بايعازيننىڭ جاڭا كارتيناسىنىڭ الەمدىك پرەمەراسى وسى كۇندەرى ءوتىپ جاتقان بەدەلدى تورونتو كينوفەستيۆالىنىڭ «زاماناۋي الەمدىك كينو» سەكتسياسىندا كورسەتىلدى.
فيلم ءۇش جىل بويى الماتى, تۇركىستان وبلىسى, اقتاۋ جانە تايلاندتا ءتۇسىرىلدى. كارتينا تاعدىرلار توعىسىنداعى ءتۇرلى وقيعالار تىزبەگىنە تاپ بولاتىن كەيىپكەر تۋرالى باياندايدى.
باستى ءرولدى ەركەبۇلان تاسىنوۆ سومداعان. بايعازيننىڭ ءوزى جوبادا ستسەناري اۆتورى, رەجيسسەر, وپەراتور جانە پروديۋسەر بولدى.
«بۇل ءفيلمنىڭ يدەياسى ماعان ون جىل بۇرىن العاشقى كارتينامدى تۇسىرۋگە دايىندالىپ جاتقاندا كەلدى. كەيىپكەردىڭ باسىنا تۇسكەن قيىندىقتارعا قاراماستان, مەن ارقاشان بۇل وقيعانى ومىرگە دەگەن ماحابباتقا تولى دەپ سانايتىنمىن», دەدى رەجيسسەر.
فيلم ۇلتتىق كينونى قولداۋ مەملەكەتتىك ورتالىعىنىڭ قولداۋىمەن قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن.
ال ەمير بايعازين 2013 جىلى ءار ءتۇرلى فەستيۆالدەردە 25-تەن استام ماراپاتتارعا يە بولعان «ۋروكي گارموني» كارتيناسىمەن الەمدىك كينو الاڭىنا شىقتى. ول قازاقستانعا العاشقى بولىپ بەرلين كينوفەستيۆالىنىڭ «كۇمىس ايۋى» جۇلدەسىن اكەلگەن. كەيىن رەجيسسەردىڭ «رانەنىي انگەل» مەن «وزەن» فيلمدەرى شىقتى, باتىس جۇرتشىلىعى ونى جىلى قابىلدادى. «وزەن» ءفيلمىنىڭ الەمدىك پرەمەراسى 75-ءشى ۆەنەتسيا كينوفەستيۆالىندە «كوكجيەكتەر» باعدارلاماسىندا كورسەتىلدى, وندا ەمير «ۇزدىك رەجيسسەر» رەتىندە ماراپاتتالدى.
95-ءشى رەت بەرىلەتىن امەريكالىق كينواكادەميا سىيلىعىنا ۇمىتكەرلەردىڭ ءتىزىمى 2023 جىلعى 24 قاڭتاردا جاريالانادى. ءراسىمنىڭ ءوزى 2023 جىلعى 12 ناۋرىزدا وتەدى.
