىلىكتەن قۇتىلۋدىڭ جولى بار ما؟ بار.
ءبىرىنشى كەزەكتە, قازاقتىڭ رۋحاني سۇرانىسىن قاناعاتتاندىرۋدا ءوزىمىزدىڭ الەۋەتىمىزگە, باي قورىمىزعا يەك ارتۋعا مويىن بۇرۋ ماڭىزدى. ارىعا بارماي-اق, قازاقتىڭ تەلەگەي تەڭىزدەيىن جازبا ادەبيەتىنىڭ قورىنا ارقا سۇيەپ, ونداعى مۇرالاردى بۇگىنگى تالعامعا, زامان تالابىنا ساي جارىققا شىعارىپ, كينو تىلىمەن سويلەتىپ, تانىمدىق, مۋزىكالىق حابارلاردىڭ وزەگىنە اينالدىرىپ حالىققا ۇسىنۋ شەتەلدىك ارزانقول, بولمىسىمىزعا جات دۇنيەلەرگە جۇگىنۋدەن قۇتقارىپ, ساليقالى جولعا تۇسىرەر ەدى. بۇل ناعىز ءوزىمىزدىڭ تۇنىپ تۇرعان رەسۋرسىمىزدىڭ جەمىسىن جەۋگە الىپ كەلەدى.
ءبىزدىڭ ءوز بايلىعىمىزدى, ءوز الەۋەتىمىزدى دۇرىس, قاجەتتى دەڭگەيدە پايدالانا الماي وتىرعانىمىزدىڭ ءبىر دالەلى – باسقاسىن ايتپاعاندا, مۇحتار اۋەزوۆتىڭ كەرەمەت شىعارمالارىنىڭ ءوزىن كينو تىلىمەن سويلەتە الماي وتىرعانىمىز. بۇل ءبىر عانا مىسال-دالەل. بۇدان بولەك, ءوز دارا جولىن سالىپ كەتكەن قالامگەرلەرىمىزدىڭ, بۇگىنگى كلاسسيكتەرىمىزدىڭ ۇلتتىق بوياۋى قانىق, قىزىقتى دا شىم-شىتىرىق وقيعالارعا قۇرىلعان, كينو تۋىندىعا سۇرانىپ تۇرعان قانشاما شىعارماسى ەلەۋسىز جاتىر. بۇل دەگەن ۇلكەن مۇمكىندىك, ۇلكەن قور ەمەس پە؟ وسىناۋ مول الەۋەتكە نەگە مويىن بۇرماسقا؟ بۇعان مويىن بۇرۋعا ورەمىز جەتپەي مە, الدە قۇلقىمىز جوق پا؟
ءبىز بۇل جەردە ەشكىمگە تىڭنان تۇرەن سال دەپ وتىرعانىمىز جوق, تەك, قازاق قالامگەرلەرىنىڭ شىعارمالارىنان كوركەم فيلم ءتۇسىرۋدىڭ قالىپتاسقان تاماشا ءۇردىسىن ءارى قاراي ساتىمەن جالعاستىرۋ قاجەت ەكەنىن ايتقىمىز كەلەدى.
اتالعان جاعدايعا قاراپ, بۇگىنگى قازاقستان حالقىنىڭ رۋحاني-مادەني ءومىرىن ۇيىمداستىرۋشىلاردىڭ ۇلت ادەبيەتىنىڭ جاۋھارلارىنان حابارسىز ەكەنىن اڭعاراسىڭ. سونداي-اق ءىس باسىندا جۇرگەندەردىڭ جان دۇنيەسى قازاقتىڭ شىنايى, ۇلتتىق بولمىس-بىتىمىنەن تىم الشاقتاپ كەتكەندەي كورىنەدى. ەگەر بۇلاي بولماسا, ۇلتتىق ادەبيەتىمىزدىڭ مول قورىنداعى تالاسسىز تاماشا تۋىندىلار سورەلەردە «قاڭتارىلماي», زاماناۋي تەحنولوگيالار ارقىلى حالقىمىزبەن قايتا قاۋىشىپ, رۋحاني تىرەگىمىزگە اينالار ەدى عوي.
بۇگىندە مەملەكەت اقپاراتتىق-تانىمدىق, رۋحاني-مادەني سالاعا قاتىستى كونتەنتتى وتاندىق ونىمدەرمەن تولتىرۋ ماقساتىندا قىرۋار قارجى ءبولىپ, قولداۋ بىلدىرۋدە. بۇل قارجىلاردىڭ قايتارىمى – ازىرگە جارناماسى «جارىپ» تۇرعان, بىراق, نازار اۋدارساڭ جانىڭدى سىزداتار, كەيىپكەرلەرى ورىسشا مەن قازاقشانى ارالاستىرىپ سويلەيتىن, ديالوگى تارتىمسىز, وقيعاسى جاتتاندى, ۇلتتىق-تانىمدىق بوياۋى سولعىن نەمەسە بولمىسىمىزعا جات, جەڭىل ازىلگە قۇرىلعان, قويىرتپاق دۇنيەلەر. ءبىر قىنجىلتاتىنى, وسىنداي كۇلدىبادام, تالعامسىز, بىراق حالىقتىڭ قارجىسىنا تۇسىرىلگەن كورسەتىلىمدەر الدىن الا ەلەكتەن وتكىزىلمەي كورەرمەنگە ۇسىنىلا بەرەدى. وسى ورايدا حالىق قارجىسىنا فيلم تۇسىرەتىندەرگە قويىلاتىن نەگىزگى تالاپ – قازاق ادەبيەتىندە ورنى بار ىرگەلى شىعارمالارعا نازار اۋدارتۋ بولۋ كەرەك. سوندا عانا شەتەلدىك نە وتاندىق ارزانقول دۇنيەلەر كەيىنگى ىسىرىلىپ قالادى. بۇل قازاق ۇلتىنىڭ جەڭىسى بولماق.
