اتىراۋ وبلىسىنىڭ اكىمى سەرىك شاپكەنوۆ ماحامبەت اۋداندىق ءماسليحاتىنىڭ دەپۋتاتتارىنا قازاقستان رەسپۋبليكاسى پرەزيدەنتى اكىمشىلىگىمەن كەلىسىلگەن جاڭا اكىمنىڭ كانديداتۋراسىن ۇسىندى. اۋداندىق ءماسليحاتتىڭ دەپۋتاتتارى جاڭا اكىم قايرات نۇرلىباەۆتىڭ كانديداتۋراسىنا قولداۋ ءبىلدىردى.
قايرات ەسقابىل ۇلى 1973 جىلى 2 مامىردا اتىراۋ وبلىسى, قىزىلقوعا اۋدانىنىڭ مۇقىر اۋىلىندا دۇنيەگە كەلگەن. ءبىلىمى جوعارى. باتىس قازاقستان اۋىل شارۋاشىلىعى ينستيتۋتىن ينجەنەر-مەحانيك, ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىن ەكونوميست ماماندىعى بويىنشا بىتىرگەن.
ەڭبەك جولىن 1995 جىلى اقتوبە وبلىسىنىڭ قوبدا اۋداندىق ءماسليحاتىندا اعا رەفەرەنتى رەتىندە باستادى. 1996-1997 جىلدارى اتىراۋ وبلىسى, قىزىلقوعا اۋدانىنداعى «مۇقىر» اكتسيونەرلىك قوعامىندا جوندەۋشى-تەحنيك بولىپ جۇمىس ىستەگەن. 1999 جىلدان مۇقىر سەلولىق وكرۋگى اكىمى اپپاراتىنىڭ مامانى, مۇقىر سەلولىق وكرۋگىنىڭ اكىمى, قىزىلقوعا اۋداندىق كوممۋنالدىق مەنشىك, كورىكتەندىرۋ, قۇرىلىس جانە تۇرعىن-ءۇي شارۋاشىلىعى ءبولىمىنىڭ مەڭگەرۋشىسى لاۋازىمىن اتقاردى.
ودان كەيىن قۇرمانعازى اۋدانىنىڭ شورتانباي سەلولىق وكرۋگىنىڭ اكىمى, قۇرمانعازى اۋداندىق ىشكى ساياسات, جەر قاتىناستارى بولىمدەرىنىڭ باسشىسى, سونداي-اق ماقاش سەلولىق وكرۋگىنىڭ اكىمى بولعان. 2008-2012 جىلدارى يندەر اۋدانى اكىمى اپپاراتىنىڭ باسشىسى, 2012-2019 جىلدارى اتالعان اۋدان اكىمىنىڭ ورىنباسارى, 2019 جىلدىڭ ماۋسىم ايىنان وبلىستىق اۋىل شارۋاشىلىعى باسقارماسىنىڭ باسشىسى بولىپ جۇمىس ىستەگەن.
ال, 2021 جىلعى قاڭتاردان وسى تاعايىنداۋعا دەيىن اتىراۋ وبلىسى اكىمىنىڭ ورىنباسارى لاۋازىمىن اتقارىپ كەلدى.
