قازىرگى ۋاقىتتا ارنايى بولىنگەن 12 گا اۋماقتا 91 ءۇي سالىنىپ جاتىر, ارقايسىسىنىڭ اۋدانى – 100 شارشى مەتر. سونداي-اق ۇيلەردىڭ ماڭايىنداعى جەر ۋچاسكەلەرىنە بارلىق قاجەتتى ينفراقۇرىلىم – گاز, سۋ, ەلەكتر ەنەرگياسى جۇرگىزىلەدى. ۇيلەرگە اپارار جولدارعا اسفالت سالىنادى.
وبلىس اكىمىنىڭ ءبىرىنشى ورىنباسارى عاۋەز نۇرمۇحامبەتوۆتىڭ ايتۋىنشا, قازقسعزي جوبالاۋ ينستيتۋتى تۇرعىنجايلاردى سۋ باسۋدىڭ الدىن الۋ ماقساتىندا گەولوگيالىق ىزدەنىستەر نەگىزىندە ىرگەتاستاردى جەراستى سۋلارىنان 2,5 م قاشىقتىقتا ورناتۋ بويىنشا جوبا ازىرلەدى. 7 قىركۇيەكتە 13 مەردىگەرلىك ۇيىم قۇرىلىس جۇمىستارىنا كىرىستى. بۇگىنگى تاڭدا بارلىق ۇيلەرگە ارناپ قازانشۇڭقىرلار قازىلدى, 55 ۋچاسكەدە ىرگەتاس قۇيىلىپ, ەكەۋىندە ىرگەتاس بلوكتارىن ورناتۋ اياقتالدى.
پرەمەر-ءمينيستردىڭ تاپسىرماسى بويىنشا الاڭدا ورناتىلعان بەينەكامەرالاردىڭ ارقاسىندا قۇرىلىس بارىسى ونلاين رەجيمدە باقىلانىپ وتىر. پرەمەر-ءمينيستردىڭ ايتۋىنشا, بارلىق قاجەتتى جۇمىستاردى جۇرگىزۋ ءۇشىن ۇكىمەت 2,2 ملرد تەڭگەدەن استام قاراجات بولگەنىن اتاپ ءوتتى.
«قازىر اكىمدىك پەن مەردىگەرلەردىڭ الدىندا قۇرىلىس جۇمىستارىن بەلگىلەنگەن مەرزىمدە – 2 ايدا ساپالى اياقتاۋ مىندەتى تۇر. بۇل ماسەلە مەملەكەت باسشىسى مەن ۇكىمەتتىڭ ەرەكشە باقىلاۋىندا. سوندىقتان تاپسىرماعا اسا جاۋاپكەرشىلىكپەن قاراۋ كەرەك», دەدى ءاليحان سمايىلوۆ مەردىگەر كومپانيالاردىڭ وكىلدەرىنە.
سودان كەيىن پرەمەر-مينيستر اۋليەكول اۋىلىنداعى مەكتەپ بازاسىندا قۇرىلعان ەۆاكۋاتسيالىق پۋنكتكە بارىپ, زارداپ شەككەندەرمەن كەزدەستى.
«تۇرعىنداردىڭ الاپات تابيعي ورتتەردىڭ سالدارىنان قانداي قيىن جاعدايعا تاپ بولعانىن بىلەمىز. وسىنداي قيىن ساتتە مەملەكەت بارلىق قاجەتتى قولداۋدى جىلدام كورسەتتى. بۇل جۇمىس جالعاسادى», — دەدى ءاليحان سمايىلوۆ. ۇكىمەت باسشىسى پرەزيدەنتتىڭ ءتيىستى تاپسىرمالار بەرىپ, جاعدايدى جەكە باقىلاۋىنا الۋ ءۇشىن وقيعا ورنىنا ارنايى كەلگەنىن اتاپ ءوتتى. «وسىنداي قيىن-قىستاۋ كەزەڭدە سابىرلىق تانىتقاندارىڭىز ءۇشىن العىس ايتامىن. سونداي-اق حالقىمىزدىڭ بىرلىگىن كورسەتىپ, وتانداستارىنا قول ۇشىن سوزعان بارلىق قازاقستاندىقتارعا دا العىس بىلدىرگىم كەلەدى», دەدى ءاليحان سمايىلوۆ.
ءوز كەزەگىندە قاۋىپسىز جەرلەرگە كوشىرىلگەن تۇرعىندار مەملەكەتتىڭ نازار اۋدارىپ, قولداۋ كورسەتكەنى ءۇشىن العىس ايتتى.
