ايماقتار • 15 قىركۇيەك، 2022

گەولوگيالىق مۋزەي اشىلادى

پاۆلودار گەوگرافيا ءۇيى قوعامدىق بىرلەستىگىنىڭ بەلسەندىلەرى بولاشاق گەولوگيالىق مۋزەيگە جادىگەرلەر جيناۋ ماقساتىندا وڭىردە جۇرگىزگەن ارنايى ەكسپەديتسياسىن اياقتاپ قالدى. الداعى ۋاقىتتا جۇزدەگەن مينەرالدار، تاۋ جىنىستارى مەن وزگە دە پايدالى قازبالاردىڭ ۇلگىلەرىن مۋزەيدەن تاماشالاۋعا بولادى.

مۇرات قاپان ۇلى

جالپى، بۇل جوبا ERG (ەۋرازيالىق توپ) قۇرامىنداعى «قازحروم» تۇك» اق اقسۋ فەرروقورىتپا زاۋىتى مەن «پاۆلودار» اكك» اق قولداۋىمەن جۇزەگە اسىپ وتىرعانىن ايتىپ وتەيىك. قوعام بەلسەندىلەرى قازىرگى ۋاقىتتا جينالعان ۇلگىلەردى جۇيەلەۋگە كىرىستى. گەولوگيالىق مۋزەي ەرتىستىڭ پاۆلودار ءوڭىرىنىڭ تابيعي بايلىعىن كوپشىلىككە ناسيحاتتاپ، ايماقتىڭ شيكىزاتتىق الەۋەتىن پاش ەتپەك. بۇل ارقىلى ءوڭىر تۇرعىندارى مەن سىرتتان كەلەتىن قوناقتار ولكەمىز تۋرالى تانىمىن كەڭەيتىپ، كوپشىلىكتىڭ ەكولوگيالىق مادەنيەتىن ارتتىرادى دەپ كۇتىلۋدە.

– مۋزەيگە قويىلاتىن ۇلگىلەردى 2014 جىلدان جيناي باستاعان ەدىك. وسى ۋاقىت ىشىندە الەمنىڭ ءار تۇكپىرىنەن 150-گە جۋىق جادىگەردى جيناپ ۇلگەردىك. ودان سوڭ ءبىزدىڭ ءوڭىر تۋرالى تولىققاندى ەكسپوزيتسيا ۇيىمداستىرۋدى ماقسات ەتتىك. پاۆلودار وبلىسىندا قوسىمشا ەكسپەديتسيا جۇرگىزۋ كەرەك بولدى. اقسۋ فەرروقورىتپا زاۋىتى ءبىزدىڭ باستامامىزدى قولدادى، – دەپ اتاپ ءوتتى گەوگرافيا ءۇيىنىڭ ديرەكتورى الەكساندر ۆەرۆەكين.

بىرلەستىك مۇشەلەرى جوسپارلانعان ون ەكسپەديتسيانىڭ توعىزىن وتكىزدى. ايماقتىڭ ءتۇرلى كەن ورىندارى زەرتتەلىپ، حالتسەدون پسەۆدوستالاكتيتتەرى، كالتسيتتەر، كۆارتسيتتەر، دالا شپاتتارى، ءمۇيىزالدامىش، مىس كوگى، ۆەزۋۆيان-پيروكسەنيتتىك رودينگيتتەر، اعاش جانە مۇك وپالدارى، درۋزا جانە كۆارتس كريستالدارى جينالدى. ماي اۋدانىنداعى «قالماققىرىلعاننىڭ» گرانيتتى القاپتارىنان راۋحتوپاز بەن ءفليۋوريتتىڭ حرۋستال ءتارىزدى وزەگىنىڭ جارقىن جانە قىزىقتى ۇلگىلەرى تابىلدى. اراسىندا لامپروفير-پورفيريت جانە دولەريت تە بار. وسىلايشا، بولاشاق مۋزەي جادىگەرلەرىنىڭ جالپى سانى قازىردە ءۇش جۇزدەن اسىپ وتىر.

جاڭا مۋزەي الداعى قاراشا ايىندا اشىلادى دەپ كۇتىلۋدە. ايتىپ وتەيىك، گەوگرافيا ۇيىندە بۇعان دەيىن ەتنوگرافيالىق مۋزەي، قوعامدىق گەوگرافيالىق كىتاپحانا جانە «جۇرباي» جاس ولكەتانۋشىلار كلۋبى قۇرىلعان.

پاۆلودار وبلىسى