كوللاجدى جاساعان زاۋرەش سماعۇل, «EQ»
17 تىرەك مەكتەپتى جابدىقتاۋعا «قازاقستان حالقىنا» قورىنان 4,25 ملرد تەڭگە بولىنگەن. ەلىمىزدىڭ 17 وڭىرىندە نزم وقىتۋ ادىستەمەسى بويىنشا اۋىلدىق تىرەك مەكتەپتەر جابدىقتالىپ, ولاردىڭ ارقايسىسىن جاراقتاندىرۋعا 250 ملن تەڭگەدەن باعىتتالادى. جوبانى ىسكە اسىرۋ اۋىل وقۋشىلارىنا وزدەرى تۇراتىن جەردە ساپالى ءبىلىم الۋعا, سونداي-اق ءبىلىم بەرۋ رەسۋرستارىن شوعىرلاندىرۋعا مۇمكىندىك بەرەدى.
12 قىركۇيەكتە وسىنداي تىرەك مەكتەپتەردىڭ ءبىرىنىڭ تۇساۋكەسەرىنە «قازاقستان حالقىنا» قوعامدىق قورىنىڭ باسقارما توراعاسى بولات جامىشەۆ, Beeline Kazakhstan باس اتقارۋشى ديرەكتورى ەۆگەني ناسترادين, «نزم» دببۇ باسقارما توراعاسى كۇلاش ءشامشيدينوۆا, ءبىلىم بەرۋدى تۇراقتى دامىتۋ قورىنىڭ قۇرىلتايشىسى, Aitas حولدينگىنىڭ باسشىسى سەرىك تولىقپاەۆ, اقمولا وبلىسى اكىمىنىڭ ورىنباسارى ەلدوس رامازانوۆ جانە باق وكىلدەرى قاتىستى.
مەكتەپتە 39 كابينەت پەن ءۇي-جاي جاڭارتىلىپ, جيھاز بەن جابدىقتار جيىنتىعى, وقىتۋدىڭ تەحنيكالىق قۇرالدارى, قۇرال-سايماندار مەن كەرەك-جاراقتار, كورسەتۋ قۇرالدارى, ساندىك-كوركەم بۇيىمدار, باسپا قۇرالدارى ساتىپ الىندى. سونىڭ ىشىندە بەينەقابىرعا مەن اقپاراتتىق كيوسك, ارت-ستۋديا, ونلاين ساباقتار مەن شەبەرلىك ساباقتارىن جازۋعا ارنالعان تەلەستۋديا, شەبەرحانالار بار. قازىر ساباقتار ينتەراكتيۆتى پانەلدەردى, جاڭا قۇرىلعىلار مەن دەمونستراتسيالىق ماتەريالداردى قولدانا وتىرىپ جۇرگىزىلۋدە. سونداي-اق وقۋ ورنىندا مەكتەپ جاسىنا دەيىنگى بالالارعا ارنالعان شاعىن ورتالىق بار.
«16 قىركۇيەكتە «قازاقستان حالقىنا» قورى ۇلتتىق قايىرىمدىلىقتىڭ ءى كونفەرەنتسياسىنىڭ قورىتىندى وتىرىسىن وتكىزەدى. وسى كونفەرەنتسيا اياسىندا 1 173 ۇەۇ وكىلدەرىنىڭ قاتىسۋىمەن 43 zoom-كونفەرەنتسيا وتكىزدىك. بارلىق وڭىردە 20 دوڭگەلەك ۇستەل ۇيىمداستىرىلىپ, وعان 3 مىڭ ازامات قاتىستى. قور باعدارلاماسىنىڭ تۇجىرىمداماسىن, پروسپەكتىسىن جانە ازاماتتىق قوعامنىڭ ۇسىنىستارىن تالقىلادىق. دوڭگەلەك ۇستەلدە ايتىلعان ماڭىزدى باعىتتاردىڭ ءبىرى – اۋىل ءبىلىمىن دامىتۋ. اۋىلدىق ءبىلىم بەرۋدى قولداۋ قاجەت دەگەندە, ەڭ الدىمەن, تىرەك مەكتەپتەردى كوتەرۋ كەرەك. بۇل تۋرالى ء«بىلىم تۋرالى» زاڭىندا دا ايتىلعان. بۇل مەكتەپتەر جاقىن ماڭداعى اۋىل مەكتەپتەرى ءۇشىن دەمەۋ بولۋعا ءتيىس. قازىر حالىقتىڭ جارتىسىنا جۋىعى اۋىلدىق جەردە تۇرادى. سوندىقتان اۋىل وقۋشىلارى قالاداعى قۇرداستارى سەكىلدى مۇمكىندىكتەرگە يە بولۋى كەرەك», دەپ اتاپ ءوتتى ب.جامىشەۆ.
مەكتەپتەردەگى وزگەرىستەردى العاشقىلاردىڭ ءبىرى بولىپ وقۋشىلاردىڭ وزدەرى باعالادى. مەكتەپتە بارلىعى 365 بالا ءبىلىم الىپ, 45 مۇعالىم ساباق بەرەدى.
«جازعى دەمالىستان ورالىپ, مەكتەپكە كەلگەنىمىزدە تاڭعالدىق. بارلىق جەرگە زاماناۋي جيھاز, جاڭا قۇرالدار قويىلعان. ءاربىر كابينەت ەرەكشە جاسالعان. ءۇزىلىس كەزىندە ويىندارعا ارنالعان جەكە ورىندار بار. بىزگە ءبارى ۇناپ وتىر. ەندى جاقسى وقۋىمىز كەرەك», دەدى 6-سىنىپ وقۋشىسى توميريس كيىزباي.
جوبا بويىنشا وپەراتسيالىق شىعىنداردى «قازاقستان حالقىنا» قورىنىڭ سەرىكتەسى – ءبىلىم بەرۋدى تۇراقتى دامىتۋ قورى ءوز موينىنا الدى. بولىنگەن 4,25 ملرد تەڭگەنىڭ 2 ملرد تەڭگەسىن Beeline Kazakhstan كومپانياسى جىبەرگەن. جوبانىڭ باس سەرىكتەستەرىنىڭ ءبىرى – «نزم» دببۇ. مەكتەپ بارلىق قۇرىلىمدىق بولىمشەمەن بىرگە اۋىلدىق مەكتەپكە تەگىن ادىستەمەلىك قولداۋ كورسەتىپ, مۇعالىمدەردىڭ بىلىكتىلىگىن ارتتىرادى. ايتا كەتۋ كەرەك, پەداگوگتەردى وقىتۋ جانە كابينەتتەردى جابدىقتاۋ كەزىندە نزم تاجىريبەسى مەن ۇسىنىستارى پايدالانىلدى.
ء«بىز قاجەتتى جابدىقتارمەن قامتاماسىز ەتىپ قانا قويماي, ەڭ ماڭىزدىسى – تىرەك مەكتەپتەردى قۇرۋ جانە دامىتۋ جونىندەگى جوبادا وزىق ءبىلىم بەرۋ الەۋەتى بار نزم رەسۋرستارىن دا پايدالانامىز. وسىلايشا, اۋىل مەكتەپتەرىنە ۇزدىك پەداگوگيكالىق تاجىريبەلەر مەن ادىستەمەلەر ەنگىزىلەدى», دەپ اتاپ ءوتتى «قازاقستان حالقىنا» قورىنىڭ باسشىسى ب.جامىشەۆ.
نزم كومەگىمەن قازان ايىندا مەكتەپتە وقۋ-تاربيە جۇمىسىنىڭ بارلىق اسپەكتىسىن كەشەندى زەرتتەۋ باستالىپ, وقۋ ورنىنىڭ قىزمەتىن جاقسارتۋ ءۇشىن تالداۋ توبى قۇرىلادى.
وسى جىلدىڭ سوڭىنا دەيىن سەرىكتەستەردىڭ قاتىسۋىمەن قوردىڭ «اۋىلدىق جەرلەردەگى تىرەك مەكتەپتەردىڭ الەۋەتىن دامىتۋ» قايىرىمدىلىق جوباسى اياسىندا ەلىمىزدىڭ وزگە وڭىرلەرىندە 16 اۋىلدىق تىرەك مەكتەپ جاڭعىرتىلادى.
ال 17 قىركۇيەكتە قاتاركولدەگى مەكتەپتە اشىق ەسىك كۇنى ۇيىمداستىرىلىپ, اتا-انالار, قوعام پەن ساراپشىلار قاۋىمداستىعىنىڭ وكىلدەرى, جاقىن ماڭداعى اۋىلداردىڭ ۇستازدارى مەن وقۋشىلارى تىرەك مەكتەپتىڭ الەۋەتىمەن تانىسا الادى.
ەسكە سالساق, «قازاقستان حالقىنا» قوعامدىق قورى 16 قىركۇيەكتە ەلوردادا ۇلتتىق قايىرىمدىلىق بويىنشا ءى كونفەرەنتسيانىڭ قورىتىندى وتىرىسىن وتكىزەدى. جيىن – ۇلتتىق قايىرىمدىلىقتى دامىتۋ ماسەلەلەرى بويىنشا مەملەكەت, بيزنەس جانە ۇەۇ اراسىنداعى ديالوگ الاڭى. «قازاقستان حالقىنا» قورىنىڭ نىسانالى باعىتتارىن, وتاندىق قايىرىمدىلىق سالاسىنىڭ يننوۆاتسيالىق ادىستەرىن, ماسەلەلەرى مەن پروگرەسسيۆتى شەشىمدەرىن تالقىلاۋ جوسپارلانۋدا.
