«جاڭا ستراتەگيانىڭ ناتيجەسىندە وندىرىستىك تۇرعىدا جاقسى كورسەتكىشتەرگە قول جەتكىزىلدى. بيىل ءبىرىنشى جارتىجىلدىقتاعى تازا تابىس 1,6 ملرد تەڭگەگە جەتتى. بىلتىر ءبىز 4,8 ملن جولاۋشىعا قىزمەت كورسەتتىك, ال 2022 جىلدىڭ قاڭتار-تامىز ايلارىندا جولاۋشىلار اعىنى 3,5 ميلليوننان استى. جىلدىڭ سوڭىنا قاراي بۇل كورسەتكىش 5,3 ميلليونعا جەتىپ, تابىس 68 ملرد تەڭگە دەڭگەيىندە بولادى دەپ كۇتىلۋدە. بۇل وتكەن جىلمەن سالىستىرعاندا 15,8 پايىزعا جوعارى بولماق», دەدى استانا قالاسىنداعى اۋەجايدىڭ وكىلى.
اۋەجايدا شىعىنداردى وڭتايلاندىرۋ جانە قوسىمشا كىرىس تۇرلەرىن دامىتۋ ارقىلى تابىستىڭ ۇلعايۋىنا قول جەتكىزىلگەن. لوكداۋن كەزىندە قارجىلاي تۇراقتىلىقتى ساقتاۋ ءۇشىن وپەراتسيالىق شىعىندار قىسقارتىلىپ, تۇراقتى ترانزيتتىك جۇك اۆيارەيستەرىنىڭ ۇلكەن كولەمىن تارتۋ ماقساتىندا ايتارلىقتاي كۇش-جىگەر جۇمسالعان. وسىلايشا, ەلدەر اراسىنداعى شەكارالاردىڭ جابىلۋى كەزەڭىندە كوپتەگەن شەتەلدىك اۆياكومپانيالار استانا اۋەجايىن ەۋروپادان ازياعا ترانزيتتىك ايالداما رەتىندە پايدالانا باستادى.
«قازىرگى تاڭدا مۋلتيمودالدىق جانە ترانزيتتىك جۇك تاسىمالدارىنا باسىمدىق بەرۋ دۇرىس شەشىم بولعانىن كورىپ وتىرمىز. 2021-2022 جىلدارداعى كىرىستىڭ شامامەن 70%-ى اۋەجايدىڭ ترانزيتتىك جۇك رەيستەرىنە قىزمەت كورسەتۋگە قايتا باعدارلانۋى ەسەبىنەن الىنعان. اۋەجاي العاش رەت وپەراتسيالىق پايداعا شىعىپ, نەسيە بەرۋشىلەر الدىنداعى بارلىق مىندەتتەمەنى ورىندادى», دەپ تولىقتىردى د.حامزين.
الىنعان كىرىستەر ەسەبىنەن كاسىپورىن دەفولتتان قۇتىلىپ, تاريفتەردى كوتەرمەي-اق داعدارىس كەزەڭىنەن شىقتى. بۇل ءوز كەزەگىندە وتاندىق اۆياكومپانيالارعا قاتىستى جۇكتەمەنى ازايتتى. سونىمەن قاتار لوكداۋنعا قاراماستان, اتالعان اۋەجاي مەن ونىڭ كوكشەتاۋ قالاسىنداعى فيليالىنىڭ 2 مىڭنان استام قىزمەتكەرى جۇمىس ورىندارىن ساقتاپ قالدى. كاسىپورىن قىزمەتكەرلەر الدىنداعى بارلىق الەۋمەتتىك مىندەتتى تولىق كولەمدە وتەپ, ەڭ تومەنگى جالاقى كولەمىن 40%-عا ارتتىردى.
جۇمىس بارىسىنداعى باسىمدىقتاردى قايتا قاراۋ ناتيجەسىندە اۋە ايلاعىنىڭ ودان ءارى دامۋى ءۇشىن جاعداي جاسالدى. بۇگىنگى تاڭدا كۇزگى-قىسقى ناۆيگاتسيا جۇمىستارىنا دايىندىق جۇرگىزىلۋدە. كەز-كەلگەن اۋا-رايى جاعدايىندا ۇزدىكسىز جۇمىس ىستەۋ ماقساتىندا قار جينايتىن 5 زاماناۋي ماشينا ساتىپ الىندى. ولار ۇشۋ-قونۋ جولاعى مەن پەرروندى تازارتۋدى ەداۋىر جىلدامداتادى.
