مۇقاعاليداي بولمىسى بولەك, جىرلارىنىڭ جاراتىلىسى كۇردەلى اقىندى تەاتر ساحناسىنا جۇرەكسىنبەي الىپ شىعۋعا ىلۋدە ءبىر ونەر ۇجىمىنىڭ بەل بايلايتىنىن كورىپ ءجۇرمىز. ج.ايماۋىتوۆ اتىنداعى پاۆلودار وبلىستىق قازاق مۋزىكا-دراما تەاترى بىلتىر ايتۋلى تۇلعانىڭ 90 جىلدىعىنا وراي «ەسىڭە مەنى العايسىڭ» اتتى مۋزىكالى-پوەتيكالىق كەشتىڭ تۇساۋىن كەسىپ, تەاتردا ەكى كۇن قاتارىنان انشلاگ جاساعان ەدى.
ءحانتاڭىرىنىڭ مۇزبالاعى مۇقاعاليدىڭ سونداعى شىنايى بەينەسىن كەرەكۋلىك جۇرت جىلى قابىلداعان بولاتىن. بيىل اتالعان ونەر ۇجىمى جاڭا ماۋسىمنىڭ شىمىلدىعىن سول تۋىندىمەن ءتۇردى. اقىن تاعدىرىنداعى قات-قابات قيىنشىلىقتار مەن قايعى-مۇڭعا قۇرىلعان قويىلىمعا بۇل جولى دا جەرگىلىكتى ونەرسۇيەر قاۋىم تايلى-تاياعى قالماي جينالدى.
كەشتە اقىننىڭ سوزىنە جازىلعان «انا, سەن باقىتتىسىڭ», «كۇرەڭ كۇز», «بوپەم-اي», «قۇمعان العان», «مەن دەپ ويلا», «قازاعىم-اي», «سارىجايلاۋ», «وتان», «قاراسازىم-اي» جانە تاعى دا باسقا اندەر سيمفونيالىق وركەستردىڭ سۇيەمەلدەۋىمەن شىرقالدى. مۇقاعالي وبرازىن بىلتىرعى پرەمەراداعىداي اكتەر باۋىرجان ماناتبەك سومدادى. دراماتۋرگياسىن نۇركەن تۇرلىبەك جازعان بۇل قويىلىمدا زاماناۋي جاڭاشىلدىق, ىزدەنىس بايقالادى. ءبىر ساعاتتان استام ۋاقىتقا سوزىلاتىن كەش كورەرمەندى بىردەن باۋراپ, جالىقتىرمايتىن سازدى, ساعىنىشتى اۋاندا ءوربيدى. اقىننىڭ نازىك جانىن ءتۇسىنۋ ءۇشىن بۇل كەشتى پوەزيانى ءسۇيىپ وقيتىن قاۋىم مىندەتتى تۇردە كورۋى كەرەك دەپ تۇيدىك. قاراولەڭنىڭ قۇدىرەتى ارقىلى قازاق پوەزياسىندا وزىندىك قايتالانباس قولتاڭباسىن قالدىرىپ كەتكەن مۇقاعالي جايلى بۇل قويىلىم كەلەشەكتە تەاتر رەپەرتۋارىنداعى ورنى بولەك, جۇگى سالماقتى دۇنيەنىڭ بىرىنە اينالاتىنىنا سەندىك.
تەاتر باسشىسى ارمان تەمىربەك وزدەرىنىڭ الداعى كۇندەرى استانا مەن قاراعاندىعا گاسترولدىك ساپار جوسپارلاپ وتىرعاندارىن ايتتى. ودان سوڭ ورال قالاسىندا بولاتىن مونوسپەكتالدەر فەستيۆالىنە شەكسپيردىڭ «كورول ليرىمەن» قاتىسپاق نيەتتە ەكەن.
– بيىل كورەرمەندەرىمىز ءۇشىن قاراشا ايىندا «پرەمەرالار اپتالىعىن» وتكىزبەكپىز. سونىڭ اياسىندا 3 بىردەي سپەكتاكلدىڭ تۇساۋىن كەسەمىز. ازىرشە تۇساۋكەسەر جوسپاردا تۇر, بىراق ونىڭ ساحنالىق ارلەنۋىنە, ارتىستەردى دايارلاۋعا ءبىراز كۇش جۇمساۋعا تۋرا كەلەتىن سياقتى. سونداي-اق الماتىدان تەاتر سىنشىلارىن شاقىرىپ, ساحناعا العاش رەت شىعارعالى وتىرعان سپەكتالدەرىمىزدى تالداتىپ الساق دەيمىز. وسى ماۋسىمدا قاتارىمىزعا جاڭادان 2 جاس اكتەر قوسىلادى دەپ كۇتىپ وتىرمىز, – دەيدى تەاتر ديرەكتورى.
ايتۋىنشا, ونەر مەكەمەسىندە ءبىراز جىلدان بەرى قوردالانىپ قالعان ماسەلەلەر بار. ارتىستەر ەل ارالاعاندا ءجۇرىپ-تۇراتىن شاعىن اۆتوبۋس وتە ەسكى, الىس جولعا جارامسىز. ونىڭ ۇستىنە تەاتر قىزمەتكەرلەرىن باسپانامەن قامتۋ ماسەلەسى وتكىر تۇر. ءبىر جىلدارى 9 بولمەدەن تۇراتىن جاتاقحانا بەرىلگەن ەكەن. اياداي عانا بولمەلەر وتباسىن قۇرىپ, ءۇيلى-باراندى بولعاندارعا تارلىق ەتۋدە. سوندىقتان وبلىس باسشىلىعى بۇل ماسەلەگە نازار اۋدارسا ەكەن دەگەن تىلەگىن جەتكىزدى. جۋىردا وبلىستىق ءماسليحاتتىڭ حاتشىسى ەرنۇر ايتكەنوۆ باستاعان ءبىر توپ حالىق قالاۋلىسى ارنايى كەلىپ, مۇنداعى جاعدايمەن تانىسىپ كەتكەن كورىنەدى. دەپۋتاتتار توبىنىڭ سول ساپارىندا قاۋزالعان ماسەلەلەر بويىنشا ناتيجە شىعارىنا سەنىپ وتىر.
ءسوز اراسىندا ارمان تەمىربەك وبلىستارداعى تەاتر قىزمەتكەرلەرىنىڭ ەڭبەكاقىسى وتە تومەن ەكەنىن, بيىلدان ۇلتتىق مارتەبەگە يە رەسپۋبليكالىق تەاتر اكتەرلەرىنىڭ جالاقىسى ارتىپ جاتقانى جۋىق ارادا وڭىرلەرگە دە وڭ تاجىريبە بولىپ ەنگىزىلسە ەكەن دەگەن ۇكىلى ءۇمىتىن دە جەتكىزدى. از عانا جالاقىعا اكتەرلەر تۇرماق, تەاتردىڭ تەحنيكالىق قىزمەتكەرلەرىن ۇستاپ وتىرۋ دا قيىن شارۋا كورىنەدى. بۇل بۇيىمتايلاردى وبلىستىڭ مادەنيەت سالاسىنا جاۋاپتى شەنەۋنىكتەر ەسكەرەدى دەگەن ويدامىز.
پاۆلودار وبلىسى
