قازىرگى ۋاقىتتا پاۆلودار وبلىسىندا سۋارمالى جەرلەر قارقىندى دامۋدا. ايماقتاعى ەگىن وسىرۋشىلەرگە ەرتىس وزەنى مەن ق.ساتباەۆ اتىنداعى سۋ ارناسى ۇلكەن مۇمكىندىك كوزى بولىپ وتىرعانى ءسوزسىز. دەگەنمەن بۇل سالادا دا كۇرمەۋلى ماسەلەلەر از ەمەس. ءوڭىردىڭ ءبىر توپ شارۋاشىلىعى ارنا بويىنداعى سۋ سورعىلارىن ەلەكتر جارىعىنا قوسۋ ءۇشىن تەحنيكالىق نەگىزدەمەلەرگە قول جەتكىزە الماي جۇرگەنىنە بىرنەشە جىلدىڭ ءجۇزى بولعان. وڭىرگە جۇمىس ساپارىمەن كەلىپ, فەرمەرلەرمەن كەزدەسكەن اۋىل شارۋاشىلىعى ءمينيسترى ەربول قاراشوكەەۆ بۇل تۇرعىدا ەكولوگيا مينيسترلىگىمەن اقىلداسا وتىرىپ, ديقاندارعا كومەك مىندەتتى تۇردە كورسەتىلەدى دەپ ۋادە بەردى.
– وزگە القاپتاردى ۇلعايتۋ تۋرالى دا ويلاستىرۋ كەرەك. ەڭ باستىسى, ماگيسترالدىق ارنالاردىڭ سۋى ەگىس تاناپتارى مەن شابىندىق جەرلەرگە جەتۋى ءۇشىن ينجەنەرلىك كوممۋنيكاتسيالاردى تارتۋ قاجەت. قارقىندى سۋلاندىرۋ بويىنشا بار ءۇمىت پاۆلودار وبلىسىنا ارتىلادى دەسەم, ارتىق بولماس. سۋارمالى القاپتار – وتاندىق اۋىل شارۋاشىلىعىنىڭ بولاشاعى. 2030 جىلى رەسپۋبليكا بويىنشا جاڭبىرلاتىپ سۋارۋ جۇيەسى 750 مىڭ گەكتارعا جەتۋگە ءتيىس. بۇگىن ءبىراز شارۋاشىلىقتا بولىپ, بايقاعانىم, سىزدەردەگىدەي الەۋەتتى سۋ رەسۋرستارى جانە قارقىندى سۋلاندىرۋعا ارنالعان الاڭدار باسقا ەشبىر وبلىستا جوق. جەرگىلىكتى شارۋاشىلىقتار قىتاي, تۇرىك, ەۋروپالىق جانە امەريكالىق وندىرىستەن شىققان سۋارۋ جۇيەلەرىن ورناتۋدا. بۇگىندە سۋارمالى تەحنولوگيانى ورناتاتىنداردىڭ شىعىنى 50%-عا دەيىن سۋبسيديالانادى. بۇل ىنتالاندىرۋعا وڭ اسەر ەتتى, – دەدى ە.قاراشوكەەۆ.
پاۆلودارلىق فەرمەر ەربول دوسىباەۆ مينيسترگە كۇركەتاۋىق ەتىن ينۆەستيتسيالىق سۋبسيديالاۋعا قوسۋدى ۇسىندى. ونىڭ شارۋاشىلىعى اتالعان ءونىم ءتۇرى بويىنشا بولاشاعى زور جوبانى قولعا العان. جاقىن ۋاقىتتا وتاندىق كۇركەتاۋىق ەتى رەسەي, قىرعىزستان ەلدەرىنە شىعارىلماق.
وڭىردەگى استىقتى ولكەلەر – ەرتىس, جەلەزين, اقتوعاي, ۋسپەن جانە تەرەڭكول اۋداندارىنىڭ ديقاندارى «ازىق-ت ۇلىك كەلىسىمشارت كورپوراتسياسى» بيىل بيدايدى فورۆاردىق ساتىپ الۋدا قانداي باعا بەلگىلەيتىنىن سۇرادى. ءمينيستردىڭ سوزىنشە, ساپاسىنا بايلانىستى بيدايدىڭ تونناسى 121-125 مىڭ تەڭگە ارالىعىندا باعالانباق. ال قاراقۇمىقتىڭ تونناسىن كومپانيا 170 مىڭ تەڭگەدەن ساتىپ الۋعا دايىن.
بيىل ەلىمىزدىڭ ديقاندارى 13,5 ملن تونناعا جۋىق استىق جينايدى دەپ بولجانۋدا. قازىر ەگىس تاناپتارىنىڭ 70 پايىزى ورىلدى, ەل بويىنشا گەكتارىنان ورتاشا ونىمدىلىك 12,3 تسەنتنەردى قۇراپ وتىر. ەلىمىز كەلەسى ناۋقانعا دەيىن استىقپەن, كارتوپ جانە مايلى داقىل تۇرلەرىمەن ءوزىن تولىق قامتاماسىز ەتە الاتىنىنا بايلانىستى كەيبىر ونىمگە بەلگىلەنگەن ەكسپورتتىق كۆوتالار الىنىپ تاستالدى. الداعى كۇندەرى كۇنباعىس داقىلى بويىنشا شەكتەۋ دە جويىلادى. ناتيجەسىندە, شارۋالار ءوز ونىمدەرىن سىرتقا ەش كەدەرگىسىز شىعارا الادى. دەگەنمەن, ەڭ باستىسى وڭىرلەر وزدەرىنىڭ تۇراقتاندىرۋ قورلارىن قامداپ الۋعا ءتيىس.
اتاپ وتەرلىگى, بيىل جىل باسىنان شارۋالارعا مەملەكەتتەن 450 ملرد تەڭگە سۋبسيديا تولەنگەن. الايدا تەحنيكا مەن گەربيتسيد قۇنىنىڭ شارىقتاپ كەتۋىنە بايلانىستى كەيبىر شارۋاشىلىقتار دەمەۋقارجىنى جەتكىلىكتى مولشەردە الا الماي قالدى. بۇل ءۇشىن بيۋدجەتتەن قوسىمشا قاراجات بولىنەدى. ە.قاراشوكەەۆ فەرمەرلەر تاراپىنان كوتەرىلگەن جايىلىم تاپشىلىعى, جاڭا ونىمگە باعا بەلگىلەۋ, ەكسپورتتى قولداۋ, كووپەراتيۆتەردى سۋبسيديالاۋ جانە تاعى باسقا ماسەلەلەرگە ورنىقتى جاۋاپ بەرىپ, كەيبىر تۇيتكىلدەردى جەكە نازارىنا الاتىنىنا ۋادە بەردى. مەملەكەت باسشىسىنىڭ تاپسىرماسى بويىنشا 2022-2023 جىلدارى ەلىمىزدە ءتيىمسىز پايدالانىلىپ وتىرعان 10 ملن گەكتار جەر ورتاق يگىلىككە قايتارىلۋى كەرەك. بۇگىندە جالپى كولەمى 3,5 ملن گەكتار بوس جاتقان جەر مەملەكەت مەنشىگىنە وتكەن.
جالپى, وتاندىق اگروونەركاسىپ كەشەنى جىلدىڭ العاشقى 8 ايىندا 4,3 پايىز ءوسىم كورسەتىپ, سونىڭ ىشىندە وسىمدىك شارۋاشىلىعىنىڭ ءوندىرىسى 10,5 پايىزعا ۇلعايعان.
پاۆلودار وبلىسى,
اقتوعاي اۋدانى
